ကိုပေါရဲ့ ပိတောက်ရိပ်၊ Ko Paw's Padauk-Yeik

ကိုပေါ နဲ့ မဒမ်ပေါ (အသွင်တူ၏ မတူ၏)

တနေ့သ၌ ကျွန်ုပ်သည် အချိန်များ ဖြုန်းတီး၍ မကုန်အောင် ပိုလျှံနေသဖြင့် အကျင့်ပါနေသည့်အတိုင်း ဘလော့ဂ်များကို လှည့်လည်ဖတ်ရှုရာ သက်ဝေ ဆိုသူ၏ ဘလော့ဂ်တွင် ကျွန်ုပ်အား “အသွင်တူ၏ မတူ၏” ဟူသည့်ခေါင်းစဉ်ဖြင့် ပို့စ်တပုဒ်ရေးသားပေးရန် တိုက်တွန်းထားသည်ကို တွေ့ရသည့်အခါ သက်ဝေအား ခင်မင်သည့်အလျောက် သူ၏ တိုက်တွန်းချက်ကို လက်ခံကာ ဤဇဗ္ဗူဒိပ်ကျွန်းတွင် စံပြလင်မယား ဖြစ်ခဲ့၊ ဖြစ်ဆဲ၊ ဖြစ်လတ္တံ့သော ကျွန်ုပ်နှင့် မဒမ်ပေါတည်းဟူသည့် လင်မယားအကြောင်းကို နောင်လာနောက်သားများ အတုယူစိမ့်သောငှာ ကျားကုတ်ကျားခဲ၊ မဆုတ်မနစ်သော လုံလဥဿဟကို ထုတ်၍ ရေးသားလိုက်ပါသည်။ နည်းနမူနာယူကာ အတုယူမှတ်သားကြပါကုန်။

အင်း… နိဒါန်းနဲ့တင် ခဲတွေ၊ ပြောင်းဖူးရိုးတွေ ဝင်လာတော့မယ်။ ရီတာပြောသလို လူချစ်လူခင်များစေတဲ့ ဂါထာဆိုတာ ဒါမျိုးပဲဖြစ်ရမယ်။

နောက်တာပါဗျာ။ သူများတွေ မသိသေးတဲ့ ကျနော်တို့ အကြောင်း အချို့ကိုပဲ နည်းနည်းလောက် ရေးသားပြပါ့မယ်။ အောက်ဆုံးမှာလည်း ဘလော့ဂါ ပန်ဒိုရာရဲ့ တခါက တောင်းဆိုချက်အရ လက်လှမ်းမီသမျှ ဟိုးငယ်ငယ်က ဓါတ်ပုံတွေကစလို့ ယခုအချိန်ထိ ဓါတ်ပုံတွေကို တင်ပေးလိုက်ပါတယ်။ တခါပဲ တောင်းဆိုရတယ်။ နှစ်ခါတောင်းဆိုစရာ မလိုတာကို သတိပြုပါ။ ကျနော့် ငယ်ငယ်က ဓါတ်ပုံတော်တော်များများဟာ မိဘတွေအိမ် မီးထဲပါသွားတုန်းက ဆုံးရှုံးသွားပါတယ်။ အနာဂတ် သမိုင်းပညာရှင်တွေအတွက် ကြီးမားတဲ့ ဆုံးရှုံးမှုကြီး ဖြစ်တော့မှာပါပဲ…. သွပ်သွပ်သွပ်။

ကဲ…လာပါပြီ။ မဒမ်ပေါနဲ့ မတူတာက စပြောရမယ်။ ကျနော်က သရဲမကြောက်တတ်ဘူး။ ကျောင်းပိတ်ရက်တွေမှာ သင်္ချိုင်းကုန်းနဲ့ မလှမ်းမကမ်းက မြေပဲခင်းမှာ တယောက်တည်း ညအိပ်စောင့်တတ်တယ်။ ကျနော့်မဒမ်ပေါကတော့ သရဲကြောက်တတ်တယ်ခင်ဗျ။ (အခု သူနဲ့ပေါင်းပြီး ကျနော်တောင် နည်းနည်း ကြောက်တတ်ချင်သလိုလို ဖြစ်လာတယ်။)

မဒမ်ပေါ သရဲကြောက်မှန်းသိတော့ ကျနော်ရော၊ သမီးကပါ မဒမ့်ကို အမြဲလိုလို စတတ် နောက်တတ်တယ်ဗျ။ ဥပမာ ညဖက်မှာ မီးဖိုချောင်ထဲမှာ အလုပ်လုပ်နေတဲ့ သူ့နောက်ကို ခြေဖွနင်းသွားပြီး နောက်ကနေ အသံမထွက်ဘဲ စိန်းစိန်းကြီး စိုက်ကြည့်နေတာမျိုးပေါ့။ ဒါပေမယ့် ဘယ်အချိန်နောက်နောက် အရမ်းစိတ်ဆိုးတတ်တယ်ဗျ။ လူသေအလောင်းတွေ ဘာတွေဆိုလည်း သူက အရမ်းကြောက်တာ။

ဒီတော့ ကျနော်ကလည်း မဒမ့်ကို တကူးတက မှာရတယ်။ ကျနော်သေရင် ချက်ချင်း မီးမသဂြိုဟ်ဖို့၊ အိမ်မှာ အနည်းဆုံး သုံးရက်လောက်တော့ ဆက်ထားဖို့၊ အဲသည်သုံးရက်အတွင်းမှာလည်း နောက်ဆုံးလိုက်လျောခြင်းအနေနဲ့ အလောင်းဘေးနားမှာ အမြဲ စောင့်အိပ်ပေးဖို့၊ မဟုတ်ရင် အလောင်းအနေနဲ့ အထီးကျန် အားငယ်မှာကို စိုးရိမ်မိတဲ့အကြောင်းတွေ ညဖက်တွေမှာ ရွေးပြီး တဖွဖွ မှာကြားရပါတယ်။ မဒမ်က ပြန်ပြောတယ်။ “မင်း… ဒီလောက်ဝနေတာ။ ဝတဲ့လူတွေက သေရင် အပုပ်မြန်တယ်။ ဒီတော့ နေ့မကူးဘဲ ချက်ချင်း သဂြိုဟ်မယ်”တဲ့။ ရက်စက်ပုံက။ နည်းနည်းမှ မကြင်နာဘူး။

ဒီလောက် အလောင်းကြောက်တဲ့ မဒမ်ပေါအတွက် စိတ်မသက်သာစရာ ကိုးလို့ကန့်လန့် အဖြစ်တခု ကြုံရပါသေးတယ်။ ဒီလိုပါ…. တခါက နိုင်ငံခြားသား အသိတယောက်ရဲ့ ညီဝမ်းကွဲလေး ဆုံးသွားတယ်။ မြန်မာလိုဆိုရင် အစိမ်းသေ သေတယ်ပဲ ဆိုပါစို့ရဲ့။ သေသူဟာ တခါမှ မသိမမြင်ခဲ့ဘူးတဲ့ တစိမ်းတယောက် ဖြစ်နေပေမယ့် မိတ်ဆွေရဲ့ ညီဝမ်းကွဲဆိုတော့ အိပ်ခ်ျဒီဘီ တိုက်အောက်မှာ လုပ်တဲ့ အဲဒီ အသုဘကို လင်မယားနှစ်ယောက် သွားကြပါတယ်။ ပထမတော့ အောက်မှာ နေကြာစိစား၊ အအေးသောက်၊ ထုံးစံအတိုင်း တခြား သိတဲ့လူတွေနဲ့ တော်ကီလေးတွေ ပွားရတာပေါ့လေ။

ခဏနေတော့ ကျနော်တို့အသိက အားလုံးကို တိုက်တွန်းတယ်။ တိုက်အပေါ်ထပ်မှာ သေဆုံးသူရဲ့ မိခင် (သူ့အဒေါ်) ရှိတယ်။ တသုတ်ချင်း အပေါ်ကို တက်သွားပြီး အားပေးလိုက်ကြရအောင်တဲ့။ ဟုတ်တာပေါ့။ လုပ်သင့်တာပေါ့။ လုပ်ရမှာပေါ့။ အဲဒါနဲ့ ကျနော်က ရှေ့ဆုံးကနေ ဦးဆောင်တက်ခဲ့တယ်။ မဒမ်က နောက်နားမှာ တခြားသူတွေနဲ့ စကားပြောရင်း လိုက်ပါလာတယ်။ အိမ်ထဲဝင်ကာနီး ကော်ရစ်ဒါမှာ ဆိုဖာတွေ၊ ထိုင်ခုံတွေ အပြင်ထုတ်ထားတာကိုတွေ့တော့ ကျနော်လည်း သံသယရှိလို့ ကော်ရစ်ဒါကနေ ဟထားတဲ့ တရုပ်ကပ်ကတဆင့် ဧည့်ခန်းထဲကို လှမ်းလည်း ကြည့်လိုက်ရော… လားလား… အလောင်းကို ကြမ်းပြင်ပေါ်မှာ အစန့်သား ခင်းကျင်း ချထားတာတွေ့ရတယ်။

ဒါနဲ့ ကျနော်က မဒမ့်ကို လှမ်း သတိပေးရတယ်။ “ချစ်လေးရေ… အခန်းထဲမှာ အလောင်းရှိနေတယ်နော်။ လန့်မသွားနဲ့ဦး” လို့။ မဒမ်က နောက်မှာ အမျိုးသမီးတယောက်နဲ့ စကားဖောင်နေတော့ ကျနော်ပြောတာကို မကြားဘူးဗျ။

ရှေ့ဆုံးကနေ အိမ်ထဲဝင်လိုက်တော့ တံခါးသော့ကို ပူးချည်ထားတဲ့ သံကြိုးစနဲ့ ခြစ်မိပြီး ကျနော့်လက်မှာ သွေးနည်းနည်းစို့သွားလို့ အယူမသည်းဘူးဆိုတဲ့လူလည်း ထိတ်ကနဲဖြစ်ပြီး နည်းနည်းတော့ စိတ်မသက်မသာ ဖြစ်သွားသေးတယ်။

ထင်တဲ့အတိုင်း မဒမ်က ဝင်ဝင်ချင်းမှာ မမျှော်လင့်ဘဲ အလောင်းကြီးကို ဘွားကနဲမြင်လိုက်တော့ သူ့မျက်နှာဟာ သရဲအခြောက်ခံလိုက်ရသူလို ဖြူဖတ်ဖြူလျော်နဲ့ တော်တော်လေး ခြောက်ခြားသွားပုံရတယ်။ ဒါပေမယ့် နာမည်က ဟန်သူ ဆိုတဲ့အတိုင်း ဟန်မပျက်ပေါ့လေ။ မာန်တင်းပြီး ကျနော့်ဘေးမှာ လာရပ်တယ်။ ကျနော်တို့အားလုံး ဆယ့်နှစ်ယောက်လောက်ရှိမယ်။ အလောင်းပတ်ပတ်လည်မှာ ဝိုင်းပြီး မတ်တတ်ရပ်ရင်း အသုဘ ရှုကြတယ်ပေါ့။

ပန်းနဲ့ အမွှေးတိုင်နံ့တွေက အခန်းတခုလုံးကို စူးစူးရှရှ လွှမ်းခြုံထားတယ်။ ကြမ်းပြင်ပေါ်က အလောင်းမှာ မျက်နှာ၊ လည်ပင်းနဲ့ လက်ကလေးတွေသာ ဖော်ထားပြီး ကျန်တာကတော့ ပိတ်ဖြူနဲ့ ပတ်၊ ကိုယ်ပေါ်မှာ ပန်းတွေ ကျိုးတို့ကျဲတဲ လွှမ်းထားတယ်။ မျက်နှာက ပြင်ထားပေမယ့် နည်းနည်းလေး ပြာချင်နေပြီ။ သူတို့ဘာသာစကားနဲ့ ဘုရားစာလို့ ထင်ရတဲ့ မန္တာန်တပိုဒ်ကို ကက်ဆက်ကနေ ထပ်ဖန်တလဲလဲ ရွတ်နေတယ်။ “ဥုံ…..ကွိစိနံကွ တကွမ်ကွ” ဆိုတာမျိုးပေါ့။ ကျနော်တို့တွေက တယောက်ချင်း အလောင်းရဲ့ ခြေရင်းမှာ ချပေးထားတဲ့ ခွက်ထဲက ပန်းပွင့်လေးတွေကို ယူပြီး အလောင်းပေါ်မှာ ကြဲဖြန့် ချပေးရတယ်။

အသိကတော့ သူ့ညီဝမ်းကွဲကို တော်တော်ချစ်ပုံရတယ်။ သေသူရဲ့ ပါးကလေးကို စမ်းကြည့်လိုက်။ ဆံစလေးကို သပ်ပေးလိုက်။ လက်ကလေးကို ကိုင်လိုက်နဲ့ပေါ့လေ။ ပြီးတော့ မဒမ်နဲ့ ကျနော့်ဖက်ကို လှည့်ပြီး “လာလာ…. အောင်နဲ့ ဟန်။ လာကိုင်ကြည့်လှည့်။ ဘယ်လိုမှ သဘောမထားဘူး။ ထိလို့ရတယ်။ ကိုင်လို့ရတယ်” ဆိုတဲ့အကြောင်းကို သုံးကြိမ်ထက်မနည်း လှည့်ခေါ်ပြီး တိုက်တွန်းပါတယ်။ ကျနော်ကလည်း စောစောက ခြစ်မိလို့ သွေးစို့နေတဲ့လက်နဲ့ သွားထိရမှာကို ဝန်လေးနေတယ်။ မဒမ်ပေါ မျက်နှာကို ကြည့်ရတာလည်း ပြိုတော့မယ့် မိုးလိုပါပဲ။ လင်မယားနှစ်ယောက် အကြံအိုက်နေကြတယ်။ ငြင်းရမှာလည်း အားနာစရာကြီးးမို့လား။ ကျန်တဲ့ လူတွေကလည်း ဘယ်သူမှတော့ သွားကိုင်မကြည့်ကြပါဘူး။ ကံကောင်းချင်တော့ သေဆုံးသူရဲ့ အမေဖြစ်ဟန်တူသူ မီးဖိုထဲက ထွက်လာတာတွေ့ရတဲ့အတွက် ဝမ်းနည်းကြောင်း သွားပြီး စကားပြောကြတယ်။ ခဏနေတော့ နှုတ်ဆက်ပြီး ပြန်လာခဲ့ကြတယ်။ မဒမ်ပေါ ကြည့်ရတာ တက္ကစီပေါ်ရောက်မှ အသက်ဝဝ ရှူနိုင်ပုံပဲ။

ညဖက်ရောက်တော့ ကျနော်က အိပ်ယာပေါ်မှာ ခပ်တောင့်တောင့် စန့်စန့်ကြီးလှဲပြီး မဒမ့်ကို “လာ…. ဟန်။ ထိကြည့်၊ ကိုင်ကြည့်လို့ရတယ်” ဆိုတဲ့ နေ့လည်က မိတ်ဆွေရဲ့ အသံမျိုးနဲ့ ပြောမိလို့ အဲဒီညက မဒမ်ပေါ စိတ်ဆိုးတာ ခံလိုက်ရသေးတယ်။ (စကားစပ်မိလို့ ပြောရရင် မိုးမခ ဝက်ဆိုက်က ဆရာသမားများဟာ အသုဘအခမ်းအနားတွေအကြောင်း ဖော်ပြတဲ့အခါတိုင်းမှာ လူသေအလောင်းတွေကို မမေ့မလျော့ မျက်နှာအနီးကပ် ဖော်ပြရတတ်ကြတာကို တွေ့ရတယ်။)

ဒါကတော့ မဒမ်ပေါနဲ့ ကျနော်ရဲ့ အသွင်မတူပုံတွေထဲက တချက်ပေါ့။

တကယ်တော့ အစအနောက် သန်ပုံမှာ လင်မယားနှစ်ယောက်စလုံး အသွင်တူပါတယ်။ မဒမ်ပေါဆိုရင် ကျနော်တခါက လေနဲ့ဝမ်း မကွဲတာလေးတောင် ချမ်းသာမပေးဘူး။ အောက်ပါအတိုင်း ကဗျာစပ်ပြီး ကျနော့်ကို နောက်လိုက်သေးတယ်။ သူများကို နောက်ဖို့အရေး… မစင် နေရာက ဝင်ပြီး ခံစားရေးတာ။

" သွားခွင့်ပြုပါ....သခင် "

* သခင့်အပါး
အစိုင်အခဲဘဝနဲ့ ကိုယ့်ရပ်တည်မှုဟာ
မနေ့ကစလို့ ပျက်သုဉ်း
အရည်ဘဝ လုံးလုံးရောက်ခဲ့ပြီ....။

* သခင်နာကျင်မယ်မှန်းသိပေမယ့်
မဆင်မခြင် ထွက်ပေါက်ရှာ
'လေ'အလာကို စောင့်မိခဲ့တဲ့ကိုယ့်ကို
ခွင့်လွှတ်ပါ....သခင်။

* ဒီလိုနဲ့စောင့်နေတုန်း...
ဟောဟိုက 'လေ'တလုံး
ဗြုန်းကနဲဆို..ပေါ်အလာ
ပုန်းခိုကာ လိုက်လို့သွား
အပြင်ဘက်နားအရောက်မှာတော့
တုန်ခါနေတဲ့ သခင့်အသံ
မပီမသ ကြားလိုက်မိတာက...
"ဟာ...ထွက်ကုန်ပဟ"...တဲ့"

မဒမ်ပေါ
23 Nov 2007

ကဲ... ဘယ်လောက်ဆိုးတဲ့ မဒမ်ပေါလဲဆိုတာ။

ရုပ်ရည်အားဖြင့်ရော…။

ကျနော်က အညာသား။ အသားအရောင်လှတယ်။ အနောက်တိုင်းသားလူဖြူတွေဆို ကျနော့်လို အသားအရောင်မျိုးကို လိုချင်လွန်းလို့ ပင်လယ်ကမ်းခြေမှာ တနေကုန်တနေခန်းဆင်းပြီး နေလှန်းကြပ်တင်တာတောင် လိုက်မမှီတဲ့ အသားအရောင်မျိုး။ ကြေးနီရောင် အသားအရောင်ပေါ့။ အဲ…အဲ ပြည့်စုံအောင် ပြောရရင် ကြေးနီရောင်မှာမှ ခဲမဖြူတို့ အဖြိုက်နက်တို့ တော်တော်လေးရောစွက်တဲ့ ကြေးနီရောင်မျိုး။

ရုပ်ရည်ကတော့ “ကိုပေါက ဗမာချော ချောပြီး ကြည့်ကောင်းတယ်” တဲ့။ တခါက ကိုယ့်ကို မျက်နှာချင်းဆိုင် စေ့စေ့ကြည့်ပြီး အဲသလို ပေါ်တင်ကြီး လာပြောချလိုက်တာ မျက်နှာမထားတတ်အောင်ပဲ ရှက်သွားခဲ့ဖူးတယ်။ အဲသည်လို ဗြောင်လာပြောတာ ဘယ်သူမှတ်လို့လဲ။ မျက်နှာချင်းဆိုင် မှန်ထဲမှာ ပေါ်နေတဲ့ လူပေါ့။ ဟွန်း… မုန်းစရာကြီး။ ကဲကို ကဲတယ်။

မဒမ်ပေါကတော့ ကျောင်းတုန်းက ကျနော်တို့ နှစ်ရဲ့ Queen လေ။ ကျနော်တို့ မျက်မမြင်ကျောင်း တက်ခဲ့လေသလားလို့တော့ မိတ်ဆွေတို့ ကျေးဇူးပြု၍ မတွေးကြပါနဲ့ပေါ့။ မဒမ်ပေါရဲ့ ကျောင်းတုန်းက ဆံပင်ပုံက ကိုလေးပွ ပုံနဲ့။ ကင်တင်းမှာ ဆင်းပြီး ကေသာကို တချက်ဝဲလိုက်ရင် အားလုံး ကြွေသွားတယ်။ ကင်တင်းမှာ ဝဲပျံနေတဲ့ ယင်ကောင်တွေကို ပြောတာပါ။ ဆံပင်နဲ့ ယမ်းမိလို့။

ဘလော့ဂါ မသီတာ ပြောသလို လင်မယားနှစ်ယောက်ဟာ တမိုးတည်းအောက်မှာ အတူနေပြီး စားတဲ့ အာဟာရကလည်းတူတော့ ဥတုတွေ၊ အာဟာရတွေကပဲ ပြုပြင်သလားမသိ။ ဒီလောက် အဖြူအမဲ သဲကွဲနေတဲ့ ကျနော်တို့ မောင်နှံကို တူတယ်လို့ ပြောတဲ့လူတွေလည်း တော်တော်များပါတယ်။

ညားကာစက မဒမ်ပေါက ပြောဖူးတယ်။ “ကိုကို… ချစ်လေးက သူများမိန်းမတွေလို စိန်တွေ၊ ရွှေတွေ၊ အဝတ်အစား၊ အသုံးအဆောင်၊ အလှအပ ပစ္စည်းတွေ စိတ်မဝင်စားဘူး။ အစားအသောက်ကလေးပဲ တခုပဲ ကောင်းကောင်းမွန်မွန် စားနေရရင် ကျေနပ်ပါပြီ၊ အဲဒါလေးတခုတော့ လိုက်လျောပါ”….လို့ ကတိတောင်းဖူးတယ်။

အဲဒီစကားကြားရတော့ မောင်ပေါတို့ ပိုက်ဆံတွေ အပီ စုမိတော့မယ်၊ မိန်းမ အရတော်လေစွဆိုပြီး ပီတိတွေ လှိုင်လှိုင်ဖြာခဲ့ဖူးတယ်။ အစားအသောက်တော့ ဘာကုန်မှာလဲ။ ဒီတော့ လိုက်လျောပါ့မယ်။ ကတိပေးပါတယ်ကွယ်ပေါ့။ အစားမှာ မော်လမြိုင်ဆိုတဲ့အတိုင်း မော်လမြိုင်သူဆိုတော့ ဒီလောက်တော့ ရှိပေမပေါ့လို့လည်း ဖြေတွေး တွေးခဲ့သဗျ။

ဒါပေမယ့် နောက်တော့မှ သိရတာ။ မဒမ်ပေါတို့ အမျိုးက နှယ်နှယ်ရရ အမျိုးမဟုတ်ဘူး။ “စားပြီး ဆေးသောက်တဲ့ အမျိုး”တဲ့။ စာဖတ်သူများ မရှင်းမှာ စိုးလို့ နည်းနည်း ထပ်ပြောပြပါမယ်။ သူတို့အမျိုးမှာ မတည့်တဲ့အစာ၊ ရှောင်တဲ့အစာဆိုတာ ဘာဆို ဘာမှ မရှိဘူးတဲ့ ခင်ဗျ။ အစာမကြေမယ့် အစာဆိုလည်း စားပြီး အစာကြေဆေးသောက်လိုက်တယ်။ သွေးတက်မယ့် အစာမျိုးဆိုရင်လည်း စားပြီး သွေးကျဆေးကို မှီဝဲလိုက်တယ်။ အိမ်မှာ အဲသည်လိုသောက်ဖို့ ဆေးမျိုးစုံလည်း စုဆောင်းထားတယ်။ ကောင်းကြပါလေရော။

မောင်ပေါရဲ့ ဦးနှောက် ပရိုဆက်ဆာ က နှေးတော့ လက်ထပ်ပြီး ဆယ်နှစ်လောက်နေမှ သဘောပေါက်တယ်။ တကယ်တော့ စိန်တွေ ရွှေတွေ ဆိုတာက တခါတရံမှ ဝယ်တတ်ကြတာဖြစ်လို့ တခါတရံမှ ကုန်တတ်တာမျိုးကလား။ အစားအသောက်ကတော့ နေ့စဉ်နဲ့အမျှဆိုတော့….. ကျနော့်ခမြာမှာ တော်တော်လေး ထိရှာပါတယ်။ ဒါကြောင့် မောင်ပေါ မဒမ့်ကို တခါတလေ အစားအသောက်လိုင်းကနေ စိန်ရွှေ၊ အဝတ်အစားလိုင်းကို အပြောင်းအလဲလေးဖြစ်အောင် ပြောင်းကြည့်ပါလားလို့ ဖျားယောင်းတိုက်တွန်းကြည့်မိတယ်။ ဒါပေမယ့် မဒမ်က “ဟင့်အင်း…ရတယ်။ မပြောင်းတော့ပါဘူး။ စိန်တွေ၊ ရွှေတွေက ကိုယ်သေရင် ကိုယ့်နောက်ပါမှာမဟုတ်ဘူး။ နောက်မိန်းမ ကောင်းစားဖို့ ဖြစ်သွားလိမ့်မယ်” လို့ ပြန်ပြောတဲ့အတွက် ကျနော့်မှာ အကြံအိုက်နေပါတယ်။

အဲဒါနဲ့ပဲ ကျနော်လည်း အရှုံးမရှိရအောင် သူနဲ့အတူ ဘာမဆိုလိုက်စားရတယ်။ အရင်က ဒူးရင်းသီးဆို အနံ့မခံနိုင်တဲ့အညာသားဟာ အခု ဒူးရင်းသီးကိုတောင် ကျိတ်မှိတ်ပြီး စားတယ်။ မဒမ်ရဲ့ လက်သုံးစကားရှိတယ်။ “စားနိုင်တုန်း ကျွေးထားနော်။ နောင် အိပ်ယာထဲလဲပြီး မစားနိုင်တော့မှ ငါမကျွေးလိုက်ရလေခြင်း ဆိုပြီးတော့ နောင်တရနေမယ်”တဲ့။ ဒါနဲ့ ကျနော်ကလည်း ပြန်ပြောရပါတယ်။ “မင်း…. အခုတောင် တန်နေပြီပါကွာ” လို့။

ဒီလိုနဲ့ အစားမှာ တူလိုက်တာ အသောက်တူတာမှာပါ ဂိတ်ဆုံးသွားတယ်။ ပထမတော့ မဒမ်ပေါကို ဘီယာအတူသောက်ဖို့ ဆွယ်လိုက်တယ်။ သူကလည်း ပါရမီရင့်သန်တဲ့အလျောက် ပထမ ဘီယာ၊ နောက်တော့ ဝိုင်၊ နောက်တော့ မာတီနီ၊ နောက်တော့ ကော့ညက်၊ နောက်တော့ ဝီစကီ (ဂျက်ဒယ်နီယယ်၊ ချီးဗတ်စ်၊ ဘလက်၊ ဘလူးလေဘယ်) စသဖြင့် ကျနော့်ကိုတောင် ကျော်တက်ချင်လို့ မနည်း လမ်းပိတ်ထားရတယ်။ သူ့အကြိုက်ဆုံးက ဘလူးလေဘယ်လ်ပါတဲ့။

အခုတော့ ကျနော့်အသည်းမကောင်းလို့ သိပ်မသောက်နိုင်တော့ဘူး။ မဒမ်ပေါအတွက်တော့ ကြေကွဲမိုးတိမ်ပေါ့။ ဦးပုညစကားနဲ့ ပြောရမယ်ဆိုရင်….

“ဘဝဟောင်းက၊ ငယ်ပေါင်းပီပီ၊ လည်ချင်းမှီ၍၊ တိုက်ဂါးပညောင်၊ ဘီယာချောင်မှာ၊ ဆွေမောင်နဲ့မယ်၊ ကျီစယ်သမှု၊ အမြည်းလု၍၊ ကယုကယင်၊ ချစ်တုန့်တင်လျက်၊ ကျင်ကျင်လည်လည်၊ ပျော်ခဲ့ဘူးသည်များကို၊ ကြံစည်စေ့စေ့၊ တစိမ့်စိမ့်အောက်မေ့၍၊ တငွေ့ငွေ့ဆင်ခြင်၊ ပူစကို ငင်မိလျှင်၊ ပူပင်လယ်ရေ၊ လှိုင်းဘောင်ဘင်ဝေသောကြောင့်၊ မဖြေနိုင် မဆည်နိုင်၊ သည်းဆိုင်လောင်ခြစ်၊ ကျမျက်ရည် ချောင်းဖြစ်အောင် အော်ဟစ်၍ငိုဆဲတွင်၊ နဂိုသောက်မြဲ၊ မောင်ပေါရဲ့လည်ဆွဲဟာ၊ ရင်ကွဲနာနဲ့ တခါတရံမျှသာ သောက်ရရှာလေသည်” လို့ စပ်ရမလားမသိဘူး။

အဲဒါကတော့ လူမသိသေးတဲ့ မောင်ပေါနဲ့ မဒမ်ပေါရဲ့ အသွင်တူခြင်း မတူခြင်းတွေပါ။ အောက်မှာ မဒမ်ပေါနဲ့ ကျနော်ရဲ့ ငယ်နုစဉ်က (အခုလည်း ငယ်ပါတယ်) ရုပ်ပုံလေးတွေကို မမြင်ဘူးသူများ ကြည့်လို့ရအောင် အမှတ်တရ ထည့်ပေးလိုက်ပါတယ်။

ဘလော့ဂါသက်ဝေ ကျပ်နေ… အဲလေ….ကျေနပ်မယ်ထင်ပါတယ်။ (မသက်ဝေ ကြည့်ရတာ စကားလိမ်တွေကို ပြောင်းပြန်လှန်တာ မကျွမ်းကျင်ဘူးထင်တယ်… ဟိဟိ။ ဟို စကားလိမ်ပို့စ်တုန်းက ကျနော့်ကို ကျေးဇူးတောင် တင်လိုက်သေးတယ်။ ဟီဟီဟီ။)

အပေါ်ကပုံနှစ်ပုံက မဒမ်ပေါ ငယ်ငယ်က ပုံလေးတွေလေ။ မျက်လုံးနက်နက်ကလေးနဲ့ ချစ်စရာမကောင်းဘူးလား။ သူ့အမေ(ကျနော့်ယောက္ခမ)ကတော့ အဲဒါ ဓါတ်ပုံဆရာ ခဲထိုးထားလို့ပါဆိုပြီး အားပေးရှာတယ်။

ကျနော်ငယ်ငယ်က ဓါတ်ပုံဆရာ ရွာကိုလာတုန်း အစ်မနှစ်ယောက်နဲ့အတူ ရွာထိပ်က လယ်ကွင်းတွေနားမှာ ရိုက်ထားတာ။ ဓါတ်ပုံအဖြူအမဲ ခေတ်ကပေါ့။ ဝတ်ထားတဲ့အင်္ကျီတွေက “မယ်ရက်ခိုး”ဆင်တဲ့။ အထက်မင်းလှမြို့နယ်ထဲက စမ်းမကြီး ဆိုတဲ့ ရွာကထွက်တာ။ ဆောင်းတွင်းမှာ ဝတ်ရင် နွေးတယ်။

ကိုပေါ ငယ်ငယ်တုန်းက တော်ရှာပါတယ်တော်ရေ့...တော်ရှာပါတယ်အေ့...... ခုနစ်တန်း လူရည်ချွန်။ ငပလီ ရွှေဝါချိုင်စခန်းမှာ ရိုက်ထားတာ။ အဲသည်ကတည်းက လူက နည်းနည်းတော့ နွဲ့ချင်သား။ ကြည့်ပါလားလို့.... ပုံကို။

မဒမ်ပေါ၊ သန်းသန်း၊ စန်းသီတာဦး(ရိမေ).......နောက်ဆုံးနှစ်မှာ ရိုက်ထားတာ။

စက်မှုတက္ကသိုလ်မြက်ခင်းပြင်ပေါ်မှာ။
(သိန်းဆောင်၊ ဇေယျာသင်း၊ ကိုပေါ၊ ဝင်းဇော်နိုင်၊ မြင့်လွင် (ဝူးဝါး)၊ မျိုးထွန်း၊ မောင်မောင်သန့်၊ မိုးဇော်လွင် (ပုံထဲတွင် ရင်ခေါင်းအထိ မြေမျိုခံနေရသူ)၊ ရဲမိုးထွန်း၊ ဝင်းမောင်ဦး)

မဒမ်ပေါ Extreme Makeover

အဲသည်တုန်းက လူကောင်းလေး ကိုပေါ။ ဘုရားဒကာ ကိုပေါ။ သေရည်သေရက်ကို လျှာဖျားမျှမတင်ဟု ကြွေးကြော်ခဲ့သူ။ အခုတော့ လျှာမထိ အာမထိ မော့တယ်။ အာစရိယပူဇော်ပွဲမှာ ကန်တော့ချိုး တိုင်ပေးနေပုံပါ။
(ဝင်းမောင်ဦး၊ ဟန်သက်အောင်၊ ဇေယျာသင်း(ကွယ်လွန်)၊ ကိုပေါ၊ ဝင်းသိန်း၊ ကျော်ဌေးကြီး)

အီလက်ထရွန်းနစ်ကျောင်းသားများရဲ့ စက်မှုပြပွဲတွင်။ (ကျော်မိုးလတ်၊ ဦးကြင်စိုး (ပါမောက္ခချုပ်)၊ ဒေါက်တာစန်းတင့် (ဌာနမှူး)၊ ဦးမျိုးကြည်(ကထိက)၊ ကိုပေါ၊ ဒေါ်မြင့်မြင့်(ဌာနမှူး)၊ ဦးညီလှငယ် (ဒု-ပါချုပ်)၊ ဦးသာလှိုင် (အငြိမ်းစား ဌာနမှူး)၊ သိန်းအောင်)

စက်မှုတက္ကသိုလ် ပင်မအဆောက်အဦးကြီးအတွင်း သြဘာလမ်းထိပ်မှာ (မျိုးထွန်း၊ ဇေယျာသင်း၊ မိုးဇော်လွင်၊ မြင့်လွင် (ဝူးဝါး)၊ ဇော်နိုင်၊ ရဲမိုးထွန်း၊ ကိုပေါ၊ မောင်မောင်သန့်၊ ဝင်းဇော်နိုင်၊ ဝင်းမောင်ဦး)

ရန်ကုန်စက်မှုတက္ကသိုလ် ဗုဒ္ဓဘာသာမိသားစု ရန်ပုံငွေအတွက် စပါကလင် ရောင်းနေသော ကိုပေါနှင့် မဒမ်ပေါ။ မဒမ်ပေါရဲ့ ထိုစဉ်က ကေသာမှာ ချုပ်ညရီတွင် ဖြုတ်ချည်းမြင်သည် လူပင်လေလော၊ တစ္ဆေလော ဆိုသည့် ကိုလေးပွ ဆံပင်မျိုးပေါ့။

ဂျီဟောသူ မဒမ်ပေါရဲ့ မထင်မှတ်ဘဲ ဟာသ မြောက်တဲ့ ဓါတ်ပုံတပုံ။ မျက်နှာပေါ်က ကြယ်သီးလေးနှစ်လုံးနဲ့ အင်္ကျီပေါ်က ကြယ်သီးတွေ အလှချင်းပြိုင်နေပုံပေါ့... ဟီးဟီး.... ဆံပင်ပုံကတော့ အတန်းထဲမှာ စက္ကူမြှားနဲ့ပစ်ရင် ဘယ်တော့မှမလွဲတဲ့ ဆံပင်ပုံမျိုးပေါ့။

မလေးရှားမှာ အလုပ်လုပ်ခဲ့စဉ်က ပီနန်ဘုန်းကြီးကျောင်းရှေ့မှာ အမှတ်တရ (အောင်ချိုဦး၊ ကိုဉာဏ်စိုး၊ ညီညီဇော်မင်းနဲ့ ကိုပေါ)

မင်္ဂလာပါ ချရာမ။ မဒမ်ပေါ ဆရာမလုပ်စဉ်က။ ဘလော့ဂါ တီတီဆွိတို့လိုပေါ့။ အဲသည်တုန်းက ဘုန်းကြီးမျက်မှန်လိုလို ရွှေကိုင်းမျက်မှန်ကို မဒမ်ပေါ တပ်လိုက်သေးတယ်။ ချင်ကျားပူရောက်မှ လူတွေ ဝိုင်းကြည့်လွန်လွန်းလို့ မျက်မှန်လဲလိုက်ရတယ်။

စင်္ကာပူကို ရောက်လာပြီ။ MRT ပေါ်မှာ။ အဲသည်ခေတ်က ရထားဆိုတာ အဲသည်လို ချောင်တာကွဲ့။

ဒီလို အမှတ်တရ လေးတွေ။

ဒီလို ချိန်းဝိုင်းလေးတွေနဲ့လည်း ဘဝကို ကျော်ဖြတ်ခဲ့ကြဘူးတယ်။ အခုတော့ သူများတွေ ဂျက်အကြောင်းရေးရင် သွားပြီး သွားရည်ကျရုံပဲ တတ်နိုင်တော့တယ်။

ယခုလို ကျိကျိတက်မချမ်းသာခင် ဟိုးယခင်ဘဝက။ (Bird Park မှာ)

ဒါက ဖလင်ကင်မရာအသစ် ဝယ်လာကာစက ညဖက်ကြီး စမ်းထားတဲ့ပုံ။ အဲဒီအချိန်က မဒမ်ပေါ စိတ်ကောက်နေပါတယ်။ အိပ်ချိန်မှာ မအိပ်ရပဲ ကင်မရာအသစ်ကို မပြီးနိုင် မစီးနိုင် ကလိ နေလို့ပါ။ ဒါပေမယ့် နောက်ခံ ဘက်ဂရောင်းအတွက် တအိမ်လုံးမှာ နေရာလိုက်ရှာတာ... ဘယ်နေရာမှ ရှာမတွေဘူး။ နောက်ဆုံး အခန်းထဲက အိမ်သာတံခါးကို ဆွဲစေ့လိုက်ပြီး ဒီရှေ့မှာ လာရပ် ဆိုတော့မှ... စိတ်ဆိုးနေတဲ့မဒမ်ပေါလည်း ဘက်ဂရောင်းကိုကြည့်ပြီး မအောင့်နိုင်ဘဲ တဟီးဟီး ရယ်ပါတော့တယ်။

လူတော်တယောက် ဆုံးရှုံးခြင်း

မခင်ဦးမေ ဘလော့ဂ်မှာ ကွယ်လွန်သွားပြီ ဖြစ်တဲ့ သူ့ သူငယ်ချင်းတစ်ယောက် အကြောင်းကို ရေးထားတာ ဖတ်ရတယ်။

ဒီညကလည်း အိပ်မပျော်သော ညတညရဲ့ ညဉ့်လယ်သံသရာမို့ အတွေးတွေထဲမှာ လွန်ခဲ့တဲ့ ရှစ်နှစ်လောက်က ကွယ်လွန်သွားခဲ့ပြီ ဖြစ်တဲ့ သူငယ်ချင်းတယောက်ကို သတိရမိတယ်။

သူက ရန်ကုန်စက်မှုတက္ကသိုလ် အီလက်ထရောနစ် မေဂျာမှာ တနှစ်တည်း အတူတူတက်ခဲ့ကြတဲ့ ကျောင်းသားတွေထဲက စာအတော်ဆုံး ကျောင်းသားတယောက်ပေါ့။ နှစ်တိုင်းလိုလို ပထမစွဲတယ်။ အဲသည်တုန်းက Roll 1 လို့ ခေါ်ကြတာပေါ့။ ပဉ္စမနှစ် စာမေးပွဲနီးကာမှ ဆေးရုံတက်ရလို့ နောက်ဆုံးနှစ်မှာ Roll 11 ဖြစ်သွားတယ်။ နောက်ဆုံးနှစ်အောင်တော့ Roll 1 ပြန်ဖြစ်သွားတယ်။

ကျနော့် Yearbook ထဲက သူ့ဓါတ်ပုံ၊ သူ့နာမည်နဲ့ စာမျက်နှာမှာ

VI Ec.E 11 (YIT)
အမှတ် ၁၁၊ ၁၁၁ လမ်း
မင်္ဂလာတောင်ညွန့်မြို့နယ်၊ ရန်ကုန်။

…….ဆိုပြီး နံပါတ်ဝမ်းတွေ ရောပြွန်းနေတဲ့ သူ့လိပ်စာကို ဖော်ပြထားလို့ ဘေးနားမှာ တစုံတယောက်က “ဝမ်းများကို လက်ကိုင်ထားသူ၊ သိပ်ညစ်ပတ်တာပဲနော်” လို့ နောက်ရွှတ်ရွှတ် ခဲတံနဲ့ ရေးသား နောက်ပြောင်ထားတာ တွေ့ရတယ်။

သူ့ကို အားကျလို့ ထင်ပါရဲ့။ မြန်မာပြည်ကွန်ပြူတာလုပ်ငန်းရှင်များအသင်းမှာ လူကြီးတွေဘာတွေ ဖြစ်သွားခဲ့ဘူးတဲ့ ကျနော်တို့ အတန်းထဲက သူငယ်ချင်းတယောက်ဟာ စာကြည့်စားပွဲဘေးမှာ “စာသည် ပထမ၊ စာသည် ဒုတိယ၊ စာသည် တတိယ” လို့ ကြွေးကြော်သံဆောင်ပုဒ်ကို ကပ်ထားပြီး သူ့လို Roll-1 ဖြစ်ဖို့ ကြိုးစားလိုက်တာ အောင်စာရင်းထွက်လာတော့ Roll-111 ဖြစ်သွားလို့ အဲသည်တုန်းက ကျနော်တို့ကြားမှာ ဟားစရာ ဖြစ်သွားသေးတယ်။

သူက စာတော်ရုံတင်မက။ စိတ်ထားကလည်း ပြည့်တယ်။ ကူညီတတ်တယ်။ သူ့ဆီမှာ စာတွေဘာတွေ မေးရင်လည်း စိတ်ရှည်လက်ရှည် ကူညီရှင်းပြပေးတတ်တယ်။ အသင်းအပင်းကိစ္စတွေမှာလည်း တက်တက်ကြွကြွ ပါဝင်လှုပ်ရှားတတ်တယ်။ သူ့ကို လူချစ်လူခင် တော်တော်များတယ်။

သူက အဆင့်တစ်ဆိုပြီး ရုပ်တည်ကြီးနဲ့ နေတာမျိုးလည်း မဟုတ်ပြန်ဘူး။ ရယ်ရယ်မောမောနဲ့ ပျော်ပျော်နေတတ်တယ်။ ဟာသဉာဏ်ကလည်း ရှိတယ်။ ရန်ကုန်စက်မှုတက္ကသိုလ် ဗုဒ္ဓဘာသာမိသားစုက ထုတ်ဝေတဲ့ Yearbook မှာ လေကြောင်းစက်မှုဘာသာရပ်က ကိုကြည်သွင်အတွက် သူ ရေးထားတာလေးကို အခုထိတောင် သတိရမိလို့ ပြုံးမိသေးတယ်။

“ကိုကြည်သွင်….. ကောင်းကင်တမွတ် ကြယ်ကို ဆွတ်နိုင်ပါစေ”….တဲ့။ အောက်မှာကျတော့ သူဆွဲထားတဲ့ ကာတွန်းပုံကလေးတပုံ။ ဟိုးအမြင့်မှာ ကြယ်ကလေးတပွင့်။ ကြယ်ပွင့်အောက်နားဆီမှာ လေယာဉ်ပျံတစင်းဟာ မီးခိုးတွေအူပြီး အောက်ကို ထိုးစိုက်ဆင်းသွားတဲ့ ပုံကလေးနဲ့။

ကျောင်းပြီးတော့ သူက သိမ်ဖြူလမ်းမှာ ရှိတဲ့ ကွန်ပြူတာ ကုမ္ပဏီတခုမှာ အီလက်ထရောနစ် အင်ဂျင်နီယာ ဝင်လုပ်တယ်။ တနှစ်လောက်ကြာတော့ ထိုင်းနိုင်ငံ Asian Institute of Technology (A.I.T) တက္ကသိုလ်က သူ့ကို စကောလားရှစ် ပေးတဲ့အတွက် မာစတာဘွဲ့အတွက် အဲသည်မှာ ကျောင်းသွားတက်တယ်။ သူ့အလုပ်နေရာမှာ ကျနော့်ကို ထည့်ထားပေးခဲ့တယ်။ ကျနော်ကလည်း မလေးရှားက အလုပ်တခုက ခန့်တဲ့အတွက် အဲသည်အလုပ်မှာ ကြာကြာမနေလိုက်ရဘူး။ သူကျောင်းတက်တဲ့အချိန်နဲ့ ကျနော် မလေးရှားမှာ အလုပ်လုပ်နေချိန်နဲ့ တချိန်တည်းဆိုတော့ အီးမေးလ် အဆက်အသွယ် မပြတ်ဘူး။ သူ့အကြောင်းတွေ အမြဲလိုလို ကြားနေရတယ်။ အဲဒီတက္ကသိုလ်က မြန်မာကျောင်းသား အသင်းအဖွဲ့မှာလည်း သူက ပါဝင်လှုပ်ရှားလိုက်သေးတယ်။ ကျနော်တို့ နှစ်က အီလက်ထရောနစ်ကျောင်းသားတွေ အချင်းချင်း ဆက်သွယ်ကြဖို့ egroup တွေ ဘာတွေ သူက လုပ်ပေးလိုက်သေးတယ်။

ကျောင်းပြီးကာစ နိုင်ငံခြားကို မထွက်ခင် မြန်မာပြည်တွင်းမှာ အလုပ်လုပ်နေကြစဉ်က သူ့ရဲ့ ပတ်စ်ပို့တ် ဓါတ်ပုံတပုံ ကျနော့်ကို ပေးထားဘူးတယ်။ ကျနော်က သူငယ်ချင်းတွေရဲ့ ရုပ်ပြောင်ပုံတူလေးတွေ ဆွဲပေးတတ်တော့ သူ့ရဲ့ ယီးယားဘွတ်ခ်မှာ သူ့ပုံတူ အမှတ်တရ ဆွဲပေးဖို့ ကျနော့်ကို ပူဆာတာပါ။ ကျနော်ကလည်း လူရင်းဆိုတော့ ဆွဲပေးမယ် ဆွဲပေးမယ်နဲ့ လူချင်းသာ ကွဲကွာသွားရော…. ဆွဲမပေးလိုက်ရဘူး။

ဒီလိုနဲ့ ကျနော်စင်္ကာပူကို ရောက်လာတဲ့အချိန်မှာ သူကလည်း အေအိုင်တီမှာ ကျောင်းပြီးကာ နီးနေပြီ။ လူကလည်း ကျနော်နဲ့အပြိုင် ဝလာတယ်။

တရက်မှာ ကျနော်ရုံးမှာ အိမ်သာတက်ရင်း ပိုက်ဆံအိတ်ဖွင့်ပြီး ဘာရယ်မဟုတ် လှန်လှောနေတုန်းမှာ သူ့ဓါတ်ပုံကလေးကို ပိုက်ဆံအိတ်ထဲမှာ တွေ့ရတယ်။ ဒါနဲ့ ကျနော်လည်း သူ့ဓါတ်ပုံကို ခဏထုတ်ကြည့်ပြီး အိတ်ထဲပြန်ထည့်မယ် အလုပ်မှာ ဓါတ်ပုံက မတော်တဆ ပြုတ်ကျပြီး အိမ်သာအိုးထဲအထိ ကျသွားတယ်။ ပြန်ကောက်လို့လည်း မဖြစ်နိုင်တော့တာမို့ စိတ်ညစ်ညစ်နဲ့ ရေဆွဲချလိုက်ရတယ်။ အဲသည်ကိစ္စ သူ့ကိုတော့ ပြန်မပြောဖြစ်တော့ပါဘူး။

နောက် တနှစ်လောက်ကြာတော့ ကျနော် မဒမ်ပေါနဲ့ လက်ထပ်တယ်။ သူကလည်း စကောလားရှစ် ထပ်ရလို့ ကနေဒါနိုင်ငံမှာ ပီအိတ်ခ်ျဒီ သွားတက်တယ်။ ကျနော်တို့တွေ အဆက်အသွယ် မပြတ်ဘူး။ သူက ကျနော်တို့လင်မယားကို ကနေဒါ ပြောင်းခဲ့ဖို့ အမြဲ တိုက်တွန်းတယ်။ ကျနော်တို့ကလည်း သမီးကိုမွေးတာ၊ မဒမ်ပေါကျောင်းဆက်တက်တာ၊ ကျနော် အချိန်ပိုင်းကျောင်းတက်တာ စတာတွေနဲ့ အလုပ်ရှုပ်နေတဲ့အလျောက် သူ့တိုက်တွန်းချက်ကို သဘောကျရုံကလွဲလို့ အကောင်အထည် မဖော်ဖြစ်ခဲ့ဘူး။

ဒီလိုနဲ့ တရက်မှာ သူ့ဆီက စိတ်မကောင်းစရာ သတင်းကို ကြားရတာပဲ။ သူ့မှာ သွေးကင်ဆာ ဖြစ်နေတယ်ဆိုတဲ့အကြောင်း။ ဒါပေမယ့် ရိုးတွင်းချဉ်ဆီ လှူဒါန်းသူရှိလို့ အစားထိုးကုသတာ အောင်မြင်တယ်လို့ ဝမ်းသာစရာ ကြားရတယ်။

အဲဒီအတောအတွင်းမှာ သူနဲ့ ဖုန်း မကြာမကြာ ပြောဖြစ်တယ်။ ကျနော်တို့ လင်မယားနှစ်ယောက်စလုံးနဲ့ ခင်မင်သူဖြစ်တဲ့အလျောက် သူက ကျနော်တို့နဲ့ ဖုန်းပြောရတာကို ဝမ်းသာပုံရတယ်။ ကျနော်တို့လင်မယားလည်း အမြဲလိုလို ရွှတ်နောက်နောက် ပြောတတ်တော့ သူကလည်း ဟီးဟီးဟားဟားနဲ့ပေါ့။ ဒါပေမယ့် နောက်မကြာခင်မှာ မထင်မှတ်တဲ့ အခြားရောဂါတခုနဲ့ သူဆုံးသွားတယ်။ စားသောက်ဆိုင်တခုမှာ ညစာစားပြီး Wash room ကို အသွားမှာ stroke နဲ့ လဲကျပြီး ကွယ်လွန်သွားတယ်တဲ့။

အဲဒီသတင်းကြားကာစက ကျနော် သူ့ဓါတ်ပုံကလေး ပြုတ်ကျသွားတာကို ပြန်သတိရပြီး စိတ်ထဲမှာ မသိုးမသန့်နဲ့ အပြစ်ရှိသလိုလိုတောင် ခံစားမိသေးတယ်။

ငယ်ငယ်ရွယ်ရွယ်နဲ့ ကွယ်လွန်သွားပြီဖြစ်တဲ့ လူတော်လူကောင်းတယောက်၊ မိတ်ဆွေကောင်းတယောက်ကို နှမြောတသ သတိရမိပါတယ်။

တိတ်ဆိတ်ခြင်းကြောင့် ခရုကြေ

ကျောင်းတုန်းက အပေါင်းအသင်းတွေအကြား တခုခုကို အသည်းအသန် ဆွေးနွေးကြတဲ့အခါ အခြားတယောက်ယောက်ကို (ပျော်စေပျက်စေ) နှိပ်ကွပ်ချင်ပြီဆိုရင် ပြောတတ်တဲ့ သူငယ်ချင်းတယောက်ရဲ့ လက်သုံးစကားတခုရှိတယ်။

“ပြောပါစေ… ပြောပါစေ။ သူ့ဉာဏ်လေး ရှိသလောက် ပြောရှာတာ။ လွှတ်ပေးထားလိုက်”

အဲသလို ပြောလိုက်ပြီဆိုရင် အပြောခံရသူကလွဲလို့ အားလုံးက ရယ်လိုက်ကြတာပဲ။ အပြောခံရသူမှာတော့ အောင့်သက်သက်နဲ့ နည်းနည်း အခံရခက်တာပေါ့။

တကယ်တော့…. အဲသည်စကားဟာ တော်တော်မှန်ပါကလားလို့ အခုတွေးမိပါတယ်။ ဘယ်သူမဆို သူသိသလောက် (သူ့ဉာဏ်လေးရှိသလောက်)သာ ပြောနိုင်ကြတာပါလား။

တထွာလောက်ပဲ သိတဲ့သူက တတောင်လောက် ပြောချင်လို့ မရဘူး။ ဘယ်နည်းနဲ့မှ မဖြစ်နိုင်ဘူး။ လက်တွေ့စမ်းသပ်လို့ရပါတယ်။ ကိုယ်မသိတဲ့ကိစ္စတခုကို ခေါင်းစဉ်တပ်ပြီး စာရွက်ပေါ်မှာ ချရေးကြည့်ပါ။ ဥပမာ… ဂျက်အင်ဂျင် အကြောင်း ဆိုပါတော့။ ဂျက်အင်ဂျင် အကြောင်း နကန်းတလုံးမသိတဲ့လူဟာ စာရွက်ပေါ်ကို စကားလုံးတလုံး ချရေးနိုင်ဖို့တောင် မလွယ်ပါဘူး။ နည်းနည်းသိတဲ့လူက နှစ်ကြောင်းသုံးကြောင်း ရေးပြနိုင်မယ်။ များများသိတဲ့လူက များများရေးနိုင်မယ်။ ခရေစေ့တွင်းကျသိသူက စာအုပ်စာတမ်းပေါင်းများစွာ ရေးထုတ်နိုင်မယ်။

ကိုယ်မသိတဲ့ကိစ္စကို ခပ်တည်တည်နဲ့ ဖြီးဖြန်းပြီး ပြောမယ်ဆိုရင် တခါတလေ စွတ်ရွတ် မှန်သွားတတ်တာကလွဲလို့ များသောအားဖြင့် မှားတတ်ကြပါတယ်။ ရှေ့နောက်မညီတွေ ဖြစ်ကုန်ကြတယ်။ အိုးနင်းခွက်နင်းတွေ ဖြစ်သွားတတ်တယ်။ ကပေါက်တိ ကပေါက်ချာတွေလည်း ကြုံရတတ်တယ်။ တနည်းပြောရမယ်ဆိုရင် တကယ် မသိဘဲနဲ့ ရမ်းဖြီးနေတယ်ဆိုတဲ့အကြောင်း မကြာခင်မှာဘဲ ပေါ်သွားတတ်တယ်။

ဒီတော့ အမှားနည်းချင်ရင် ကိုယ်တကယ်မသိတဲ့အကြောင်းတွေကို သိသလိုလို တတ်ယောင်ကားလုပ်ပြီး ပြောတာမျိုးတော့ ရှောင်ကြဉ်ဖို့ လိုပေမပေါ့။ ဆိုလိုတာက ကိုယ့်ကိုယ်ကို ရိုးသားဖို့ အဓိက လိုလိမ့်မယ်။

ဒါပေမယ့် နဂိုကတည်းက အမှားကြီးကိုပဲ အမှန်ထင်နေတဲ့အလျောက် ရိုးရိုးသားသား မှားပြောနေမိတာမျိုးတော့ သူသူကိုယ်ကိုယ် ဖြစ်တတ်ကြပါတယ်။ အဲလိုအခါမျိုးမှာ အမှန်ကို သိတဲ့လူက ကြားသွားရင် ကိုယ့်မှားကွက်ကို လာထောက်ပြလာပါလိမ့်မယ်။နှုတ်ဆိတ်နေသူအဖို့မှာတော့ ဒီအခွင့်အရေးမျိုးကို မကြုံရဘဲ အမှားကြီးအတိုင်းပဲ တသက်လုံး သေရာပါသွားနိုင်တယ်။

ခံယူသူရဲ့ ဉာဏ်အတိမ်အနက်၊ ခံယူသူရဲ့ အကျင့်စရိုက်၊ စိတ်နေစိတ်ထားတွေအပေါ်မူတည်လို့ အောက်ပါအတိုင်း တုံ့ပြန်ပုံတွေ အမျိုးမျိုး ဖြစ်လာတတ်ကြတယ်။

(၁) အမှားကို ပြောနေရာက ထောက်ပြလာတဲ့အခါ အမှန်ကို မြင်သွားတယ်။ ဒါကြောင့် ထောက်ပြမှုကို လက်ခံတယ်။ ထောက်ပြသူကို သိပ်ကျေးဇူးတင်တယ်။ ဒီလူမျိုးက ရှားတယ်။

(၂) အမှန်ကိုတော့ မြင်သွားတယ်။ ဒါပေမယ့် (လူ့သဘာဝ တလွဲမာနကြောင့်) ထောက်ပြမှုကို ချက်ချင်း တထိုင်တည်းနဲ့ လက်ခံလိုက်ဖို့ ဝန်လေးနေတတ်တယ်။ သွေးအေးသွားတဲ့အခါကျမှ တဖြည်းဖြည်းနဲ့ လက်ခံသွားတတ်ကြတယ်။ ဒီလူမျိုးတွေကိုတော့ အလွယ်တကူ မနာယူတတ်သူတွေလို့ သတ်မှတ်လို့ ရပါတယ်။ ဒါမျိုးက သူသူကိုယ်ကိုယ် အများစု ဖြစ်တတ်ကြတဲ့သဘော။

(၃) အမှန်ကိုတော့ မြင်သွားတယ်။ ဒါပေမယ့် ကိုယ်မှားပါတယ်ဆိုတာကို ဘယ်တော့မှ ဝန်မခံလိုတဲ့အတွက် (မဟုတ်တဲ့ဘက်မှာ မာန်မချချင်တဲ့အလျောက်) မူလ အမြင်မှားကိုပဲ သေတပန် သက်တဆုံး တွယ်ဖက်ပြီး သွားတတ်ကြသူတွေလည်း ရှိတယ်။ ယုံကြည်ချက် ပြင်းထန်တယ်လို့ နာမည်တပ်ချင်လည်း တပ်လို့ရပေမယ့် ဒီလူမျိုးတွေကိုတော့ အသိခေါက်ခက် အဝင်နက်တယ်လို့ ဆိုနိုင်ပါတယ်။

(၄) ထောက်ပြပေမယ့်လည်း ဉာဏ်တိမ်တဲ့အလျောက် အမှန်ကို မမြင်နိုင်သေးဘူး။ အမှန်ကို မမြင်တဲ့အလျောက် အမှားကိုပဲ ဆက်လက်စွဲကိုင်ထားတတ်ကြတယ်။ ဒီလူမျိုးတွေကတော့ အရေအတွက် အများဆုံးပဲ။ မောဟဖုံးတယ်ဆိုတာ ဒါမျိုးဖြစ်မယ်။ ဒါပေမယ့် အမှန်ကို မြင်နိုင်လောက်တဲ့အထိ ဉာဏ်ရည်မြင့်တက်လာပြီးဆိုရင် အမှန်ကို လက်ခံသွားတတ်ကြတယ်။

ဒါတွေက မှားကွက်ကို ထောက်ပြလာတဲ့အခါ တုန့်ပြန်ပုံ အမျိုးမျိုးကို (ကျနော့် ဉာဏ်လေးရှိသလောက်း-) တွေးကြည့်ပြီး ပြောပြတာပါ။

မြန်မာစကားမှာ “အသံကြောင့်ဖားသေ” ဆိုတဲ့ စကားရှိတယ်။ မူလကတော့ သူ့နေရာနဲ့သူ သုံးစွဲဖို့ ဖြစ်လာတဲ့ စကားပါ။ ဒါပေမယ့် လက်တွေ့မှာတော့ အဲဒီစကားကြီးကို နေရာတကာမှာ တလွဲသုံးနေကြတာကို မြင်ရတာ စိတ်ပျက်စရာပါ။ အသံမထွက်တဲ့ ခရုတွေလည်း တက်နင်းခံရလို့ ဖောင်းကနဲကွဲကြေပြီး သေကြရတာ အများအပြားပါ။ ဒီတော့ “တိတ်ဆိတ်ခြင်းကြောင့် ခရုကြေ” ဆိုတဲ့ စကားပုံလည်း မြန်မာစကားမှာ အသစ်ထွင်သင့်ပြီလို့ ထင်ပါတယ်။

“ထဲထဲဝင်ဝင် မသိရင် မပြောနဲ့” ဆိုတဲ့ အယူအဆဟာ မှားယွင်းနေတယ်။ လူတိုင်းဟာ အလုံးစုံကို သိမြင်နိုင်တဲ့ ဉာဏ်တော်ကို ပိုင်ဆိုင်ထားကြတာမဟုတ်။ ဒီတော့ သိသလောက်ကို သိတဲ့အတိုင်း လွတ်လွတ်လပ်လပ် ပြောဆိုစေတဲ့ အလေ့အထကို မွေးမြူသင့်ပြီ၊ အားပေးအားမြှောက်ပြုသင့်ပြီလို့ တွေးမိပါတယ်။ စာမတတ်ရင် လမ်းမှာဖတ် ဆိုသလို ပိုသိတဲ့လူက ထောက်ပြကြပေါ့။ ဒါပေမယ့် ထောက်ပြတဲ့နေရာမှာ ငါထောက်ပြတာမှ အမှန်ပဲ၊ ငါပြောတာကိုပဲ ချက်ချင်းလက်ခံရမယ်လို့ အတင်းအဓမ္မ လက်မခံခိုင်းကြနဲ့။ စောစောက ပြောခဲ့သလို လူတွေဟာ အမှန်ကို မြင်သွားရင်တောင်မှ တထိုင်တည်းနဲ့ လက်ခံလိုက်ဖို့ ခဲယဉ်းကြတယ်။ အတင်းအဓမ္မလက်ခံခိုင်းသူတွေဟာ အမှန်ကို ထောက်ပြချင်တဲ့စေတနာထက် ကိုယ့်ဆန္ဒကို ရှေ့တန်းတင်တာ များနေပါတယ်။ သတိချပ်သင့်တာက ထောက်ပြသူကိုယ်တိုင်လည်း မှားနိုင်ပါသေးတယ်။

နောက်စကားတခုက “လည်လွန်းတဲ့ဘီး ချေးနင်းတတ်တယ်” ဆိုတဲ့ စကားပါ။ ရပ်နေတဲ့ဘီးတွေလည်း ခွေးသေးပန်းတာကို ခံရတတ်ပါတယ်။ ယုတ်မာတဲ့စိတ်နဲ့ မယှဉ်ဘူးဆိုရင် လည်လည်ပတ်ပတ်ရှိတာဟာ ကောင်းပါတယ်။ “ရိုးတယ်” ဆိုတဲ့စကားမှာ “ရိုးသား”တာကို ဆိုလိုတာဆိုရင် ကောင်းတဲ့ဂုဏ်ပုဒ်ဖြစ်ပြီး “ရိုးအ” တာကို ဆိုလိုတာဆိုရင်တော့ ညံ့ဖျင်းတဲ့ အဓိပ္ပါယ်သက်ရောက်ပါတယ်။

နောက်ဆုံးတခုက “ကြောက်တတ် ရန်ကင်း” ဆိုတဲ့ စကားပါ။ မူလဇစ်မြစ်ကတော့ မကောင်းမှုပြုရမှာကို ကြောက်တတ်ဖို့ ဆုံးမချင်တဲ့ စကားဖြစ်နိုင်ပါတယ်။ ဒါပေမယ့် ဘယ်ကိစ္စမဆို ကြောက်တတ်ရင်ပဲ ဘေးရန်ကင်းဝေးပြီး အေးချမ်းသာယာစွာ နေကြရတယ်လို့ အများစုက အဓိပ္ပါယ်ဖွင့်နေကြဟန်တူတယ်။ အဲဒီ အဓိပ္ပါယ်ဖွင့်ဆိုမှု လွဲမှားနေတာကို အကြောက်တရားကြီးစိုးတဲ့ လူ့အဖွဲ့အစည်းတွေမှာ အာဏာရှင်တွေ ပြုသမျှနုနေရတဲ့အဖြစ်၊ ရန်သူမျိုးငါးပါးရဲ့ နှိပ်စက်မှုဒဏ်ကို အကြီးအကျယ် ခံစားရတဲ့အဖြစ်၊ ကပ်ကြီး သုံးပါးစလုံး ဆိုက်နေတဲ့ အဖြစ်အပျက်တွေကို ကြည့်ရင်း ထင်ရှားလာပါတယ်။

ငှက်ကုလားအုပ်တွေဟာ အန္တရာယ်နဲ့ ပက်ပင်းကြုံတဲ့အခါ သဲထဲကို ခေါင်းထိုးဝှက်ကြသတဲ့။ ရန်သူကို သူတို့မမြင်ရဘူးဆိုရင် ရန်သူကလည်း သူတို့ကို မမြင်တော့ဘူးလို့ ယူဆတဲ့အတွက်ကြောင့်ပါတဲ့။ ငှက်ကုလားအုပ်တွေ တကယ်အဲသည်လို လုပ်မလုပ် ကျနော်မသိပါဘူး။ ဒါပေမယ့် ပြဿနာတရပ်ကို ရင်ဆိုင်ရမှာ၊ ဖြေရှင်းရမှာ ကြောက်လို့ ရှောင်ပုန်းနေတတ်သူတွေကို သဲထဲ ခေါင်းထိုးဝှက်ထားတဲ့ ငှက်ကုလားအုပ်တွေနဲ့ နှိုင်းတာတော့ သဘောကျမိပါတယ်။

ဒီတော့ ကိုယ့်အမြင်ကို ကိုယ်သိသလို ရိုးရိုးရှင်းရှင်းပဲ ပြောကြဆိုကြရအောင်။ မှားသွားတော့လည်း ဘာအရေးလဲ။ အမှန်ကို ထောက်ပြလာလို့ ကိုယ်ကလည်း မြင်နိုင်တဲ့ ဉာဏ်အဆင့်အတန်းရောက်နေရင် လက်ခံလိုက်တာပေါ့။ မာနကြောင့် ချက်ချင်း လက်မခံနိုင်ရင်လည်း အသာငြိမ်နေလိုက်။ နောက်တော့ သွေးအေးသွားတော့မှ ဖြည်းဖြည်းချင်း လက်ခံတာပေါ့။ ကိုယ့်ကို မှားပါတယ်လို့ အတင်းအဓမ္မဝန်ခံခိုင်းလာတဲ့လူတွေရှိရင် သူတို့ (ဒေါသ)ကို ဆွချင်တဲ့အခါ ဝန်မခံနဲ့။ အသာ ငြိမ်နေလိုက်။ ကိုယ့်အမှားကို ချောင်ပိတ်ဖမ်းမယ့်လူတွေရှိလာရင် (သူတို့ကို မချေပနိုင်တဲ့အခါ) တချို့ကွန်မင့်ရေးသူတွေလုပ်သလို ရှောင်ပြေးလိုက်။ ဝေဝေဝါးဝါး လုပ်ပစ်လိုက်။ ကိုယ်မဖြေနိုင်တဲ့ မေးခွန်းကို မေးလာရင် မဖြေနဲ့ပေါ့။ ငြိမ်နေလိုက်။ (ကောင်းတဲ့ အကျင့်တော့ မဟုတ်ပါဘူး။ ကောင်းတဲ့အကျင့်ကတော့ ရိုးသားတာက အကောင်းဆုံးပါ။)

ဒါပေမယ့် အကျိုးသင့်အကြောင်းသင့် မပြောနိုင်လို့ အသားလွတ်ဆဲရေးတာမျိုးတော့ မလုပ်မိအောင် တတ်နိုင်သမျှ သတိထားရမယ်။ ဘာကြောင့်လဲဆိုတော့ အသားလွတ် ဆဲဆိုခြင်းဆိုတာ အကျိုးသင့်အကြောင်းသင့် ပြောနိုင်တဲ့ အစွမ်းအစ မရှိတော့လို့ “ကျနော်(ကျမ)တော့ဖြင့် ပက်ပက်စက်စက်ကြီးကို ရှုံးနိမ့်သွားပါပြီ”ဆိုတဲ့အကြောင်း တလောကလုံးသိအောင် အောက်တန်းကျစွာ ကြေညာလိုက်တဲ့ အဓိပ္ပါယ်မျိုး ဖြစ်နေလို့ပါပဲ။

မှားမှားမှန်မှန် တဖက်သားကို လွတ်လပ်စွာ ပြောဆိုခွင့်ပေးတဲ့၊ သူတပါးရဲ့ ချေပခွင့်ကို မပိတ်ပင်တဲ့ အလေ့အထလေးကို ဘယ်သူမမွေးမွေး ကိုယ့်ဘလော့ဂ်မှာ ကိုယ့်ဘာသာ မွေးမြူမယ်လို့ စိတ်ပိုင်းဖြတ်ထားပါတယ်။

ပဲပုံအသာဟစ်သံ

(၁) ပဲပြုတ်နဲ့နံပြား

“ကြိုင်ရေ…. ပဲပြုတ်နဲ့ နံပြားလေး စားချင်လိုက်တာ”

နောင်အနှစ် ၂၀ လောက်ကြာလို့ ကြပ်ပြေးက ဗိုလ်သန်းရွှေရဲ့ နေအိမ်မှာ သွားရှာကြည့်ကြရင် ဗိုလ်သန်းရွှေရဲ့ အလုပ်စားပွဲမှာ ဒီလို စာတိုမျိုးလေး မတွေ့ရဘူးလို့ ဘယ်သူပြောနိုင်မလဲ။ ဘယ်လောက်ပဲ အကောင်းစားတွေကို တနင့်တပိုး စားနေရတယ်ဆိုဆို…. သူလည်းလေ လောကီသားပေမို့ တခါတလေ ပဲပြုတ်နဲ့ နံပြားလေး တောင့်တချင်လည်း တောင့်တပေမပေါ့။ (ပူးတွဲဖတ်ရှုရန်။.............။ Hero (Rita) )

(၂) ပုံသေ စွဲမှတ်သူများ

လူဆိုးဆိုရင် အမြဲတမ်း ဆိုးတာတွေကို ပြုနေသူလို့ ထင်မှတ်တတ်ကြပြီး လူကောင်းဆိုရင်လည်း တလျှောက်လုံး ကောင်းတာတွေချည်း ပြုနေတတ်သူ၊ ခြောက်ပြစ်ကင်း သဲလဲစင်ကလေးတွေလို့ ထင်မှတ်တတ်ကြပြန်တယ်။ တသက်လုံး ကောင်းလာတဲ့လူပေမယ့်လည်း တဒင်္ဂအခိုက်အတန့်လေးမှာ စိတ်လိုက်မာန်ပါ (သို့မဟုတ်) အမှတ်မထင် လုပ်လိုက်မိတာလေးတခုကြောင့် အကြီးအကျယ် အမှားကြီးတခုကို ကျူးလွန်မိသွားတာလည်း ရှိနိုင်သလို တသက်လုံး ဆိုးယုတ်တာတွေ ပြုလုပ်ခဲ့သူပေမယ့်လည်း တခါတရံမှာ စိတ်စေတနာအရင်းခံနဲ့ ကောင်းတဲ့လုပ်ရပ်ကို ပြုမူလိုက်တာမျိုးလည်း ရှိတတ်ပါသေးတယ်။

(၃) အနိုင်လိုချင်စိတ် ပြင်းပြသူများ

လူတဖက်သားကို အတင်းအကြပ် ဖိအားပေးပြီး တောင်းပန်ခိုင်းချင်တာမျိုးတွေကိုလည်း တွေ့နေရတယ်။ လူဆိုတာ သူ့ဘာသာ အမှားကို သိလို့ သူ့ဆန္ဒအလျောက် တောင်းပန်မှ အဓိပ္ပါယ်ရှိမှာပေါ့။ အကြပ်ကိုင်လွန်းလို့ မလွှဲသာမရှောင်သာ ဝန်ချတောင်းပန်တာကို လိုချင်နေသူတွေဟာ ရူးနှမ်းနေသူတွေလား၊ ဒါမှမဟုတ် အနိုင်လိုချင်စိတ် ပြင်းပြသူတွေပဲ လားလို့ တွေးတော စဉ်းစားမိပါတယ်။ အဲဒီလူစားမျိုးတွေဟာ တဖက်က ဝန်ချတောင်းပန်လာသည့်တိုင်အောင် အမှန်တကယ် ခွင့်မလွှတ်နိုင်သူတွေ ဖြစ်နေတတ်ပြန်ပါတယ်။

(၄) သာသနာ့သူရဲကောင်းကြီးများ

အွန်လိုင်းပေါ်မှာ ငါတို့ ကိုးကွယ်တဲ့ ဘာသာတရားကို လာမထိနဲ့ဟေ့လို့…ဆိုပြီး ဒေါနဲ့မောနဲ့ အသည်းအသန် ငြင်းခုံ ကာကွယ်နေတဲ့ သာသနာ့ သူရဲကောင်းကြီးတွေကို စိတ်ပျက်စဖွယ် တွေ့ရပါတယ်။ အဲဒီ သူရဲကောင်းကြီးတွေအနေနဲ့ ဘာသာတရားရဲ့ အဆုံးအမကို ကိုယ်တိုင်လိုက်နာကျင့်ကြံပြီး လောဘ၊ ဒေါသ၊ မောဟတွေ လျှော့နိုင်ကြပါစေလို့ ဆန္ဒပြုမိပါတယ်။

(၅) ဟစ်တက်တဲ့ပို့စ်တွေ

မြန်မာဘလော့ဂ်ဖတ်ပရိသတ်ဟာ အငြင်းပွားဖွယ်ရှိတဲ့ပို့စ် (Controversial posts)တွေကို သည်းခြေကြိုက်ကြောင်း Site meter ကတဆင့် သတိထားမိပါတယ်။ ဘလော့ဂ်မှာ ဟစ်တက်ချင်တယ်ဆိုရင်ဖြင့် အငြင်းပွားရမယ့် ပို့စ်တွေသာ ဖိရေးပေတော့လို့ တိုက်တွန်းရမလို ဖြစ်နေတယ်။

(၆) သံတူကြောင်းကွဲ (ဗိုင်းကောင်းကျောက်ဖိများ မဖတ်ရ)

မြန်မာပြည်က လင်မယားနှစ်ယောက်ဟာ မအိပ်ခင် ဖိုမ ဆက်ဆံကြတဲ့အခါ မိန်းမဖြစ်သူက ငှက်ပျောတုံးကြီးလို ငြိမ်သက်နေတော့ ယောက်ျားဖြစ်သူဟာ စိတ်အလိုမကျလို့ ကာမဆန္ဒ ပြည့်ဝရှာပုံလည်း မပေါ်ဘူးပေါ့။ အဲဒါနဲ့ ယောက်ျားဖြစ်သူက သူ့မိန်းမကို ဒီလို ပြောသတဲ့။

“မိန်းမရယ်… နောက်တခါကျရင် ငြိမ်မနေပါနဲ့။ ပါးစပ်ကလည်း ညည်းစမ်းပါ”….. လို့ တောင်းဆိုသတဲ့။ ဘိုလို ပြောရရင်တော့ Please moan… လို့ ပြောတာ နေမှပေါ့နော်။

မိန်းမဖြစ်သူကလည်း နောက်တခါလည်းကျရော သူ့ယောက်ျားအလိုအတိုင်း ဟောသည်လို အော်ညည်းရှာပါသတဲ့။

“ဆန်အိုးထဲမှာလည်း ဆန်မရှိတော့ဘူးတော့်။ ဆီကလည်း ကုန်တော့မယ်။ ပိုက်ဆံကလည်း တပြားမှ မကျန်တော့ဘူး။ ”……… တဲ့။

အင်း…. ဗမာစကား၊ ဗမာစကား… သံတူကြောင်းကွဲတွေနဲ့တော့ ခက်သေးတယ်။

(မှတ်ချက်။...........။ ပို့စ်ခေါင်းစဉ်က ဘာကြီးလဲလို့ ခေါင်းခြောက်ခံမနေပါနဲ့။ ကဗျာဆရာ ကိုစောဝေ (အာဏာရူးကြီးမှူးကြီးသန်းရွှေ ကဗျာဆရာ) ရဲ့ စတိုင်လ်ကို အားကျလို့ ခေါင်းစဉ်ငယ်ခြောက်ခုက ရှေ့ဆုံးစာလုံးတွေကို စဉ်ထားတာ။)

ရင်ကို လာမှန်သော ဗလောင်းဗလဲ ခြောက်ခု

ပိတ်ရက်မှာ တောင်တွေးမြောက်တွေးနဲ့ စိတ်ထဲဝင်လာတဲ့ ဗလောင်းဗလဲ ဖြစ်ရပ် ခြောက်ခုကို နံပါတ်စဉ်အလိုက် ရေးပြချင်ပါတယ်။ တချို့သော ဗလောင်းဗလဲဖြစ်ရပ်များဟာ လူအများရဲ့ ဘဝကို ထိခိုက်စေပြီး တချို့ဗလောင်းဗလဲကတော့ ကျနော့်တယောက်တည်းရဲ့ စိတ်ကို ထိခိုက်စေရုံမျှသာ တတ်နိုင်ပါတယ်။

(၁) နအဖရဲ့ အာဏာလွှဲပေးမယ်ဆိုတဲ့ ကတိ

ကျနော့်ဘဝမှာ ဘယ်တော့မှ မေ့ပျောက်လို့ ရမှာမဟုတ်တဲ့ ကြုံဖူးသမျှ အကြီးမားဆုံးသော ဗလောင်းဗလဲကြီး တခုပါ။ (၈ ရက် ၈ လ ၁၉၈၈) ရှစ်လေးလုံး အရေးတော်ပုံကြီးကို လက်နက်အင်အားသုံး သွေးထွက်သံယို အကြမ်းဖက်နှိမ်နင်းပြီး အာဏာသိမ်းခဲ့တဲ့ စစ်အစိုးရဟာ ပါတီစုံဒီမိုကရေစီရွေးကောက်ပွဲကို ခေါ်ပေးမယ်ဖြစ်ကြောင်း၊ ရွေးကောက်ပွဲပြီးတာနဲ့ အနိုင်ရတဲ့ ပါတီကို အာဏာလွှဲပေးပြီး စစ်တန်းလျားကို ချက်ချင်းပြန်သွားမှာဖြစ်ကြောင်း ကတိကဝတ်တွေ ပေးခဲ့ပါတယ်။ နောက်တော့ တတိုင်းပြည်လုံးထောက်ခံမှုနဲ့ အမျိုးသားဒီမိုကရေစီအဖွဲ့ချုပ်က ရွေးကောက်ပွဲမှာ အပြတ်အသတ် အနိုင်ရတဲ့အခါ စစ်ဗိုလ်ချုပ်ကြီးများဟာ သူရဲဘောကြောင်စွာ ကိုယ့်တံတွေးကိုယ်ပြန်မျိုပြီး အာဏာလွှဲပေးဖို့ ငြင်းဆန်ခဲ့ကြပါတယ်။ ဒီဗလောင်းဗလဲကြောင့် လူပေါင်းများစွာရဲ့ ဘဝတွေကို ဆိုးဝါးတဲ့ အကျိုးသက်ရောက်ခဲ့တယ်ဆိုတာ အထူးပြောစရာလိုမယ်မထင်ပါဘူး။

(၂) ကိုပေါ ကန့်ကွက်မဲပေးခြင်း

နံပါတ်နှစ်ကတော့ ကျနော်ကိုယ်တိုင်ရဲ့ ဗလောင်းဗလဲပါ။

အဲဒီဗလောင်းဗလဲအတွက် အခုထက်ထိ စိတ်ထဲမှာ တွေးမိတိုင်း မခံချိမခံသာဖြစ်ရပါတယ်။ ဘာလဲဆိုတော့ နအဖ စစ်အစိုးရရဲ့ ၂၀၀၈ ဖွဲ့စည်းပုံအတည်ပြုရေးအတွက် လူထုဆန္ဒခံယူပွဲလုပ်တဲ့အခါ ကျနော့်ရဲ့ မူလဆန္ဒက အဲဒီဆန္ဒခံယူပွဲကို သပိတ်မှောက်ဖို့ ဆန္ဒပါ။ ကိုယ်တိုင်လည်း မဲသွားမပေးဘူး။ သူများတွေကိုလည်း မဲမပေးကြဖို့ တိုက်တွန်းမယ်ပေါ့။ သပိတ်မှောက်ဖို့ ဆန္ဒဖြစ်ရခြင်းရဲ့ အကြောင်းတွေထဲမှာ မဲသွားပေးခြင်းအားဖြင့် နအဖအစိုးရရဲ့ လမ်းပြမြေပုံကို တရားဝင်အောင် လုပ်ပေးရာ ကျသွားမှာကို စိုးရိမ်မိတာကတကြောင်း၊ သူတို့ ရဲ့ ဖွဲ့စည်းပုံကို လုံးဝမထောက်ခံနိုင်တာကတကြောင်း၊ နောက်ဆုံးအနေနဲ့ ဒီဆန္ဒခံယူပွဲဟာ ပွင့်လင်းမြင်သာရှိမှုနဲ့ တရားမျှတမှု လုံးဝရှိမှာ မဟုတ်တာကို သိနေတာကတကြောင်း စတဲ့ အကြောင်းတွေ ပါဝင်ပါတယ်။ ဒါပေမယ့် ဆန္ဒခံယူပွဲ နီးလာတဲ့အချိန်မှာ အမျိုးသားဒီမိုကရေစီအဖွဲ့ချုပ်က သွားရောက် ကန့်ကွက်မဲ ထည့်ကြဖို့ တိုက်တွန်းလာတဲ့အခါ အဖွဲ့ချုပ်ရဲ့ မူဝါဒကို ဝန်းရံရမယ်ဆိုတဲ့အသိနဲ့ ကိုယ့်ရဲ့ မူလဆန္ဒနဲ့ကြားမှာ မပြတ်မသား လွန်ဆွဲနေခဲ့ပါတယ်။ နောက်ဆုံးတော့ ကန့်ကွက်မဲသွားထည့်မိပါတယ်။ အဲဒီအတွက် နောင်တရမိပြီး စိတ်ထဲမှာ အင်မတန်လည်း မခံချိမခံသာဖြစ်ရပါတယ်။ မိမိရဲ့ မပြတ်သားမှုအတွက် အဖွဲ့ချုပ်ကို လက်ညှိုးထိုးတာမဟုတ်ပါ။ လူတွင်ပါလို့ နွားကျားကိုက်ဆိုသလို မိမိဘာသာ ဆုံးဖြတ်ချက် မပြတ်သားခဲ့ဘဲ ဗလောင်းဗလဲလုပ်ခဲ့မိတာကို ဆိုလိုခြင်းမျှသာပါ။ နောင်ဆိုရင် ဘယ်သူတွေ ဘာပြောပြော ကိုယ့်ဆန္ဒအတိုင်းပဲ ကိုယ်လုပ်ဖို့ အားခဲထားပါတယ်။ ကျနော့်ရဲ့ ဗလောင်းဗလဲလုပ်ရပ်ရဲ့ အကျိုးဆက်အတွက် တခြားသူတွေကို ထိခိုက်ကောင်း ထိခိုက်နိုင်ပါတယ်။ ဒါပေမယ့် အခုအခြေအနေမှာတော့ ကျနော့်စိတ်ကို ပြန်လည်ထိခိုက်စေခြင်းက ပိုပါတယ်။

(၃) ဦးခင်မောင်ဆွေ၊ ဒေါက်တာသန်းငြိမ်း၊ ဦးစိန်လှဦးနဲ့ ရွှေဂုံတိုင်ကြေညာစာတမ်း

ဧရာဝတီအွန်လိုင်းမဂ္ဂဇင်းက အင်တာဗျူးမှာ ဒေါက်တာသန်းငြိမ်းက ပြောတယ်။ ရွှေဂုံတိုင်ကြေညာစာတမ်းဆိုတာ တကယ်တော့ သူရယ်၊ ဦးခင်မောင်ဆွေရယ်၊ နောက်ပြီးတော့ ဦးစိန်လှဦးရယ် အဓိက ရေးဆွဲခဲ့တာပါတဲ့။ အဲဒီအဆို ဟုတ်မဟုတ်ကိုတော့ အမျိုးသားဒီမိုကရေစီအဖွဲ့ချုပ်က တာဝန်ရှိသူတွေကပဲ အတည်ပြုနိုင်မှာပါ။ ရွှေဂုံတိုင်ကြေညာစာတမ်းမှာ ၁၉၉၀ ရွေးကောက်ပွဲရလဒ်ကို နအဖအနေနဲ့ အသိအမှတ်ပြုဖို့၊ ဒေါ်အောင်ဆန်းစုကြည်နှင့်တကွ နိုင်ငံရေးအကျဉ်းသားအားလုံးကို ပြန်လွှတ်ပေးဖို့၊ ၂၀၀၈ ဖွဲ့စည်းပုံမှာပါတဲ့ ဒီမိုကရေစီနဲ့မညီတဲ့ အချက်တွေကို ပြန်လည်ဆွေးနွေးညှိနှိုင်းပြီး ပြင်ဆင်ပေးဖို့၊ ၂၀၁၀ ရွေးကောက်ပွဲကာလအတွင်းမှာ ပြည်တွင်းပြည်ပက လွတ်လပ်တဲ့ စောင့်ကြည့်လေ့လာသူများကို ခွင့်ပြုဖို့ စတဲ့ တောင်းဆိုချက်တွေကို လိုက်လျောပါမှ အမျိုးသားဒီမိုကရေစီအဖွဲ့ချုပ်အနေနဲ့ ရွေးကောက်ပွဲဝင်ဖို့ စဉ်းစားမယ်လို့ ဆိုထားပါတယ်။ အခုအဲဒီအချက်တွေအားလုံးကို နအဖက ဘာတခုမျှ မလိုက်လျောတဲ့အပြင် ရွေးကောက်ပွဲဥပဒေတွေထုတ်ပြီး ထပ်မံဖိနှိပ်လာတဲ့အတွက် အဖွဲ့ချုပ်အနေနဲ့ ရွေးကောက်ပွဲမှာ ဝင်မပြိုင်ဖို့၊ တရားဝင်ပါတီအဖြစ် မှတ်ပုံမတင်ဖို့ ဆုံးဖြတ်ခဲ့ပါတယ်။

အဲဒီအချိန်မှာ ရွှေဂုံတိုင်ကြေညာစာတမ်းကို သူတို့ရေးခဲ့တာပါလို့ ကြွေးကြော်နေတဲ့ ဦးခင်မောင်ဆွေ၊ ဒေါက်တာသန်းငြိမ်းနဲ့ ဦးစိန်လှဦးတို့က “ခုတမျိုး တော်ကြာတမျိုး” ဗလောင်းဗလဲလုပ်ပြီး မျက်နှာပြောင်စွာနဲ့ ပါတီအသစ်ထောင်ကာ ရွေးကောက်ပွဲ ဝင်ဖို့ စိုင်းပြင်းနေပါပြီ။ စကားမစပ်ကြုံလို့ပြောရရင် ၁၉၉၀ ရွေးကောက်ပွဲတုန်းက ကျနော်မဲပေးခဲ့တဲ့ အင်းစိန်မဲဆန္ဒနယ် အမှတ်(၂)က ဒီချုပ် ကိုယ်စားလှယ်က ဦးစိန်လှဦးပါခင်ဗျား။ အဲဒီတုန်းက အဖွဲ့ချုပ်ကို ကိုယ်စားပြုတဲ့ သူ့ကိုမဲပေးခဲ့ရတာ ကျနော့်ထောက်ခံမဲ “သန” တယ်လို့ အခုတော့ ခံစားနေရပါတယ်။

ဒေါက်တာသန်းငြိမ်းကလည်း ဧရာဝတီအင်တာဗျူးထဲမှာ ဘယ်လောက်ထိ ဗလောင်းဗလဲ ပြောသလဲဆိုတော့… ရွှေဂုံတိုင်ကြေညာစာတမ်းက ဒီအချက် ဒီအချက်တွေကို လိုက်လျောရင် ရွေးကောက်ပွဲ ဝင်ဖို့ စဉ်းစားမယ်လို့ပဲပြောခဲ့တာ…တဲ့။ ဒီအချက်တွေကို မလိုက်လျောရင် ရွေးကောက်ပွဲ မဝင်ဘူးလို့ မပြောထားဘူး….တဲ့။ မှားပါတယ် ဒေါက်တာရယ်...ကျွန်တော်မျိုးကြီး သေသင့်ပါတယ်လို့သာ ပြောရမလားမသိ။ မြန်မာ့နိုင်ငံရေးမှာ ယုံကြည်စရာမကောင်းတဲ့၊ မရိုးသားတဲ့၊ ခုတမျိုး တော်ကြာတမျိုးပြောတတ်တဲ့ အတိုက်အခံနိုင်ငံရေးသမားဆိုတာရှိရင် ဒီလိုလူမျိုးပါလားလို့တောင် မှတ်သားနိုင်ဖွယ်ပါ။ သူတို့ရဲ့ ဗလောင်းဗလဲလုပ်ရပ်ကြောင့် မြန်မာ့နိုင်ငံရေးမှာ ဆိုးကျိုးတွေ အမြောက်အမြား ဖြစ်ပေါ်စေဦးမှာတော့ အသေအချာပါ။

(၄) စင်္ကာပူအစိုးရရဲ့ ပီအာရ် ပေါ်လစီ

လွန်ခဲ့တဲ့ ၈ နှစ်ကျော်ကျော် အချိန်ကအထိ စင်္ကာပူမှာ ပီအာရ် (အမြဲတမ်းနေထိုင်ခွင့်) ကျဖို့ဆိုတာ အတော်အတန် ခက်ခဲပါတယ်။ ပီအာရ်ကျဖို့ အရည်အချင်းသတ်မှတ်ချက်တွေကို တရားဝင်ထုတ်ပြန်ကြေညာထားတာမျိုးမရှိပေမယ့် စင်္ကာပူမှာ နေထိုင်တဲ့ လုပ်သက်ကလည်း အတန်အသင့်ရှိရမယ်။ ဝင်ငွေအဆင့်အတန်းကလည်း မဆိုးရဘူး။ စင်္ကာပူက ဘွဲ့၊ ဒီပလိုမာ လက်မှတ်တခုခုကို ပိုင်ဆိုင်ရမယ်။ ရှေးတုန်းက အဲသလို ရှိခဲ့ပါတယ်။ ဒါပေမယ့် ပြီးခဲ့တဲ့ ငါးနှစ်လောက်အတွင်းမှာ စင်္ကာပူအစိုးရက ပီအာရ်တွေကို ဖောချင်းသောချင်း ချပေးခဲ့ပါတယ်။ မြန်မာလူမျိုးတွေအကြားမှာ ဟာသ တခုတောင်ပေါ်လာတယ်။ “အိုင်စီအေ(လူဝင်မှုကြီးကြပ်ရေး၊ လဝက)အဆောက်အဦးရှေ့က လမ်းတောင် ဖြတ်မလျှောက်ရဲဘူး။ လက်ကို ဖမ်းဆွဲပြီး ပီအာရ်ချပေးလိုက်မှာ စိုးလို့” ဆိုတာမျိုးပေါ့။ အကျိုးဆက်အနေနဲ့ စင်္ကာပူမှာ လူဦးရေ အဆမတန် တိုးတက်လာပြီး ဘတ်စ်ကား၊ မီးရထား၊ စားသောက်ဆိုင်၊ အိုးအိမ် စတာတွေအားလုံးမှာ လူတွေ ကြပ်ညပ်ကုန်ပါတော့တယ်။ ဒီကြားထဲ စီးပွားပျက်ကပ်ကလည်း ဆိုက်လိုက်သေးတော့ အလုပ်လက်မဲ့နှုန်းထားမြင့်တက်လာတဲ့အခါ ဒေသခံ စင်္ကာပူနိုင်ငံသားတွေအတွက် သူတို့အစိုးရရဲ့ နိုင်ငံခြားသားအလုပ်သမားငှားရမ်းမှု မူဝါဒကို ဝေဖန်စရာ၊ ကန့်ကွက်စရာ ဖြစ်လာတော့တာပေါ့။ အဲသည်မှာတင်ပဲ စင်္ကာပူအစိုးရရဲ့ လဝက ပေါ်လစီဟာ ချက်ချင်း ဂ ငယ်ကွေ့ကွေ့ပြီး ပီအာရ်ချထားမှုကို တင်းကြပ်လာတော့တာပါပဲ။ ဒီအထိကတော့ သူ့နိုင်ငံ၊ သူ့လိုအပ်မှုအရ ပေါ်လစီပြောင်းရတာဆိုတော့ ကိုယ်က နိုင်ငံခြားသားလည်း ဖြစ်တဲ့အလျောက် ဝေဖန်စရာ အကြောင်းမရှိပါဘူး။ ဒါပေမယ့် လုပ်ဖော်ကိုင်ဖက်တွေထဲမှာ၊ အသိတွေထဲမှာ ပီအာရ်မိဘနှစ်ပါးကနေ (စင်္ကာပူမှာ)မွေးလာတဲ့ ကလေးကို ပီအာရ်ချမပေးတဲ့အတွက် မကြာခဏဆိုသလို အိုင်စီအေကို သွားပြီး ကလေးအတွက် Social Visit pass သက်တမ်းတိုးနေရတဲ့ လူတွေရဲ့ ဒုက္ခကို မြင်ရတဲ့အခါမှာတော့ စင်္ကာပူအစိုးရရဲ့ လဝက ပေါ်လစီ ဗလောင်းဗလဲကို မေးခွန်းထုတ်စရာ ပေါ်လာပါတယ်။ ပီအာရ်ချတာပဲဖြစ်ဖြစ်၊ တင်းကြပ်တာပဲဖြစ်ဖြစ်….လုပ်ချင်သလို လုပ်ကြပါ။ ဒါပေမယ့် ပီအာရ်မိဘနှစ်ပါးက (စင်္ကာပူမှာ)မွေးလာတဲ့ ကလေးကို ပီအာရ်ချမပေးတာကတော့ လူတွေကို အလုပ်မရှုပ်ရှုပ်အောင် သက်သက် ညစ်ရာကျနေပါတယ်လို့သာ ပြောချင်ပါတော့တယ်။

(၅) သီးလေးသီးနဲ့ ဗလောင်းဗလဲ

နံပါတ် ၅ အနေနဲ့ နာမည်ကျော် သီးလေးသီးရဲ့ ဗလောင်းဗလဲကို ပြောချင်ပါတယ်။ သိကြတဲ့အတိုင်း သီးလေးသီး မြန်မာပြည်ကထွက်လာတော့ စင်္ကာပူမှာ အရင်ဆုံးလာ ကပြ တာမို့လား။ သူတို့ရဲ့ ပတ်စ်ပို့၊ လေယာဉ်လက်မှတ် စတာတွေအားလုံးအတွက် စင်္ကာပူက စီစဉ်သူတွေ အိပ်ကပ်ထဲက အရင်းစိုက်ထုတ်ပြီး ခေါ်ကြတာပါ။ ဒီရောက်တော့ ခေါ်တဲ့လူတွေမှာ တာဝန်ရှိတဲ့အလျောက် သူတို့ သဘောထားကို အတိအလင်း ဆွေးနွေးရပါတယ်။ မြန်မာနိုင်ငံထဲကို ပြန်ဝင်ဖို့ ဆန္ဒရှိမရှိ၊ ဒုက္ခသည်ခံဖို့၊ နိုင်ငံရေးခိုလှုံခွင့်လျှောက်ဖို့ ရည်ရွယ်ချက်ရှိမရှိ ပေါ့။ ဒီမေးခွန်းတွေကို မေးရတာက အကြောင်းရှိပါတယ်။ တကယ်လို့ မြန်မာပြည်ထဲကို ပြန်ဝင်ဖို့ ဆန္ဒရှိတယ်ဆိုရင် ပြက်လုံးပြက်တဲ့နေရာမှာ သတိထားပြက်ဖို့အတွက်ရယ်၊ မီဒီယာတွေနဲ့ အင်တာဗျူးတဲ့နေရာမှာ စကားအပြောအဆို သတိထားဖို့ရယ်အတွက်ပါ။ ဘာကြောင့်လဲဆိုတာ့ သူတို့ ပြန်သွားဖို့ရည်ရွယ်ထားတယ်ဆိုရင် ပြည်ပက စီစဉ်သူတွေကတော့ ပြည်ပမှာ လွတ်လွတ်ကျွတ်ကျွတ် ကျန်ရစ်မယ်။ သူတို့ကတော့ ပရိသတ်အကြိုက် လိုက်ပြက်ပြီး ထောင်ထဲဝင်သွားရတယ်ဆိုတာမျိုး မဖြစ်စေလိုတဲ့အတွက် ကြိုတင်ပြီး ပွင့်ပွင့်လင်းလင်း မေးမြန်းဆွေးနွေးရခြင်း ဖြစ်ပါတယ်။ အဲဒီတုန်းကတော့ သူတို့ကိုယ်တိုင်က ပြန်မယ့်ရည်ရွယ်ချက်ရှိတယ်လို့ ပြောတဲ့အလျောက် စီစဉ်သူတွေကလည်း အဲဒီအချက်ကို ထည့်စဉ်းစားပြီး ပွဲဖြစ်မြောက်ရေးနဲ့ မီဒီယာတွေနဲ့ တွေ့ဆုံရာမှာပါ ဂရုတစိုက် စီစဉ်ခဲ့ပါတယ်။

နောက်ပိုင်းမှာတော့ အားလုံးသိကြတဲ့အတိုင်း ပြည်ပပွဲစဉ်ခရီးတွေအတွင်း သီးလေးသီးဟာ မီဒီယာအင်တာဗျူးတွေအတော်များများမှာ “သူတို့ဟာ အများထင်သလို ပြည်ပမှာ ခိုလှုံခွင့် တောင်းပြီး နေမယ့်လူတွေမဟုတ်ကြောင်း၊ မြန်မာပြည်ကို ပြန်ပြီး မြန်မာပြည်သူတွေကို ဖျော်ဖြေမှာဖြစ်ကြောင်း” တလျှောက်လုံး ပြောခဲ့ပါတယ်။ ဒီစကားကို ကြားကာစကတော့ သီးလေးသီးရဲ့ သတ္တိကို လေးစားမိပါတယ်။ ပြည်တွင်းပြည်ပက မြန်မာပြည်သူတွေအနေနဲ့ သီးလေးသီးရဲ့ သတ္တိကို အတုယူသင့်တယ်ပေါ့လေ။ ဒါပေမယ့် ၂၀၀၈ နှစ်ဦးပိုင်းကတည်းက ထွက်လာလိုက်တဲ့ သီးလေးသီးဟာ အခုအချိန်အထိ ပြည်ပမှာပဲ ရှိနေပါသေးတယ်။ မြန်မာပြည်ကို ပြန်ပြီး မြန်မာပြည်သူလူထုကို ဖျော်ဖြေမယ်ဆိုတဲ့ သူတို့စကားဟာလည်း လေလှိုင်းထဲကလာပြီး လေလှိုင်းထဲမှာပဲ ပျောက်ပျက်သွားပုံရပါတယ်။ အမှန်ကတော့ ဘာမှ မပြောခဲ့ဘဲ ပြည်ပမှာ ဆက်လက်နေထိုင်တယ်ဆိုရင်လည်း သူတို့ကို ဘယ်သူကမှ ဘာမှ ပြောမှာမဟုတ်ပါဘူး။ ဒါပေမယ့် တကယ်ပြန်ဖို့ ဆန္ဒလည်း မရှိဘဲ ဘာကြောင့် အဲသည်လို ပါးစပ်ကနေ ဗလွတ်ရွှတ်တွ ပြောထွက်ခဲ့သလဲဆိုတာ သီးလေးသီးကိုယ်တိုင်မှအပ အခြားသူကတော့ သေသေချာချာ သိနိုင်မှာ မဟုတ်ပါဘူး။

(၆) မေငြိမ်းရဲ့ ဗလောင်းဗလဲ

မေငြိမ်းဆိုတာက စာရေးဆရာမ၊ တက္ကသိုလ်ဆရာမဟောင်း၊ ဘလော့ဂါ ဒေါ်မေငြိမ်းပါ။ ဆရာမမေငြိမ်း ဘလော့ဂ်ရေးခဲ့တဲ့ တလျှောက်လုံးမှာရော၊ ပြည်ပက အင်တာနက်မဂ္ဂဇင်းတွေမှာ ရေးတဲ့ စာတွေကို ဖတ်မိသမျှလိုလိုကို အခုအချိန်အထိ ကျနော်နှစ်ခြိုက်ခဲ့တာတွေချည်းပါ။ (သူကိုယ်တိုင်က သူ့ကိုယ့်သူနိုင်ငံရေးသမားလို့ မခံယူပေမယ့်) သူ့ဘလော့ဂ်မှာ မြန်မာနိုင်ငံအရေးနဲ့ ပတ်သက်လို့ သူ့ခံစားချက်၊ သူ့အယူအဆ၊ သူ့အမြင်တွေကို ရေးတဲ့အခါတိုင်း ကျနော်နဲ့ ထပ်တူကျလွန်းလို့၊ နှစ်သက်လွန်းလို့ ကွန်မင့်ကဏ္ဍမှာ မကြာခဏဆိုသလို သွားရောက်ထောက်ခံရေးသားလေ့ရှိပါတယ်။ အဲသည်လို ထောက်ခံလွန်းလို့ နအဖ ဘက်တော်သားဖြစ်ဟန်တူတဲ့ သူများနဲ့ မေငြိမ်းကိုလည်း မုန်းတီးဟန်တူတဲ့ သူများက “ကိုပေါ… ခင်ဗျား သူ့ကို ဘလိုင်းကြီး ပင့်မနေနဲ့” ဆိုတဲ့ ကွန်မင့်မျိုး အရေးခံရတဲ့အထိပါပဲ။

ဒါပေမယ့် ဆရာမမေငြိမ်း ဘလော့ဂ်မှာ ကျနော့်စိတ်ကို ထိခိုက်စေတဲ့ ဗလောင်းဗလဲတခု ဖြစ်ခဲ့တယ်။ အဲသည် ဗလောင်းဗလဲက တခြားသူတွေကိုတော့ ထိခိုက်ချင်မှ ထိခိုက်မှာပါ။ အသေးအမွှားကိစ္စလေးလို့လည်း ပြောလို့ရပါတယ်။ ဒါပေမယ့် ကျနော့်စိတ်ကိုတော့ ကြီးကြီးမားမား ထိခိုက်စေပါတယ်။

ဘာလဲဆိုတော့….. အဲသည်တလောက ညီလင်းဆက်နဲ့ မေငြိမ်းတို့ “သောင်းသောင်းဖြဖြ” ဆိုတဲ့ အသုံးအနှုန်းက အစပြုလို့ ငြိကြတယ်ဆိုပါတော့။ ကျနော်က ဖေ့စ်ဘုတ်တွေ ဘာတွေအထိ တက်မဖတ်လို့ အကြောင်းစုံ မသိရပေမယ့်… အဲဒီအချိန်က ဖေ့စ်ဘုတ်သုံးသူ မဒမ်ပေါအပြောနဲ့ ကိုယ်ဖတ်မိတာတွေ ဆက်စပ်တွေးကြည့်မိတဲ့အခါ အဲသည်ကိစ္စမှာ ကျနော်က မေငြိမ်းမှန်တယ်ယူဆတဲ့အလျောက် မေငြိမ်းဖက်မှာ ရပ်ပါတယ်။ ညီလင်းဆက်ကို ကျနော်ကြိုက်တာမှန်ပေမယ့် အရာတိုင်းမှာတော့ ညီလင်းဆက်နဲ့ ကျနော်ကလည်း ထပ်တူကျတာတော့ မဟုတ်ပါဘူး။

အဲသည်လို ညီလင်းဆက်ကိစ္စက အစပြုလို့ မေငြိမ်းရေးတဲ့ ပို့စ်တွေတိုင်းမှာ မေငြိမ်းကို မလိုလားသူများက ကွန်မင့်တွေနဲ့ အကြီးအကျယ် လာရောက်တိုက်ခိုက်တာကိုလည်း ကျနော်သတိထားမိပါတယ်။ အရင်ကလည်း နအဖ ဘက်တော်သားတွေ ဒီလိုပဲ လာရောက်တိုက်ခိုက်နေကြမို့ ဆရာမမေငြိမ်းက လုံးဝ ဖြုံမှာမဟုတ်ဘူးလို့လည်း ကျနော်တွက်ဆထားပြီးသားပါ။ ဒီကြားထဲမှာ မေငြိမ်းက “ပေးသူယူသူ နောက်ဆက်တွဲ” ဆိုတဲ့ ပို့စ်မှာ ကွန်မင့်တွေနဲ့ ပတ်သက်လို့ သူမရဲ့ သဘောထားကို ပြောရာမှာ...

“နောက်တခုက လောက်လောက်လားလား ဝေဖန်တာမျိုးလည်း မဟုတ်ကြလေတော့ မှတ်သားစရာလည်း မရှိ...။ ဒီတော့ Blog စည်တယ်လို့ပဲ သဘောထားလိုက်တော့တယ်..။ ..................................................................... ....................................................................................... .......................................................... ကဲ... Comment ချင်ကြသေးသူများ... ကြိုဆိုပါတယ်ဗျားးးး” လို့ ရေးထားတာတွေ့ရတော့ လွတ်လပ်စွာ ပြောဆိုပိုင်ခွင့်ကို အလေးထားသူတယောက်အနေနဲ့ ဆရာမရဲ့ သဘောထားကိုရော၊ အဝေဖန်ခံနိုင်တဲ့ စိတ်ဓါတ်ကိုပါ ပိုပြီး သဘောကျမိပါတယ်။

ဒါပေမယ့် မကြာလိုက်ပါဘူး။ ဝမ်းနည်းစရာကောင်းတာက ဆရာမဘလော့ဂ်မှာ ကွန်မင့်တွေကို ပိတ်ထားတာ တွေ့ရတော့တာပါပဲ။ ကျနော်သုံးတဲ့ ကွန်ပြူတာတွေမှာ ကွန်မင့်ဖတ်မရတာကြောင့်တော့ မဖြစ်နိုင်လောက်ဘူးလို့ တွက်ဆရတာပဲ။

ဒီကိစ္စကလည်း ပြောရရင် သီးလေးသီး အဖြစ်တုန်းကလိုပဲ။ ဘလော့ဂါ တယောက်အနေနဲ့ သူ့ဘလော့ဂ်မှာ ကွန်မင့်တွေကို ပိတ်ခြင်း၊ မပိတ်ခြင်းက သူ့လွတ်လပ်ခွင့်ပဲ။ ဆရာမမေငြိမ်းမှာလည်း သူ့ပို့စ်ထဲမှာ ရေးခဲ့ဖူးတဲ့အတိုင်း သူ့ဘလော့ဂ်ကို နည်းပညာအရ ကူညီပေးနေတဲ့ တပည့်သားချင်း၊ မိတ်ဆွေတွေရဲ့ ဆန္ဒကို မလွန်ဆန်နိုင်လို့ ကွန်မင့်တွေကို ပိတ်လိုက်ရတာလည်း ဖြစ်ကောင်းဖြစ်နိုင်ပါတယ်။ ဒီလိုတွေးရင်လည်း ရပါတယ်။ ဒါပေမယ့် ဒီဗလောင်းဗလဲက ကျနော့်စိတ်ကို ဘာကြောင့်ထိခိုက်စေသလဲဆိုတော့…. ဆရာမမေငြိမ်းဟာ မြန်မာပြည်မှာ နာမည်ကြီး စာရေးဆရာတယောက်ဖြစ်တဲ့အလျောက် စာပေစိစစ်ရေးရဲ့ ဆိုးရွားမှုကို သာမန်ဘလော့ဂါတွေထက် ပိုသိသူဖြစ်တာက တချက်၊ နောက်လွတ်လပ်စွာပြောဆိုပိုင်ခွင့်ကို အလေးထားသူဖြစ်တယ်ဆိုတာကို ကျနော်ယုံကြည်တာက တချက်၊ နောက်ပြီး ဝေဖန်မှုကို မကြောက်ရွံ့သူ၊ စိတ်ထဲရှိတဲ့အတိုင်း အမှန်ကို မကြောက်မရွံ့ပြောရဲသူဖြစ်တယ်ဆိုတာ အတိတ်က သူမရဲ့ အပြုအမူအပြောအဆို လုပ်ရပ်တွေကတဆင့် သိနိုင်တယ်ဆိုတဲ့အချက်… စတဲ့အချက်တွေကို ကျနော်သိထားတော့ ဒီကိစ္စမှာ သာမန်ဘလော့ဂါတယောက်က ကွန်မင့်တွေကို ပိတ်လိုက်ရင် ကျနော့်စိတ်ထဲမှာ ဘယ်လိုမှ နေမှာမဟုတ်ပေမယ့် ဆရာမမေငြိမ်းက ပိတ်လိုက်တဲ့အခါ ကျနော့်အရှိုက်ကို လက်သီးနဲ့ထိုးလိုက်သလို၊ စစ်မြေပြင်မှာ ကိုယ့်ရဲ့ ရှားရှားပါးပါး တိုက်ဖော်ရဲဘော်တယောက် ကျဆုံးသွားသလို ရင်ထဲမှာ အတော်လေး အောင့်ပြီး နှမြောသတလည်း ဖြစ်မိပါတယ်။

ဒါတွေဟာ ရုံးပိတ်ရက်မှာ တောင်တွေးမြောက်တွေး လျှောက်စဉ်းစားရင်း ရင်ကိုလာမှန်တဲ့ အပြောင်းအလဲ ဗလောင်းဗလဲ ခြောက်ခု အကြောင်း ရေးပြလိုက်တာပါ။

ပုစဉ်းရင်ကွဲ

တောဖက်မှာ နေဖူးသူတွေအဖို့ ပုစဉ်းရင်ကွဲအော်သံတွေကိုလည်း ကြားဖူးကြပါလိမ့်မယ်။ ပုစဉ်းရင်ကွဲအော်သံက အော်နေတုန်းတော့ ဆူညံနေမှန်းမသိရဘူး။ ဒါပေမယ့် တချီတချီမှာ ရုတ်ချည်းဆိုသလို တပြိုင်တည်း အအော်ရပ်သွားတတ်ကြတယ်။ အဲဒီအခါကျမှ ညဉ့်ယံတခုလုံး တိတ်ဆိတ်ငြိမ်သက်နေတာကို အာရုံပြုမိပြီး သူတို့ တချိန်လုံးဆူညံနေခဲ့တာကိုပါ တဆက်တည်း သတိထားမိသွားတတ်တာမျိုး။ ဒါပေမယ့် အဲဒီလို ငြိမ်ကျသွားတာကလည်း ခဏတဖြုတ်ပါ။ ဆယ့်ငါးမိနစ်လောက်နေရင် ပြန်အော်ကြတာပါပဲ။

၂၀၁၀ ခုနှစ် နှစ်တဝက်ကျိုးလို့ စစ်အစိုးရရဲ့ တတိုင်းပြည်လုံးကို စစ်ကျွန်ပြုရေး ဖွဲ့စည်းပုံ အတည်ပြုမယ့် ရွေးကောက်ပွဲကြီးလည်း နီးသထက် နီးကပ်လာပါချေပြီ။ ဒီအချိန်မှာ ပုစဉ်းရင်ကွဲအော်သံတွေလို တောက်လျှောက်အော်လာတဲ့ အသံတွေတချို့ ဗြုန်းစားကြီး တိတ်ဆိတ်သွားတာကို သတိထားမိတယ်။ မောသွားတာလား။ တကယ်ပဲ ရင်ကွဲသွားလေသလားတော့ မပြောတတ်။ ဘယ်အသံတွေလဲဆိုတော့ “ပွဲသိမ်းတိုက်ပွဲ” ဆိုတဲ့ အသံတွေပါ။ အထူးသဖြင့် ၂၀၁၀ ကို ပွဲသိမ်းတိုက်ပွဲ ဖြစ်ရမယ်လို့ အော်နေကြသူတွေ အခုတလော ဘာကြောင့်မှန်းမသိ အသံတိတ်သွားတာကို သတိထားမိလို့ပါ။

ပွဲသိမ်းတိုက်ပွဲ ဆိုတဲ့ အသုံးအနှုန်းက တခါတရံ သုံးတာဆိုရင်တော့ အကြောင်းမဟုတ်ဘူးပေါ့။ လူဆိုတာ ရည်မှန်းချက် ပန်းတိုင်ထားပြီး အလုပ်လုပ်တတ်ကြတာ သဘာဝမို့ ပန်းတိုင်မရှိတာနဲ့ စာရင် ကောင်းတယ်ပဲ ပြောရမှာပေါ့။ ဒါပေမယ့် တနှစ်တခါဆိုသလို ဒီနှစ်ထဲမှာ “ပွဲသိမ်းတိုက်ပွဲ” ဆင်နွှဲမယ်လို့ အချိန်မှန်မှန်ကြီး ပြောလာခဲ့ကြတာတွေကို တွေ့ရတော့ နှစ်တွေကြာလာတဲ့အခါ အဲဒီစကားမျိုးဟာ ပြောဖန်များလေ အနှစ်သာရ ကင်းမဲ့လေ ဖြစ်လာတော့တာပေါ့။ တကယ်လို့သာ တနှစ်အတွင်း လွတ်လပ်ရေးရစေရမယ်ဆိုတဲ့စကားကို ဂျပန်တွေနဲ့အတူ ပြန်ဝင်လာစဉ်ကတည်းက ဗိုလ်ချုပ်အောင်ဆန်း နှစ်တိုင်းပြောလာခဲ့ရင် ဘယ်သူမှ အဲဒီစကားကို အယုံအကြည် ရှိတော့မှာ မဟုတ်ပါဘူး။ ဆိုခဲစေ မြဲစေ ဆိုတဲ့ စကားကို သတိရမိပါတယ်။ ဒါက “ပွဲသိမ်းတိုက်ပွဲ”ဆိုတာကို တနှစ်တခါ ကြွေးကြော်ပြီး တိုက်နေသူတွေနဲ့ ပတ်သက်ပြီး ရေးပြချင်တာပါ။

နောက်တမျိုးကတော့ “အခုတော့ မပါသေးဘူး။ ပွဲသိမ်းတိုက်ပွဲကျရင်တော့ ဝင်ပါပြီကွာ…” ဆိုပြီး တချိန်လုံး လက်မောင်းပင့်နေတဲ့ လူတွေ ဖြစ်ပါတယ်။ နိုင်ဖို့ သေချာနေပြီဆိုတော့မှ ဝင်ပူးပေါင်းတာမျိုးကျတော့ ဘာလုပ်တော့မလဲ။ သူဝင်မပါလည်း နိုင်ဖို့က ကျိန်းသေနေပြီကိုး။ နိုင်မှ ဝင်ပါတာမျိုးက ဘောလုံးပွဲ အရှုံးအနိုင် အဖြေထွက်ပြီးမှ လောင်းကြေးထပ်ချင်တဲ့လူလို ဖြစ်နေတယ်။ တကယ်လိုအပ်နေတဲ့အချိန်မှာ အုတ်တချပ်သဲတပွင့်လို ဝင်ပူးပေါင်းပြီး ပါဝင်တာက နိုင်မယ်သေချာမှ ဝင်ပူးပေါင်းပါဝင်တာထက် ပိုပြီး တန်ဘိုးရှိပါတယ်။ အဲဒီ သဘောမျိုးနဲ့ ပြောတာမဟုတ်ပြန်ရင်လည်း…. “အာလိန်ငါးဆင့်၊ နဂါးနှင့်ဂဠုန်အရံ၊ ဂုဏ္ဘန်ယက္ခ၊ စတုဇ်မဟာရာဇာ မခံနိုင်ငြားမှ သိကြားထွက်တဲ့အခါ” ဆိုတဲ့ သီချင်း စာသားလို… “မင်းတို့ တိုက်ထားနှင့်ကြကွာ။ မင်းတို့ မနိုင်ကာမှ နောက်ဆုံးမှာ ငါဝင်ပါမယ်…” လို့ အဓိပ္ပါယ် ထွက်နိုင်ပါသေးတယ်။

အဲဒီ ပွဲသိမ်းတိုက်ပွဲ ဆိုတဲ့ အသံတွေကို ထပ်ဖန်တလဲလဲ ကြားရတော့ ဒုတိယကမ္ဘာစစ်အတွင်းက အင်္ဂလိပ်နန်းရင်းဝန် ချာချီ ပြောခဲ့တာကို သတိရမိတယ်။

“Now this is not the end. It is not even the beginning of the end. But it is, perhaps, the end of the beginning.”

Sir Winston Churchill, Speech in November 1942

ချာချီကလည်း ဒီစကားကို (သူ့နိုင်ငံသားတွေက) ပွဲသိမ်းရောက်ကာနီးပြီလို့ လှိုင်လှိုင်ကြီး ပြောလာကြတဲ့အတွက် နားကလောဟန်နဲ့ ပြောခဲ့တာလို့ တနေရာမှာ မှတ်သားခဲ့ရဖူးပါတယ်။

အခုလည်း ကျနော်တို့ မြန်မာ့အရေးမှာ ပွဲသိမ်းလို့ မဆိုနိုင်သေးပါဘူး။ ပွဲက စရုံပဲ ရှိပါသေးတယ်။ အဲဒီအနေအထားမှာ ပွဲသိမ်းတိုက်ပွဲလို့ တစာစာ အော်နေကြရင် ပွဲမစခင်က ဇာတ်သိမ်းသွားနိုင်တဲ့အတွက်… တခါက ဒီလို ကဗျာနဲ့ ကာတွန်း ပို့စ်လေးတခုကို တင်ခဲ့ဖူးပါတယ်။

“ပွဲသိမ်းငိုချင်း”

ပွဲသိမ်းတိုက်ပွဲ….
ပွဲသိမ်းတိုက်ပွဲ….
ပွဲသိမ်းတိုက်ပွဲ….
အာတွေလည်း ပြဲခဲ့ပေါ့
အသေနွှဲမယ့် သဏ္ဍာန်လို
လေထဲက ရမ်ဘိုတွေကြောင့်
အံမယ်လေး….. အရပ်ကတို့ရဲ့
ပွဲမစခင်က ဇာတ်သိမ်းရပါပေါ့လား…..

ကိုပေါ။
July 03, 2010

“မျိုးစေ့ ပါလာသော”

အာဏာရှင်စနစ်ဟာ Self-destructive တဲ့။ စကတည်းက သူ့ကိုယ်သူ ပြန်ဖျက်ဆီးမယ့် မျိုးစေ့ပါလာသတဲ့။

ဘယ်လောက်ခိုင်ခံ့တဲ့ အာဏာရှင်စနစ်ပဲဖြစ်ဖြစ်၊ တချိန်မှာတော့ ကျဆုံးရတာကို သမိုင်းတွေထဲမှာ တွေ့နေမြင်နေရတယ်။

မြန်မာပြည်က အာဏာရှင်စနစ်ဟာ ၁၉၆၂ ခုနှစ်က စပြီး ရေတွက်ရင် ရာစုနှစ်ဝက်လောက် ကြာခဲ့ပြီဆိုတော့ ဘယ်တော့မှ မပျက်နိုင်တော့ဘူးလို့ ထင်တဲ့လူတွေလည်း ထင်ကြမယ်။ စနစ်ကသာ မပျက်သေးတာ။ အာဏာရှင်တွေတော့ တယောက်ပြီး တယောက် သေမင်းခေါ်ရာနောက်ကို လိုက်သွားကြကုန်ပြီ။ လက်ရှိ အုပ်ချုပ်နေတဲ့ အာဏာရှင် ဦးသန်းရွှေလည်း အသက်အရွယ်အရ နေရလွန်းလှ နောက်ထပ် ဆယ်နှစ်ပေါ့။

စနစ်ဆိုတာမျိုးကလည်း တချိန်လုံးတော့ တည်တံ့နေနိုင်တာမဟုတ်။ လူထုက ကြည်ဖြူတဲ့စနစ်၊ လက်ခံတဲ့စနစ်ဆိုရင်တော့ ကြာရှည်ခံ ကောင်းခံမယ်။ ဒါပေမယ့် အခုလက်ရှိစနစ်ကို လူအနည်းစုကလွဲလို့ ဘယ်သူမှ မနှစ်သက်ကြဘူး။ လူတွေ မလှန်ရဲဘူးဆိုတာ အကြောက်တရားနဲ့ မလှန်ရဲအောင် ဖိနှိပ်အုပ်ချုပ်ထားလို့သာဖြစ်တယ်။ အခွင့်သာတာနဲ့ လှန်ကြဖို့ ကြိုးစားကြဦးမှာပဲ။

နောက်တချက်က ဒီအာဏာရှင်စနစ်က ခေတ်နဲ့ တကယ်အံမဝင်ဘူး။ အရင် မြန်မာရှင်ဘုရင်တွေခေတ်ကလို ကုန်းတွင်းပိုင်းမှာ မင်းနေပြည်တော် တည်ထောင်ပြီး အပြင်လောက ကမ္ဘာကြီးနဲ့ အဆက်အသွယ်ပြတ်နေတယ်ဆိုရင်တော့ ပြည်သူပြည်သားတွေလည်း ပြင်ပကမ္ဘာနဲ့ ထိတွေ့မှုနည်းတဲ့အလျောက် တသီးတခြား မတိုးတက်ဘဲ ကျန်ရစ်နေနိုင်ကောင်းရဲ့။ ဒါတောင်မှ ဘာသာရေး၊ ယဉ်ကျေးမှုဆိုတာမျိုးတွေ သမိုင်းတလျှောက်မှာ စိမ့်ဝင်ထိုးဖောက်တာကိုတော့ ခံရသေးတာပါပဲ။

အခုခေတ်မှာတော့ ကမ္ဘာတဖက်ခြမ်းက အဖြစ်အပျက်တွေကို တခြားတဖက်က ချက်ချင်းဆိုသလို သိနိုင်ကြားနိုင်မြင်နိုင်ကြတဲ့ခေတ်။ နိုင်ငံအချင်းချင်း ကူးသန်းသွားလာမှုကလည်း ဘယ်တုန်းကနဲ့မှ မတူညီအောင် လွယ်ကူမြန်ဆန်တဲ့ခေတ်။

ဒီခေတ်ကြီးထဲမှာ ရှင်ဘုရင်ခေတ်တုန်းကလို လူတွေဟာ မျက်စိပိတ်၊ နားပိတ်မဟုတ်ကြတော့ဘူး။ လူတွေကို ဝါဒဖြန့်မှိုင်းတွေ အရင်ကလို တိုက်လို့ မရတော့ဘူး။ လူတွေက မြန်မာ့အလင်းနဲ့ မြန်မာ့အသံလောက်ပဲ ဖတ်ကြ၊ နားထောင်ကြတာ မဟုတ်ဘူး။ လှိုင်းတိုရေဒီယိုတွေကတဆင့် ပြည်ပက လွတ်လပ်တဲ့ အသံလွှင့်ချက်တွေကို ဖမ်းယူနားထောင်ကြတယ်။ ဂြိုဟ်တုစလောင်းတွေ ကြည့်လာကြတယ်။ နိုင်ငံခြားနဲ့ ဥဒဟို သွားလာနေကြတယ်။

ရုပ်ရှင်၊ ဂီတ၊ ဖက်ရှင် စတာတွေကတဆင့်လည်း ကမ္ဘာတလွှားက ဖြစ်ပေါ်ပြောင်းလဲ တိုးတက်မှုတွေကို သိမြင်လာကြတယ်။ ခေတ်ရေစီးကြောင်းအလိုက် အနည်းနဲ့အများ ပြောင်းလဲ လက်ခံလာကြတယ်။ ဝတ်စားဆင်ယင်မှုကအစ ပြောင်းလာတယ်။ ရန်ကုန်ဓါတ်ပုံတွေထဲမှာ ဘောင်းဘီဝတ်တဲ့ အမျိုးသမီးတွေ၊ အမျိုးသားတွေ တော်တော်များလာတာကို တွေ့ရလို့ သဘောကျမိတယ်။ အဝတ်အစားတွင်မက တွေးခေါ်ပုံတွေပါ ပြောင်းလဲလာတယ်။ နောက်ပိုင်း လူငယ်တွေဆိုရင် တွေးခေါ်ပုံတွေမှာ ကျနော်တို့နဲ့ မတူတော့ဘူး။ ကျနော်တို့ခေတ်က လူကြီးပြောတာဆိုရင် မျက်စိမှိတ် ယုံလိုက်တာပဲ။ ဒီခေတ်လူငယ်တွေက ပိုပြီး လွတ်လပ်စွာ တွေးခေါ်တတ်လာကြတယ်လို့ ထင်ပါတယ်။

စစ်အစိုးရကိုယ်တိုင်ကလည်း သူတို့ရဲ့ စနစ်ကြီးဟာ အလုပ်မဖြစ်ဘူး၊ မမှန်ကန်ဘူးဆိုတာ သိတယ်။ ဒါကြောင့်လဲ ဒီမိုကရေစီစနစ်ကို သွားဖို့လုပ်နေပါတယ်လို့ (လူကြားကောင်းရုံဖြစ်စေ) အော်ပြနေရတယ်။ ဟန်ဆောင်ပန်ဆောင်ဖြစ်စေ အပေါ်ယံတွေ လုပ်ပြနေတယ်။ သူတို့ရဲ့ လုံခြုံရေးအတွက်၊ အာဏာတည်မြဲရေးအတွက် အချိန်ဆွဲတဲ့နည်း၊ မျက်လှည့်ပြတဲ့နည်းတွေကို အချိန်နဲ့အမျှ ကြံဆ သုံးစွဲနေကြရတယ်။ သူတို့မှာလည်း စိုးရိမ်ကြောင့်ကြစိတ်က မသေးဘူး။ ဒါပေမယ့် ဘယ်လောက် အချိန်ဆွဲဆွဲ၊ ဘယ်လောက်ပဲ လှည့်ဖျားဖို့ ကြိုးစားကြိုးစား တချိန်မှာတော့ ဗုန်းဗုန်းလဲရမှာပဲ။

ဒါပေမယ့် သူ့ဘာသူ လဲကျပျက်သုဉ်းတဲ့အချိန်အထိ ထိုင်စောင့်နေကြမယ်ဆိုရင်တော့ ကြာနိုင်သေးတယ်။ ကိုယ်တိုင်အတွက်၊ ကိုယ့်မျိုးဆက်တွေအတွက် လွတ်လပ်တဲ့ ပစ္စုပ္ပာန်နဲ့ အနာဂတ်ကို တမ်းတသူ၊ ဆန္ဒပြင်းပြသူများကတော့ ထိုင်မစောင့်ဘဲ စစ်အာဏာရှင်စနစ် ပျက်သုဉ်းရေးကို အစဉ်သဖြင့် ကြိုးပမ်းနေကြတယ်။ ဒီလို ကြိုးစားသူများလာလေလေ တိုင်းပြည်လွတ်လပ်ဖို့ မြန်လေလေပါပဲ။ မကြိုးစားဘဲ ဘေးထိုင်နေတဲ့လူ များရင်လည်း ဘေးထိုင်နေတဲ့လူတွေအပါအဝင် မြန်မာပြည်သူပြည်သားတွေဟာ အာဏာရှင်စနစ်ရဲ့ ဒုက္ခတွေကို ပိုပြီးကြာကြာ ခံကြရဦးမှာပဲ။ ကိုယ့်လွတ်မြောက်မှုအတွက် ကိုယ်ထူကိုယ်ထပဲ ကြိုးစားကြရမှာပါ။ သူများကယ်တာ ထိုင်စောင့်နေလို့ဖြင့် ဘယ်တော့မှ ဖြစ်လာမှာ မဟုတ်ပါဘူး။

အနည်းဆုံး… လွတ်လပ်စွာ တွေးခေါ်ခြင်း၊ လွတ်လပ်စွာ ထုတ်ဖော်ခြင်းတွေကို မိသားစုအတွင်းမှာ၊ မိတ်ဆွေသူငယ်ချင်းအသိုင်းအဝိုင်းမှာ၊ ကိုယ့်ပတ်ဝန်းကျင်မှာ စတင်ကျင့်သုံးလာကြရင် တိုင်းပြည်လွတ်လပ်ရေးအတွက် တဖက်တလမ်းက အထောက်အကူဖြစ်မယ်လို့ ယူဆမိပါတယ်။

ဖောင်ချိုး တိုက်ပွဲ

မြစ်တဖက်ကမ်း၌ ဖောင်များ ဆိုက်ကပ်လိုက်သည့်အချိန်မှာပင် နေမင်းသည် ရိုးမတောင်တန်းနောက်ကွယ်သို့ လုံးလုံးလျားလျား ငုပ်လျှိုးသွားချေပြီ။

မြစ်ကမ်းနဖူးရှိ တောတန်းထက်မှ အိပ်တန်းပြန် ငှက်ကျေးတို့၏ ကျီကျီကျာကျာ အော်မြည်သံများကို ကြားရပါ၏။ မြစ်တဖက်ကမ်းဆီမှာတော့ ခရီးတထောက် နားခိုခဲ့ရာ ညောင်နှစ်ပင်စခန်းကို ဆည်းဆာရိပ်တွင် ခပ်ပျပျ လှမ်းမြင်နေရသေးသည်။

“ကဲကဲ…. လူတွေ စုံမစုံ စစ်ကြဟေ့။ လက်နက်နဲ့ ရိက္ခာတွေ ကမ်းပေါ်ကို ချကြ”

မိုးချုန်းသံပမာ ကျယ်လောင်လှသော တပ်မှူးကြီး၏ အမိန့်သံကို နာခံကာ ကိုယ်စီကိုယ်ငှ တာဝန်တွေကို တက်ညီလက်ညီ ဆောင်ရွက်ကြရသည်ပ။ သည်အခိုက်မှာပင် ကမ်းနဖူးဆီသို့ မြင်းဒုန်းစိုင်းစီးလာသူ တဦးကို မြင်လိုက်ကြရသည်။

“ဟာ…. ကင်းထောက် တပ်မှူးလေး ပွေးလွင် ပါလားဟေ့၊ စစ်သတင်းထူးများ ပါသလား”

တပ်မှူးလေးပွေးလွင်သည် မြင်းပေါ်မှ ဖုတ်ကနဲ ခုန်ဆင်းကာ တပ်မှူးကြီး ခေါ်မင်နောင်ရဆွေ ၏ ရှေ့တွင် ကပျာကယာ ဒူးထောက်ခစားလိုက်ရင်း…

“မှန်ပါ။ ဗိုလ်သန်းရွှေတို့၊ ဗိုလ်သိန်းစိန်တို့သည် ဆင်တပ်၊ မြင်းတပ်၊ လားတပ် တပ်မကြီး သုံးခုနှင့် မျက်နှာတူရူ ကုန်းကြောင်းက စစ်ကုန်ဖွင့်၍ ချီလာကြောင်းပါ။ ကြံဖွံ့၊ စွမ်းအားရှင်နဲ့ အမျိုးသမီးရေးရာ စစ်သည်အင်အား စုစုပေါင်းလိုက်လျှင် ကျွန်တော်မျိုးကြီးတို့ အင်အားထက် အဆပေါင်း သိန်းနဲ့ချီ၍ များပြားလှကြောင်းပါ”

တပ်မှူးကြီး ခေါ်မင်နောင်ရဆွေလည်း တပ်မှူးလေးပွေးလွင်၏ စစ်သတင်းစကားကို လည်လည်ထပ်ထပ် နားထောင်သုံးသပ်ပြီးလတ်သော်……

“အိမ်း၊ တချီတမောင်းတော့ တွေ့ကြသေးတာပ။ ကဲ…. တပ်မှူးတို့… ငါတို့ စီးနင်းလာခဲ့တဲ့ “ရွှေဂုံတိုင်ကြေညာစာတမ်း” ဖောင်တော်ကြီးနဲ့ “၉၀ ရွေးကောက်ပွဲရလဒ်” ဖောင်တော်ကြီးတွေကို အခုချက်ချင်း ဖျက်ကြ”

တပ်မင်းအမိန့်ကို ကြားသောအခါ “တပ်မှူး ဗညားသန်းထိန်း” က စိတ်မသက်မသာဖြင့် အောက်ပါအတိုင်း အတွန့်တက်လိုက်သည်။

“တပ်မှူးကြီး… ဖောင်တွေ ဖျက်လို့ ကောင်းပါ့မလား။ ကိုယ့်အင်အားက နည်းပါးနေတော့ မတော်တဆ အရေးအရာ နိမ့်ပါးခဲ့လျှင် ပြန်ဆုတ်ရန်အတွက် ဖောင်တွေပြင် ဖို့ အချိန်မရရင် မခက်ပါလား”

ဤစကားကို ကြားသော် တပ်မှူးကြီး ခေါ်မင်နောင်ရဆွေလည်း နည်းနည်းတော့ တင်းသွားလေသည်။ အင်း….အရေးထဲ ဗိုလ်သန်းရွှေရှေ့မှာ ဖောင်ပြင် ချင်တဲ့ ပုဂ္ဂိုလ်ကလည်း ရှိသေးသကိုး။ သို့သော် အကြီးအကဲပီသစွာ ဒေါသစိတ်ကို ချွန်းနဲ့ ထိန်းအုပ်လိုက်ပြီး အောင်မြင်ခန့်ငြားသော အသံဝါကြီးဖြင့် ဤသို့ မိန့်ကြားလေသည်။

“အစ်ကိုတို့ စိတ်နှစ်ခွ မဖြစ်ကြလင့်။ သေလျှင်ရေဝေး ရှင်လျှင်ကြပ်ပြေး ဆိုတဲ့အတိုင်း စွန့်စွန့်စားစား တိုက်ကြမှသာ တော်ကာကျမည်။ စစ်တို့မည်သည်မှာ အင်အားအနည်းအများသည် ပဓာနမကျ။ လေကြောင်းအသာစီးရမှု…အဲအဲ.. လုပ်ရည်ကိုင်ရည်နှင့် ရဲစွမ်းသတ္တိသာလျှင် အဓိက ဖြစ်ပေသည်”

ဤနေရာတွင် တပ်မှူးလေး စိန်လှပြူး ကလည်း မျက်နှာလိုအားရဖြင့် ကပျာကယာ….

“တပ်မှူးကြီးပြောတာ မှန်ကြောင်းပါ။ သေနင်္ဂဗျူဟာသာလျှင် အရေးအကြီးဆုံးပါ။ ဟိုသီချင်းထဲမှာလည်း ပါတယ်မဟုတ်လား။ ဘာတဲ့… သေနင်္ဂဗျူဟာ ဆိတ်၏အင်္ဂါ…တဲ့။ ရန်သူအင်အားကြီးတယ်ဆိုရင်လည်း ဘာမှုစရာလိုလဲ။ ဆိတ်ဟိုဒင်းဗျူဟာသုံးပြီး ပြေးဝင် ပူးပေါင်းလိုက်တာပေါ့” ......... ဟု ဝင်ရောက် ပြောဆိုလေရာ ခေါ်မင်နောင်ရဆွေ လည်း သူ့လူများအား စိတ်ဆိုးမာန်ဆိုးဖြင့် ဟန့်တားရလေသည်။

“ဟေ့… အားလုံး အတွန့်မတက်ကြနဲ့။ ကြားဖူးတယ်မို့လား။ ခေါ်မင်နောင်ရဆွေ တဲ့။ တဆွေပဲ ရှိတယ်။ ဖောင်တွေဖျက်လိုက်ကြ။ မနက်ဖြန် ၂၀း၁၀ နာရီမှာ တိုက်ပွဲစမယ်။ ဘယ်တောင်ပံမှာ ဗိုလ်သမိန်သေဝုနဲ့ အအိုတော်ယိမ်းတသိုက်က တာဝန်ယူကြ။ ညာတောင်ပံမှာ ဗညားသန်းထိန်းနဲ့ အဖွဲ့ ။ ငါက အလည်ကြောင်းက ချီတော်မူမည်။ ငါတို့၏ ဆုံရပ်သည် ကြပ်ပြေးလွှတ်တော်။ သဘောမတူတာ၊ မရှင်းလင်းတာရှိရင် ဗဟိုကော်မတီအစည်းအဝေး အဲ…ခုကတည်းက ထပြောကြ။ နောက်မှ တောင်ပြောမြောက်ပြော လျှောက်မပြောကြနဲ့။ အဲဒါ ငါလုပ်နေကျ အထာတွေကွ… ရိုး….ဟိုး…ဟိုး…နေပြီ… ဝူးထွား…ဟား….ဟား။”

တပ်မှူးများလည်း တပ်မှူးကြီး၏ စကားကို မလှန်ဝံ့သဖြင့် ရွေးကောက်ပွဲဝင်ရန်… အဲလေ ဖောင်တွေကို ချိုးဖျက်၍ တိုက်ပွဲဝင်ရန် ပြင်ဆင်ကြရလေသည်။

(ကားလိပ်ချ)

ဤသမိုင်းနောက်ခံဝတ္ထုကြီးမှာ အချိန်နှင့် တပြေးညီတည်း ရေးသားစီရင်နေရသည်ဖြစ်၍ နိဂုံးအထိ တထိုင်တည်းရေးသားရန် ဘယ်နည်းနှင့်မျှ မဖြစ်နိုင်သည့်အလျောက် ဤမှာပင် တခန်းရပ်ပါဦးမည်။ ဤဝတ္ထုကို ရုပ်ရှင်ရိုက်ကူးလိုသူများ အမြန်ကမ်းလှမ်းနိုင်ပါသည်။

အဲ…အဲ… ဘလော့ဂ်ဖတ်သူများအနေနဲ့လည်း တချိန်တွင် လိုအပ်လာနိုင်သည့်အလျောက် ဆိတ်သေနင်္ဂဗျူဟာများကို ကျေကျေညက်ညက် လေ့လာထားကြဖို့ တိုက်တွန်းလိုက်ရပါသည်။

မောင်ကြီးတို့ ဘယ်ရွာသား ...

ချစ်တဲ့သူငယ်လေ....
သူငယ်ချင်းကောင်း ယောက်မတို့ရေ။

သူများမောင်မှာ
စစ်သံကြားလျှင် နာဖျားဥပါယ် ခိုကြတယ်။

နှမလေး မယ်တို့မောင်မှာ
စစ်သံကြားလျှင် Proposal ပိုက်ကာ
အလှူ့ရှင်ကို လိုက်လို့ရှာသည်၊
Donor ကနည်း၊ ဒေါ်လာမွဲနှင့်
မဲဆောက်ကို ကူးပါ့မလားတော်။

စစ်မှာတမူ၊ ဒေါ်လာပေး ခိုင်းတဲ့လူကို ယူမလားတော်။
စစ်မှာယွန်းမ၊ ဒေါ်လာပြ ကြိုးဆွဲကြသူကို ရမလားတော်။
စစ်မှာဆွေမျိုး၊ ဘိုးဘွားမောင့်မှာ ရှိသလားတော်။

စစ်မှာတမူ၊ ဒေါ်လာပေး ခိုင်းတဲ့လူကို မယူဘူးဗျာ။ (သူများနဲ့ပြိုင်မလုနိုင်လို့)
စစ်မှာယွန်းမ ဒေါ်လာပြ ကြိုးဆွဲကြသူကို မရဘူးဗျာ။ (contact မရှိလို့)
စစ်မှာဆွေမျိုး ဘိုးဘွားမောင့်မှာ မရှိဘူးဗျာ။ (တပ်ထဲမှာ ဆွေမျိုးရှိရင် အခုအချိန် ပါမစ်ရောင်းစားနေပြီပေါ့ ဟဲဟဲ)

ဒေါ်လာ့သခင်
အလှူ့ရှင်က
မိန့်တော်စာနှင့် အပါချသည်
လိုက်ရတော့မယ်...။

တနှစ်တခါ
ရိုးရာမပျက်
လေလှိုင်းထက်က
ပွဲသိမ်းတိုက်ပွဲ
အာပြဲလုနီး
အချီကြီးတွေ နွှဲခဲ့လေသမို့....

တိုက်ပွဲတရာ...အာ..အာ
အောင်ပွဲမှာ သာစေရေးအတွက်
နှမလေးတို့ ပေးလိုက်ပါ့မယ်...
တွေးမိသမျှ ကြွေးကြော်သံများ....။

ရေရှားပါးမှုမှသည်
လူထုတိုက်ပွဲဆီသို့။

ရေလျှံမှုမှသည်
လူထုတိုက်ပွဲဆီသို့။

မီးမလာမှုမှသည်
လူထုတိုက်ပွဲဆီသို့။

မီးလောင်မှုမှသည်
လူထုတိုက်ပွဲဆီသို့။

အင်းလေးကန် တိမ်ကောမှုမှသည်
လူထုတိုက်ပွဲဆီသို့။

ဝိုင်းစု စကပ်တိုမှုမှသည်
လူထုတိုက်ပွဲဆီသို့။

ထက်ထက်မိုးဦး ပါးရိုက်မှုမှသည်
လူထုတိုက်ပွဲဆီသို့။

ကမ္ဘာ့ဖလား ဘောလုံးပွဲမှသည်
လူထုတိုက်ပွဲဆီသို့။

ဟန်နီဦး ရေကူးဝတ်စုံမှသည်
လူထုတိုက်ပွဲဆီသို့။

ကိုပေါကဗျာမှသည်
လူထုတိုက်ပွဲဆီသို့။...............း-)

ပူးတွဲဖတ်ရှုရန်။..............။ ပွဲသိမ်းငိုချင်း (ကိုပေါ)

ကော်ပီကက်

အိမ်မှာ ကော်ပီကက် တကောင်ရှိတယ်။

“အမေမွေးကတည်းက ဂဏန်း” ဆိုတဲ့ ပို့စ်မှာ သရုပ်ဖော်ပုံကို Paint ထဲမှာပဲ အလွယ်ဆွဲလိုက်မိတယ်။ အဲဒါကို နောက်တနေ့မှာ သမီးမြင်တော့ သူကလည်း Paint ထဲမှာပဲ လိုက်ဆွဲတယ်။ သူကလည်း သူ့စတိုင်လ်နဲ့ သူပေါ့။ ရယ်နေတဲ့ ပါးစပ်တောင် အပိုပါလာသေးတယ်။

သမီးငယ်ငယ်ကတည်းက ရယ်စရာတွေကို အရမ်းတွေးတတ် လုပ်တတ်တယ်။ လွန်ခဲ့တဲ့ တနှစ်လောက်ကဆိုရင် Animation လုပ်လို့ရတဲ့ Software လေးတခု ဝယ်လာပြီး ကျနော့် ဘလော့ဂ်ပို့စ်တွေမှာ ကျနော်လက်တည့်စမ်းတယ်။ အဲဒါကို သမီးမြင်တော့ သူကလည်း လိုက်ပြီး လက်တည့်စမ်းတော့တာပါပဲ။

ဟောဒါက သမီးလက်ရာတခု။ မိုးရေစက်ကျလို့ ဇီးကွက်လန့်သွားတာ ဆိုပဲ။ ကြံကြံဖန်ဖန်။

ဒါကတော့ Pull Game လို့ သူ့ဘာသာ နာမည်ပေးထားတဲ့ သမီးရဲ့ Animation လေးပေါ့။

လူတွေက လွန်ဆွဲသလို ကြိုးစရဲ့ တဖက်တချက်ကနေ ဆွဲနေကြတယ်။ ခဏနေတော့ တဖက်ကလူတွေက ကြိုးစကို ရုတ်တရက် လွှတ်လိုက်တဲ့အခါ ကျန်တဖက်က လူတွေ ဖင်ထိုင်လဲကျသွားတဲ့ပုံလေ။

အဲဒီလို ညစ်ကျယ်ကျယ် အတွေးတွေ သူဘယ်က ဘယ်လို ရလာသလဲမသိဘူး။ ဖအေလုပ်သူ ဒီလောက် တည်တည်တံ့တံ့နေတဲ့ ကြားက အတတ်ကောင်းတွေ တတ်လာတယ်။ ဧကန္တတော့ ငယ်ငယ်က တွန်မ် နဲ့ ဂျယ်ရီ တွေ အကြည့်များပြီး အတုမြင် အတတ်သင်လာတာပဲဖြစ်ရမယ်။

ဒါကတော့ ကျနော့်ပုံတဲ့။ ကြည့်ဦး....ဖိုင်နာမည်ပေးထားတာကိုက “အောင်ချီးတုံး”တဲ့.... ဟင်း။

ပူးတွဲဖတ်ရှုရန်။...........။ သူ့လက်ရာ

“စကားလိမ်”

“ဒီနေ့… မင်း သမီး အင်္ကျီအသစ် ဝတ်ထားတယ်။ အဲဒါ ခလေးကို မလှဘူးလို့ မင်း သွားမပြောနဲ့နော်။ သူက အဲဒီအင်္ကျီနဲ့ သူ့ကိုယ်သူ အရမ်းလှတယ်လို့ ယူဆနေတာ။ မင်းကို ပြချင်လွန်းလို့ အခု သူဝတ်ထားတာတဲ့”

ရုံးမှ အိမ်သို့ အပြန်လမ်းတွင် မဒမ်ပေါက ကျနော့်အား တတွတ်တွတ် မှာကြားနေခြင်းဖြစ်သည်။ ကျနော်က သမီးကို စတတ်နောက်တတ်လွန်း၍ စိတ်အပူလွန်ကာ ကြိုတင် ပြောနေရခြင်းဖြစ်သည်။ သမီးကလည်း သူ့အမေနဲ့ သူ့အဖွားရဲ့ အထင်အမြင်တွေကို အလေးမထား။ ကျနော့်ထံက ချီးကျူးသံ၊ အတည်ပြုသံကိုသာ အစဉ်သဖြင့် ကြားချင်သူဖြစ်သည်။

အိမ်ရောက်တော့ ကရင်သင်တိုင်းအင်္ကျီလိုလို အနီရောင်အင်္ကျီအသစ်ကလေးကို ဝတ်ဆင်ထားသော သမီးက တံခါးလာဖွင့်ပေးသည်။

“ဟာ…. အင်္ကျီအသစ်ကလေးနဲ့ ငါ့သမီး တယ်လှပါကလား”

ဤသည်ကား မဒမ်ပေါ မှာထားသည့်အတိုင်း အတည်ပေါက် ပြောလိုက်ခြင်း။ ပြီးတော့မှ ထုံးစံအတိုင်း မနောက်ရလျှင် မနေနိုင်သဖြင့် နောက်ဆက်တွဲ ထပ်ပြောလိုက်သည်။

“အခုလိုဆိုတော့ သမီးက ကရင်မလေး နော်လဲမူ နဲ့ တူသွားတယ်”

လဲမူ ဆိုသည်မှာ စကားလိမ်ဖြင့် လူမဲ ဟု အသံထွက်သည်။ သမီးကို လူမဲနှင့်တူသည်ဟု ဆိုလိုခြင်း။ သမီးကလည်း ကျနော့်အထာကို ညက်နေသူပီပီ ချက်ချင်းဆိုသလို….

“ဖေဖေကလည်း ဝုတ်ပက် နဲ့ တူတယ်”

ဝုတ်ပက် ဆိုသည်မှာ “ဝက်ပုပ်” ကို ပြောင်းပြန်လှန်ထားသည့် အသံထွက် ဖြစ်ပါသည်။ မကြာခဏဆိုသလို သမီးနှင့် ကျနော်သည် ဗမာစကား စကားလိမ်များကို အပြန်အလှန် စတတ်၊ နောက်တတ်ပါသည်။

“သမီးက အသဲမား (=အသားမဲ)”
“ဖေဖေက ကီပလပ် (=ကပ္ပလီ)”
“သမီးက မဲသွေးခီး (=မီးသွေးခဲ)”

သမီးသည် စကားလိမ်များကို ကျနော့်လောက်တော့ မကျွမ်းကျင်သဖြင့် အတန်ငယ် စဉ်းစားပြီးမှ ပြောရသည်။ ယခုလည်း….

“ဖေဖေက ဖြုတ်……(ဤနေရာတွင် တိုးလို့တန်းလန်း ရပ်ဆိုင်းသွားပြီး ခဏကြာမှ)…..ဗ။ ဖြုတ်ဗ”

“ဘာလဲ….. ဖြုတ်ဗ….ဆိုတာ”

“ဖေဖေကလည်း နုံလိုက်တာ။ ဖြုတ်ဗ…ဖဗြုတ် (ဖားပြုတ်)ပေါ့”

ကျနော်တို့နှစ်ယောက် အရည်မရ အဖတ်မရ အချီအချပြောနေကြသည်ကို ဘေးက နားကြားပြင်းကပ်နေပုံရသော မဒမ်ပေါသည်ပင် ဤနေရာရောက်သောအခါ မနေနိုင်။ တခွိခွိ ရယ်မောလေတော့သည်။

မြန်မာစကားလိမ်များကို နေရာမျိုးစုံတွင် သုံးကြသည်။ နာမည်ကျော် ဦးပုညဆိုလျှင် တေးထပ်ထဲတွင်ပင် ထည့်စပ်လိုက်သေးသည်။

“ကျွတ်တမ်းကွယ် စာမလိပ်ချင်ဘု…..
အဝါဇိတ် မှိုင်းမှောင့်ညစ်ပေ…
ရိုင်းခေါင့် ဖြစ်ထွေ…”။

စာမလိပ်…..စိတ်မလာ။ အဝါဇိတ်….. အဝိဇ္ဇာ။ သြော်… တတ်လည်း တတ်နိုင်တဲ့ ဦးပုညပါကလား။

တသက်တာတွင် ကြုံတွေ့ခဲ့ရသော နာမည်များအနက် စကားလိမ်ဖြင့် ပြောင်းပြန်လှန်လိုက်လျှင် ရယ်စရာဖြစ်လာသော နာမည်(လိမ်)များကို သတိရမိပါသည်။

မလေးရှားတွင် အလုပ်လုပ်ခဲ့ကြစဉ်က ကျနော်တို့အထဲတွင် ကိုဉာဏ်စိုး ဆိုသည့် အစ်ကိုကြီးတယောက်လည်း ပါသည်။ ။ တခါတလေ ကိုဉာဏ့်ကို စချင်နောက်ချင်သည့်အခါ “သခင်ဉာဏ်စိုး” ဟု ခေါ်ကြပါသည်။ အကောင်း ခေါ်ကြခြင်းကား မဟုတ်ပေ။ ပြောင်းပြန်လှန်လိုက်လျှင် “သူခိုးဉာဏ်ဆင်” ဟု အသံထွက်သောကြောင့်ပင် ဖြစ်ပါသည်။

“သက်ထွေး” ဟူသော အမည်မှာလည်း သိပ်မကောင်း။ ပညတ်သွားရာ ဓါတ်သက်ပါပြီး လူပုံအလယ်တွင် အရယ်လွန်မိပါက ဒုက္ခရောက်နိုင်သောကြောင့်ပင်။

၁၉၉၆ ခုနှစ်ဆီက စက်မှုတက္ကသိုလ် ကျောင်းသားလှုပ်ရှားမှုဖြစ်သောအခါ ပါမောက္ခချုပ် ဦးကြင်စိုး၏ ကိုင်တွယ်ပုံကို မကျေနပ်သော ကျောင်းသားအချို့က ကွယ်ရာတွင် ဆရာကြီးနာမည်အား (ပေါက်ပေါက်ရှာရှာ) ပြောင်းပြန်လှန်ခေါ်ဆိုကြသည်ကိုလည်း ကြားခဲ့ဖူးပါသေးသည်။

စကားစပ်မိ၍ ပြောရလျှင် တလောဆီက မငယ်နိုင်၏ ဘလော့ဂ်တွင် “ပေတောကုန်းမှ ကိုပေါတေနှင့် အင်တာဗျူး”ဟု ပို့စ်တခု တင်သောအခါ မိမိကို စောင်းပြောလေသလားဟု အပြေးအလွှား သွားဖတ်ရသေးသည်။ အဘယ်ကြောင့်ဆိုသော် ကျနော်၏ ဇာတိ ချက်မြှုတ် ရွာအမည်မှာ ပေတောရွာ ဖြစ်နေသောကြောင့်ပင်တည်း။ နာမည်ကလည်း ကိုပေါတေ…တဲ့။ ဟွန်း… တူစရာ ရှားလို့။ ပေတောကို ပြောင်းပြန်လှန်ထားပုံရသည်။

ယခုလည်း မြန်မာဘလော့ဂ်လောကမှ ဘလော့ဂါအချို့၏ နာမည်များကို (အားနေသည့်အလျောက်) ပြောင်းပြန်လှန်ကြည့်ရာ ရယ်ချင်စရာ အသံများထွက်လာသည်ကို တွေ့ရပါသည်။

နှစ်ကျပ်ခွဲအားကိုးဖြင့် စားကောင်းသောက်ဖွယ်ရာ ဓါတ်ပုံများကို တင်ဆက်နေသော ဘလော့ဂါ “သက်ဝေ” ၏ အမည်ကိုတော့ ခင်မင်သောအားဖြင့် ပြောင်းပြန်မလှန်ဘဲ ချန်လှပ်ထားခဲ့ရန် ဆုံးဖြတ်လိုက်ပါသည်။ အလားတူပင် မှတ်သားဖွယ်ရာ ထိုထိုစာကို တင်ဆက်လေ့ရှိသည့် “ကိုဧရာ” အားလည်း လေးစားသောအားဖြင့် ပြောင်းပြန်မလှန်မိရန် သန္နိဋ္ဌာန်ချလိုက်ပြန်ပါသည်။

“ချိုသင်း”ဟူသည့် ကဗျာဆန်သော နာမည်မှာမူ ပြောင်းပြန်အလှန် မတော်ပါက “ချဉ်သိုး” ဟု ဆန့်ကျင်ဖက် အနက်အဓိပ္ပါယ်ပင် ထွက်သွားတတ်ကြောင်း သတိပြုမိပါသည်။ စကားလိမ်အမှန်မှာ “ချင်းသို” ဖြစ်ပါသည်။

ခေဦးမင်…ကား….. ခေသော ဦးမင် မဟုတ်ချေပါတကား။

လစ်သူ… ဆိုသည်မှာ လစ်ပြေးသူ (သို့မဟုတ်) အလစ်သုတ်သူ (သို့မဟုတ်) အစိုးရဌာနတွင် ဝင်ရောက်လုပ်ကိုင်ဖူးသူသာ ဖြစ်ရချေမည်။

ညဉ့်ငှက်တို့အကြောင်းကို ခရေစေ့တွင်းကျ မြူးမြူးကြွကြွ ရေးသားတင်ဆက်တတ်သူ စိန်ရတုမှတ်တမ်းပိုင်ရှင်ကြီးအား “ကောက်ကြီးကျိုး”ဟု စကားလိမ်ဖြင့် ပြောင်းပြန်လှန် ခေါ်ဆိုရလျှင် လိုက်ဖက်မည်လော မသိ။

ဤသို့လျှင် (အားနေသည့်အလျောက်) ရောက်တတ်ရာရာ ရေးလိုက်ရပါသည်။

ခင်ဗျားဟာ
မကောင်းမြင်စိတ် များလွန်းတယ်။
ကျုပ်သွားတတ်သလို သွားနေတာ မြင်ရင်ပဲ
ခင်ဗျားကို ကန့်လန့်တိုက်တယ်လို့ ထင်တတ်တယ်။
ကျုပ်ဟာ အမေမွေးကတည်းက ဂဏန်း
ကန့်လန့်သွားတာ ဘာဆန်းလို့လဲ။

ခင်ဗျားဟာ
ကဲ့ရဲ့သဂြုင်္ိဟ် စကားတင်း ဆိုတတ်တယ်။
ကျုပ်လက်မောင်းညောင်းလို့ မြှောက်မိရင်တောင်
ဒီကောင် လက်မထောင်ပြန်ပြီတဲ့။
ကျုပ်ဟာ အမေမွေးကတည်းက ဂဏန်း
လက်မထောင်တာ ဘာဆန်းလို့လဲ။

ခင်ဗျားဟာ
မယုံသင်္ကာစိတ် များလွန်းတယ်။
ကျုပ်လမ်းသွားရင်း စကားပြောရင်တောင်
စောင်းပြောတယ်လို့ ထင်ပြန်တယ်။
ကျုပ်ဟာ အမေမွေးကတည်းက ဂဏန်း
စောင်းပြောတာ ဘာဆန်းလို့လဲ။

ခင်ဗျားဟာ
လိုရာဆွဲပြီး ထင်တတ်တယ်။
ကျုပ်စကားမပြောဘဲ ငြိမ်နေတာတောင်
ဒီကောင် အမြှုတ်တစီစီထွက်အောင် ပြောပလေ့စေတဲ့။
ကျုပ်ဟာ အမေမွေးကတည်းက ဂဏန်း
အမြှုတ်တစီစီထွက်တာ ဘာဆန်းလို့လဲ။

ရေးသူ- ကိုပေါ။

မြန်မာပြည်လို့ ခေါ်တဲ့နေရာ

သနပ်ခါးအဖွဲ့မှ စီစဉ်တည်းဖြတ်သော “မြန်မာနိုင်ငံ-ငြိမ်းချမ်းရေးအတွက် အမျိုးသမီးများ၏ အသံများ” စာအုပ်ကို ဒေါ်အောင်ဆန်းစုကြည် ၆၅ နှစ်ပြည့် မွေးနေ့ နှင့် မြန်မာနိုင်ငံအမျိုးသမီးများနေ့ အထိမ်းအမှတ်အဖြစ် ပြီးခဲ့တဲ့ သတင်းပတ်အတွင်းက ထုတ်ဝေခဲ့ပါတယ်။ အဲဒီစာအုပ်ထဲမှာ မဒမ်ပေါရဲ့ ကဗျာတပုဒ်ကို ဖော်ပြထားတဲ့အတွက် ကျနော့်ဘလော့ဂ်မှာ မဒမ်ပေါကိုယ်တိုင် ရေးခြစ်ထားတဲ့ ပုံကလေးနဲ့အတူ ပြန်လည်မျှဝေလိုက်ပါတယ်။

A Place Called “Burma”

Prison without iron bars…
People always live in fear…
Midnight knocks you’ll get used to hear…
Heavy hearts are weeping with silent tears…and
Hope is the only thing people have for years…
That’s a place we call “Burma”

(by MDP)

---------------------------------

“မြန်မာပြည်”လို့ ခေါ်တဲ့နေရာ

သံတိုင်မဲ့ အကျဉ်းထောင်လို့
တင်စားရမယ့်နေရာ … …။

လူတွေဟာ
အမြဲ အကြောက်တရားနဲ့ပဲ နေထိုင်ကြရတဲ့ နေရာ … …။

သန်းခေါင်ယံ တံခါးခေါက်သံတွေကိုတောင်
နေသားကျလို့ ယဉ်ပါးကြရတဲ့ နေရာ … …။

လေးလံနေတဲ့ နှလုံးသားတို့
အသံတိတ် ကျိတ်လို့ ငိုကြွေးကြရတဲ့ နေရာ … …။

“မျှော်လင့်ချက်”ကလွဲလို့ ဘာဆိုဘာမှ မရှိဘဲ
ကာလရှည်ကြာ နေခဲ့ကြရတဲ့ နေရာ … …။

အဲဒီနေရာဟာ
ငါတို့ “မြန်မာပြည်”လို့ ခေါ်နေကြတဲ့ နေရာတခုသာ … …။

(ရေးသူ-မဒမ်ပေါ)

ပူးတွဲဖတ်ရှုရန်။...............။ Burmese women speak up for peace to mark Suu Kyi's 65th birthday (The Nation)

Symphony No. 5

ဇွန်လ ၁၉ ရက်။
ဒေါ်အောင်ဆန်းစုကြည်ရဲ့ ၆၅ နှစ်ပြည့် မွေးနေ့။

ဒေါ်အောင်ဆန်းစုကြည်မွေးနေ့အတွက် ဘာပို့စ်တင်ရမလဲ စဉ်းစားလိုက်တဲ့အခါ Walt Disney က ထုတ်လုပ်တဲ့ Fantasia 2000 ထဲက Beethoven's Symphony No.5 တေးသွားနဲ့ သရုပ်ဖော် Animation လေးကို ထူးထူးခြားခြား သွားသတိရမိတယ်။ ဒါနဲ့ ယူကျု မှာ ရှာဖွေပြီး မွေးနေ့အမှတ်တရအဖြစ် တင်လိုက်ပါတယ်။

ဒီလင့်ခ်မှာ သွားကြည့်လို့လည်း ရပါတယ်။

ဒေါ်အောင်ဆန်းစုကြည်တယောက် မွေးနေ့မှာ စိတ်ရောကိုယ်ပါ ကျန်းမာချမ်းသာစေကြောင်း ဆုမွန်ကောင်း တောင်းလိုက်ပါတယ်။ လွတ်လပ်တဲ့ မြန်မာပြည်မှာ သားငယ်နှစ်ဦးနဲ့တကွ မြေးငယ်လေးတွေနဲ့ပါ အမြန်ဆုံး ပြန်လည် ဆုံးဆည်းနိုင်ပါစေကြောင်း ထပ်ဆင့်ဆုမွန်တောင်းလိုက်ပါတယ်။

ဒေါ်အောင်ဆန်းစုကြည်ရဲ့ ကြီးမြတ်မှု၊ ဖြူစင်မှု၊ သတ္တိပြောင်မြောက်မှု၊ မေတ္တာ၊ ဂရုဏာကြီးမှုတို့ကို အစဉ် လေးစားဦးညွှတ်လျက်....

ကိုပေါ။
(၁၉ ရက်၊ ဇွန်လ၊ ၂၀၁၀ ခုနှစ်)

ခို

ရေးသူ/ဓါတ်ပုံ- မဒမ်ပေါဇူးဇင်။
စာစီစာရိုက်- ကိုပေါဇူးဇင်။

ငှက်ကလေးတွေကို ချစ်တယ်။

ဘာကြောင့်ချစ်တာလဲ ဆိုရင်တော့ တိတိကျကျ မဖြေတတ်ဘူး။ “ချစ်လို့ ချစ်တာ” လို့ဘဲပြောရမယ်ထင်တယ်။ ငယ်ငယ်လေးထဲက ပုံဆွဲရင် ငှက်ပုံလေးတွေ အမြဲဆွဲနေမိတယ်။

ငှက်ကလေးတွေ သစ်ကိုင်းပေါ်မှာ နားနေတာ.. ဒါမှမဟုတ်…လွတ်လွတ်လပ်လပ် ပျံနေတာကို ငေးကြည့်ရတာ နှစ်သက်တယ်။ သူတို့လေးတွေကို ဓါတ်ပုံလိုက်ရိုက်ရတာမျိုးဆို တခါမှ ပင်ပန်းတယ်လို့ မခံစားရဘူး။ စင်ကာပူက Bird Park ရောက်တိုင်း ငှက်ပုံလေးတွေ ချွေးတလုံးလုံးနဲ့ လိုက်ရိုက်ရတာ ပျော်တယ်။

*************

လွန်ခဲ့တဲ့ နှစ်လလောက်က ညနေစောင်းတွေမှာ အမှိုက်သွားပစ်တိုင်း အံဖုံးရှိတဲ့နေရာ နဲ့ မလှမ်းမကမ်းက ဝရန်တာလက်ရန်းမှာ ခိုတကောင် နားနေတတ်တာကို သတိထားမိတယ်။

ဘာရယ်တော့မဟုတ်ပါဘူး၊ ငှက်မြင်ရင် မကြည့်ဘဲမနေနိုင်တာကြောင့်ပါ။ အဲဒီနေရာလေးကလည်း အမှိုက်ပစ်တဲ့နေရာဆိုပေမယ့် အိမ်နီးချင်း တရုတ်ကြီးရဲ့ကောင်းမှုကြောင့် သစ်ပင်ပန်းပင်လေးတွေ စိမ်းစိမ်းစိုစိုနဲ့ ပန်းခြံအငယ်စားလေးလိုပါပဲ။ ဒါကြောင့် ဒီခိုဟာ နေရာလေးကို သဘောကျလို့ အိပ်တန်းလာတက်တယ်လို့ဘဲထင်လိုက်မိတယ်။ ဒါပေမယ့် တရက် အမှိုက်သွားပစ်ရင်းနဲ့ ဝရန်တာလက်ရမ်းမှာ ချိတ်ထားတဲ့ ပန်းအိုးထဲက ခိုဥလေး နှစ်လုံးကို တွေ့လိုက်ရတဲ့အချိန်မှာတော့ ဒီခိုလာပြီး ရစ်သီရစ်သီလုပ်နေရတဲ့ အကြောင်းရင်းကို သဘောပေါက်သွားပါတော့တယ်။

ငှက်တွေဟာ သူတို့ရဲ့ အသိုက်တွေကို လူတွေ အလွယ်တကူနဲ့ လက်လှမ်းမမှီတဲ့နေရာတွေမှာ ဆောက်တတ်ကြတယ်။ စင်ကာပူမှာဆိုရင်တော့ MRT ရထားလမ်းနဲ့ ရထားလမ်းဒေါက်တိုင်တွေကြားက ကပ်သီးကပ်သပ် နေရာလေးတွေမှာ များသောအားဖြင့် တွေ့ရတတ်တယ်။

ဒီ ခိုမ ကျမှ ပန်းအိုးထဲမှာ ကြံကြံဖန်ဖန် အသိုက်လာလုပ်လေတယ်။ အိမ်တိုင်းက တနေ့ အနည်းဆုံး တခေါက်၊ နှစ်ခေါက် အမှိုက်သွားပစ်ကြတဲ့နေရာမှာဆိုတော့ ဒီခိုနှယ်.. လူမကြောက်တတ်လိုက်တာ....လို့ တွေးမိတယ်။ အင်းလေ……ဒီမှာကလည်း ငှက်တွေ့ရင် “ ဒါ...ကြော်စားလို့ရတယ်” လို့ တွေးမယ့်လူ ရှားပေတာကိုး။ စင်ကာပူမှာ ငှက်တွေအားလုံး လွတ်လပ်ခွင့်ရှိကြပါတယ်။ ကျီးကန်းတွေကတော့ ချွင်းချက်ပေါ့။ သူတို့ကို သက်ဆိုင်ရာက လေသေနတ်နဲ့ မကြာမကြာ လိုက်ပစ်တာကြုံဖူးတယ်။

*************

အသိုက်ကို လူသူကင်းဝေးပြီး လုံခြုံတဲ့နေရာမှာ လုပ်ရမယ့်အစား ပန်းအိုးကို အသိုက်လာလုပ်တာကိုက လွန်လှပြီ။ ဒီကြားထဲ အသိုက်အတွက် သစ်ကိုင်းခြောက်ကလေးတစ၊ တံမြက်စည်းစလေးတမျှင်တောင် ချီသယ်မလာဘဲ… ပန်းအိုးထဲက မြေကြီးပေါ်မှာ ဥနှစ်လုံးကို ဒီအတိုင်းကြီး ဥ ချ သွားတာ တွေ့ရတော့ ဒီခိုမ ပျင်းပုံကို သြချမိပါတယ်။

တိုက်တထပ်တည်းမှာ နေကြသူတွေအားလုံးလိုလိုကတော့ ဒီခိုမနဲ့ ခိုဥနှစ်လုံးကိစ္စကို စိတ်ဝင်စားကြတာ တွေ့ရတယ်။ နဂိုက ဓါတ်လှေကားထဲ ဆုံကြရင်တောင် ပြုံးပြဖော်မရဘဲ ဘာသိဘာသာနေတတ်သူတွေဟာ ဒီခိုတွေကို အကြောင်းပြုလို့ နှုတ်ဆက်ပြီး စကားစမြည် ပြောစရာ အကြောင်းဖန်လာပါတော့တယ်။

ပန်းအိုးပိုင်ရှင် တရုတ်ကြီးကတော့ မျက်နှာအပွင့်ဆုံးပေါ့။ သူ့ပန်းအိုးကို ရွေးပြီး ခိုမက ဥသွားတာကို သူက ဂုဏ်ယူဝမ်းသာနေပုံရတယ်။ သွားရင်းလာရင်း လှမ်းကြည့်လိုက်ရင် သူ့ကို ပန်းအိုးနားမှာ အခြားတယောက်ယောက်နဲ့ ဟောင်ဖွာ ဟောင်ဖွာ စကားပြောနေတာ တွေ့ရတတ်တယ်။ မျက်နှာကလည်း သကာရည်လိမ်းထားတဲ့ မျက်နှာကြီးနဲ့ပေါ့။ မျက်နှာချင်းဆိုင်အိမ်က လူဆိုလည်း မနက်တိုင်း ရုံးမသွားခင် ဓါတ်လှေကားစောင့်ရင်း ခိုဥကို အရင် အပြေးအလွှား သွားကြည့်ရတာ အမော။ ကျမ ညနေရုံးက ပြန်လာလို့ ခိုဥ သွားကြည့်ဖြစ်တဲ့နေ့တွေဆို ပန်းအိုးနားမှာ ပိုင်ရှင် အဖိုးကြီးနဲ့လည်း စကားပြောဖြစ်တယ်။ အဲဒီအခါမျိုးမှာ… “ဥက ပေါက်ကာနီးပြီး ထင်တယ်” အစချီပြီး ဘာညာသာရကာ ပြောကြတာပေါ့လေ…။

ဥ ကမြေကြီးပေါ်မှာဆိုတော့ အကောင်လေးတွေပေါက်လာရင် အေးနေလိမ့်မလား တွေးမိတာနဲ့ မနေသာလို့ ရုံးနားက သစ်ကိုင်းခြောက်သေးသေးတွေ၊ သစ်ရွက်ခြောက်တွေ ကောက်လာပြီး အသိုက်ကို ကူဆောက်ပေးလိုက်သေးတယ်။ နောက်တနေ့ အိမ်က အထွက် မျက်နှာချင်းဆိုင်အိမ်ကလူရဲ့ အမေ နဲ့ ပက်ပင်းတိုးလို့ ပြုံးပြနှုတ်ဆက်လိုက်တော့ အဖွားကြီးကလည်း ပြန်နှုတ်ဆက်ရင်း စကားစလာပါတယ်။ သူ့သားက သူ့ကို “အမေရေ…ခိုမတော့ အသိုက်လုပ်ဖို့ သစ်ရွက်တွေ သယ်လာပြီ”…လို့ လာပြောသတဲ့။ အဲဒါနဲ့ သူက “ဒီခိုမ သယ်လာတာတော့ မဖြစ်နိုင်ဘူး။ ပန်းအိုးအဖိုးကြီး ဒါမှမဟုတ် အိမ်ရှေ့အိမ်က တယောက်ယောက် လုပ်ပေးတာနေမှာပေါ့”..လို့ ပြန်ပြောလိုက်ရသေးတယ်ဆိုပဲ။ ဒီခိုမပျင်းပုံအကြောင်း တထပ်လုံး သတိထားမိနေတာကို သိလိုက်ရတဲ့အတွက် ပြုံးမိသေးတယ်။

*************

ဘယ်လိုပဲ ပျင်းတယ်ဆိုပေမယ့် ဥတွေကိုတော့ ခိုဖိုတလှည့် ခိုမတလှည့် တစိုက်မတ်မတ် ဝပ်ဖော်ရလို့ တော်သေးတယ်ပြောရမယ်။

ဒီလိုနဲ့ ခိုကလေးနှစ်ကောင် ပေါက်လာပါတယ်။ ဥက ပေါက်ကာစ အသည်းယားစရာ အရုပ်ဆိုးဆိုး ငှက်ပေါက်စလေးတွေပေါ့။

ပေါက်ပြီး မကြာလိုက်ပါဘူး။ တရက်နှစ်ရက်လောက်လည်း နေရော.. ခိုထီးရောခိုမပါ ပျောက်သွားလိုက်ကြတာ၊ တော်တော်နဲ့ ပြန်ပေါ်မလာတော့ပါဘူး။

အဲဒီမှာတင် ဟိုပန်းအိုးအဖိုးကြီးခမြာ အလုပ်တွေ ပိုတော့တာပေါ့။ လေတိုက်တဲ့ဒဏ်က ကာကွယ်ဖို့ရယ်၊ ခိုလေးတွေ အောက်ပြုတ်မကျအောင်ရယ် စက္ကူကတ္ထူပြားတွေ သုံးပြီး အသိုက်ကို ပြုပြင်ပေးရ၊ ခိုလေးတွေကို စောင့်ရှောက်ရနဲ့။ အမှိုက်သွားပစ်ရင်းနဲ့ဆုံရင်လည်း သူ့ပါးစပ်က “ဒီ ခိုမ၊ ကလေးတွေကို ပစ်ထားပြီး ဘယ်သွားနေပါလိမ့်” ဆိုတာမျိုး တဖျစ်တောက်တောက်နဲ့ ပြောနေတတ်သေးတယ်။

နောက်ထပ် နှစ်ရက်လောက်နေတော့ ခိုလေးတကောင် သေသွားတယ်။ အမေရဲ့ ကိုယ်ငွေ့မရတာလဲ ပါမှာပေါ့လေ။

အဖိုးကြီးလည်း ကျန်တဲ့တကောင်ကို တအားဂရုစိုက်တော့တာ။ ရေခွက် နဲ့ ပေါင်မုန့်စလေး တွေကိုလည်း အသိုက်နားမှာ အဆင့်သင့် ထားပေးတယ်။ ခိုကလေးကတော့ သိပ်စားတာကို မတွေ့ရဘူး။ တချိန်လုံး အိပ်ချည်းနေတာပဲ။

အသက်ပြင်းတယ်ပဲ ပြောရမလား။ ကျန်တဲ့တကောင်ကတော့ တနေ့တခြား အကောင်ထွားလာတယ်။ သီတင်းနှစ်ပတ်လောက်ကြာတော့ ခိုလေးမှာ အမွှေးအတောင်လေးတွေ တော်တော်စုံလာပြီး ပေါက်ကာစကလောက် အကြည့်ရမဆိုးတော့ဘူး။

တနေ့ ရုံးက ပြန်လာတော့ သမီးက ဆီးပြောတယ်။ “မေမေရေ ဒီနေ့ ခိုမ သူ့ကလေးကို ပြန်လာကြည့်တယ်” တဲ့။ သြော်....ကောင်းပါလေ့။ ဒီလိုဆိုတော့လည်း ခိုမက ထင်သလောက်တော့ မဆိုးသေးဘူးပေါ့။ အစက ခိုကလေးကို ဘယ်သူအပျံသင်ပေးမလဲလို့ စိုးရိမ်နေခဲ့တာ။ သူ့မှာ မိခင်မေတ္တာတော့ ကျန်သေးပုံရတယ်။

*************

ပြီးခဲ့တဲ့ စနေနေ့ရုံးပိတ်ရက်၊ မနက်စောစော ကွန်ပြူတာရှေ့ထိုင်နေတုန်း ပြူတင်းပေါက်နားမှာ ငှက်တောင်ပံ ခတ်သံတွေ တဖျတ်ဖျတ် ကြားနေလို့ အပြင်ကို လှမ်းကြည့်လိုက်တော့ သူ့ကို အပျံစသင်တဲ့နေ့ဖြစ်နေပါရောလား။ ခိုအဖေနဲ့ ခိုအမေမှာ သူ့ကို ပျံဖို့ နားချရင်း တော်တော် အလုပ်ရှုပ်နေပုံရတယ်။ သူကတော့ လက်ရန်းပေါ်မှာ နားနေတာ၊ တုပ်တုပ်မှ မလှုပ်ဘူး။

ဒီခိုကလေး စပျံတဲ့ အချိန်လေးကို အမိအရ မှတ်တမ်းတင်ချင်လို့ ကင်မရာကို အမြန်ပြေးယူလိုက်တယ်။

အပျံသင်တာကို ချောင်းရိုက်တဲ့နေရာကတော့ ဒစ္စကာဗာရီတို့ ဘီဘီစီတို့ထဲကလို တောထဲ တောင်ထဲမှာ မဟုတ်ဘဲ ရေချိုးခန်းပြူတင်းပေါက် သေးသေးလေးက တဆင့်ပါ။ လူတရပ်ထက် မြင့်တဲ့ ပြူတင်းပေါက်မို့ ခွေးခြေခုံအပုလေးပေါ်မှာ မတ်တတ်ရပ်၊ တရုတ်ကပ် မှန်ပြားပေါ် ကင်မရာကို မေးတင်ပြီး ငြိမ်ငြိမ်လေး စောင့်ခဲ့ရတယ်။

တနာရီ နီးပါးလောက် ကြာလာတဲ့အထိ ဒင်းကလေးက မပျံသေးတော့ လူကလည်း ညောင်း၊ ကင်မရာပေါက်ထဲ ချောင်းရလွန်းလို့ မျက်စိတွေကလည်းပြာ၊ ချွေးတွေကလည်း တပြိုက်ပြိုက်နဲ့ပေါ့။

ခိုနှစ်ကောင် ခမြာလည်း သူတို့ ကလေးရှေ့က ဟန်ရေးပြပြီး ပျံပြနေရတာ အကြိမ်ပေါင်း မနည်းတော့ဘူး။

နောက်ဆုံးတော့ သူ စ ပျံပါတော့တယ်။

ခဏနေတော့ ရုတ်တရက် ရေချိုးခန်းပြူတင်းပေါက်နဲ့ အနီးဆုံး လက်ရန်းဘောင်ပေါ်မှာ လာနားပါတယ်။

သူ့အဖေနဲ့အမေကတော့ အသိုက်နေရာကနေ သူ့ကို ပြန်စောင့်နေကြပါပြီ။

နောက်ဆုံးမှာ သူလည်း သူ့အသိုက်ဆီကို ပျံသွားပါတော့တယ်။

နောက်တရက် နှစ်ရက်လောက်နေရင် ပန်းအိုးအသိုက်ကိုစွန့်ပြီး သူဟာ အရွယ်ရောက်တဲ့ ခိုကလေးတကောင်အဖြစ် အဝေးကို ပြန်ထွက်သွားတော့မှာပါ။ သွားရင်းလာရင်း တိုက်ခေါင်မိုးပေါ်မှာ၊ MRT လမ်း လက်ရန်းဘောင်တွေပေါ်မှာ ခိုကလေးတွေကို မြင်မိရင် ပန်းအိုးထဲက ခိုကလေးများလားလို့ သတိတရ တွေးဖြစ်နေဦးမယ် ထင်ပါရဲ့။

ဘွန်ဆိုင်းပင်တဲ့။
သစ်ပင်တော့ သစ်ပင်ပါဘဲ။
ဒါပေမယ့် သစ်ပင် အငယ်စား၊ အပုစားလေးပေါ့။
ဧည့်ခန်းမတွေ၊ ဥယျာဉ်တွေထဲမှာ ပသာဒအတွက် တကူးတက ပြုပြင်မွေးမြူထားတဲ့ သစ်ပင်ကလေးတွေပေါ့။

ဘွန်ဆိုင်းပင်လေးတွေ အခုလို ပုနေ ညှက်နေတာဟာ မျိုးရိုးဗီဇကြောင့် မဟုတ်ရပါဘူးတဲ့။ အကိုင်း၊ အခက်၊ အရွက် နဲ့ အမြစ်တွေကို လွတ်လွတ်လပ်လပ် မကြီးထွားနိုင်အောင် ကာလ ရှည်ကြာ ပြုပြင်ပုံသွင်းခံထားရလို့သာပါတဲ့။

သမိုင်းကြောင်းကို ပြန်ကြည့်ရင် ဘွန်ဆိုင်းပင်ရဲ့အစဟာ ဟိုးလွန်ခဲ့တဲ့ နှစ်ပေါင်း ၂၀၀၀ ခန့် တရုတ်ပြည်မှာ ဟန်မင်းဆက် လက်ထက်ကတည်းက စခဲ့တယ် လို့ ယူဆကြပါသတဲ့။ နောက်ပိုင်းမှာတော့ တရုတ်၊ ဂျပန်၊ ကိုရီးယားနဲ့ ဗီယက်နမ်တို့မှာ ဘွန်ဆိုင်းပင်ကို အသွင် အမျိုးမျိုးနဲ့ တွေ့လာကြရတယ်။

သစ်ပင်တွေသာ ချုပ်ချယ်ပုံသွင်းခံရတာလား.......။

အချို့သော လူမှုအသိုင်းအ၀ိုင်း၊ အချို့သော နေရာဒေသမှာ ရှင်သန်ကြီးပြင်းရတာဟာလည်း လူဖြစ်ပေမယ့် ဘွန်ဆိုင်းပင်နဲ့ မခြားပါကလားလို့ တွေးမိတယ်။

လွတ်လပ်စွာ ရှင်သန်ဖွံ့ထွားခွင့်မရအောင် မိမိကြီးပြင်းရာ ပတ်ဝန်းကျင်၊ ယဉ်ကျေးမှုနဲ့ လူ့အဖွဲ့အစည်းက နှစ်ရှည်လများဆိုသလို ပြုပြင်ပုသွင်းတာကို လှလှကြီး ခံလိုက်ရပြီးတဲ့နောက်.... ကိုယ်တိုင် ဘွန်ဆိုင်းပင်ကလေးလို ပုညှက်ကြုံလှီသွားသလားလို့တောင် ခံစားမိပါရဲ့။

ကျနော်တို့တတွေဟာ ဘွန်ဆိုင်းပင်လို လူသားတွေလား။

တချို့ကတော့ လူလိမ္မာလေးတွေ၊ လူယဉ်ကျေးလေးတွေ။
တချို့ကတော့ ရိုးရာအစွဲအလမ်းကြီးသူလေးတွေ၊ လူကြောက်ကလေးတွေ။
တချို့ကတော့ လူရိုးလူအ ကလေးတွေ.....။
တချို့ကတော့ ကိုယ့်ယဉ်ကျေးမှုသာ အကောင်းဆုံးလို့ ထင်မှတ်နေသူတွေ။
တချို့ကတော့ ငယ်ငယ်ကတည်းက သင်ပေးလိုက်တဲ့ ဓလေ့ထုံးစံတွေဟာ ထာဝရ မှန်ကန် ကောင်းမွန်နေမယ်လို့ တရားသေ မှတ်ယူနေကြသူတွေ။

တချို့ကျတော့ ကိုယ့်ဘာသာ ချမှတ်ထားတဲ့ စည်းမျဉ်းစည်းကမ်းတွေ၊ စံချိန်စံညွှန်းတွေ၊ ကျင့်ဝတ်သိက္ခာတွေ၊ တာဝန်ဝတ္တရားတွေ ကြားမှာ ကိုယ့်ဘာသာ ပိတ်မိပြီး မွန်းကြပ်နေတဲ့ ရှားရှားပါးပါး လူ့ဘွန်ဆိုင်းလေးတွေ....။

ဒါပေမယ့် သစ်ပင်တွေမှာ ဘွန်ဆိုင်းပင်ကို အလှအပ ပသာဒအဖြစ် ရှုမြင်တတ်သူတွေရှိသလို လူ့အဖွဲ့အစည်းမှာလည်း ကြုံလှီနေတဲ့ လူ့အဖွဲ့အစည်း (Retarded Society)ကိုမှ ပသာဒ ဖြစ်နေသူတွေလည်း ရှိလေရဲ့။

ဧည့်ခန်းထဲက ဘွန်ဆိုင်းပင်ကလေးသာ စကားပြောတတ်ခဲ့မယ် ဆိုရင်....

“ဥယျာဉ်မှူးကြီးခင်ဗျား၊ ကျနော့်ကို သဘာဝအတိုင်းသာ လွတ် လွတ်လပ်လပ် ရှင်သန်ကြီးထွားခွင့်ပေးပါ။ ကျနော်ဟာ တောင်ကုန်းထက်မှာ အရိုးပြိုင်းပြိုင်း အထီးကျန်ကျန် အရုပ် ဆိုးဆိုး ပသာဒမရှိတဲ့ သစ်ပင်ကြီးဘ၀နဲ့ နိဂုံးချုပ်ရလည်း ချုပ်ရပါစေတော့။ ဒါပေမယ့် သီးချိန်တန်သီး၊ ပွင့်ချိန်တန်ပွင့်။ အကိုင်း အခက် အလက်တွေ ဝေေ၀စည်စည်နဲ့ လေပြည်ထဲမှာ၊ မုန် တိုင်းထဲမှာ၊ မိုးသည်းထဲမှာ၊ နေပူကျဲထဲမှာ လောကဓံကို ကြံ့ ကြံ့ခံရင်း သူလိုငါလို သာမန် သစ်ပင်တပင်ဘ၀နဲ့ဘဲ ရှင်သန် ပါရစေခင်ဗျား” .....လို့များ ပြောရှာလေမလားမသိ။

တကယ့်တကယ်မှာတော့ သစ်ပင်တွေက စကားမပြောတတ်ရှာလို့ ဒီလို ဖွင့်မပြောကြပါဘူး။ လူတွေမှာတော့ စကားပြောတတ်ပေမယ့် လူ့ဘွန်ဆိုင်းပင်ဘ၀မှာပဲ ပျော်မွေ့နေကြသူတွေလည်း ဒုနဲ့ဒေး ပါ။

(၂၀၀၈ ခု ဧပြီလတုန်းက ရေးတင်ခဲ့တဲ့ “ဘွန်ဆိုင်း”ဆိုတဲ့ ပို့စ်ကို နည်းနည်းပြုပြင်ပြီး ပြန်တင်လိုက်ပါတယ်။)

ဒေါ်အောင်ဆန်းစုကြည်ရဲ့ မှတ်သားဖွယ် စကား

ရှေ့ပို့စ်ထဲက ကွန်မင့်ကဏ္ဍမှာ အမည်မသိတယောက်က လာရောက် ညွှန်းဆိုသွားလို့ ဒေါ်အောင်ဆန်းစုကြည်ရဲ့ စကားလေးကို ရှာဖွေကြည့်ရှုမိပါတယ်။ လက်တလော ကျနော်တို့တွေ ရေးသားနေကြတဲ့ အကြောင်းအရာနဲ့ ထပ်တူထပ်မျှကျပြီး ကျနော်ကိုယ်တိုင်လည်း နှစ်ခြိုက်မိတဲ့အလျောက် ပို့စ်အတိုလေး အဖြစ် သီးသန့်တင်လိုက်ပါတယ်။

"It is not a sacrifice, it's a choice. If you choose to do something, then you shouldn't say it's a sacrifice, because nobody forced you to do it"
- Aung San Suu Kyi-

မြန်မာလို ဘာသာပြန်ဆိုကြည့်ရမယ်ဆိုရင်.....

“ဒါဟာ စွန့်လွှတ်အနစ်နာခံတာ မဟုတ်ပါဘူး။ ဒါဟာ ရွေးချယ်မှုပါပဲ။ သင်ဟာ တစုံတခုကို ပြုလုပ်ဖို့ ရွေးချယ်ခဲ့တယ်ဆိုရင် ဒါကို အနစ်နာခံတာပါလို့ သင့်အနေနဲ့ မပြောသင့်ဘူး။ ဘာကြောင့်လဲဆိုတော့ ဘယ်သူကမှ သင့်ကို ဒါလုပ်ရမယ်လို့ အတင်းဖိအားမပေးခဲ့တဲ့ အတွက်ဖြစ်ပါတယ်။”

ဒီ စကားကို ခေါင်းဆောင်တွေရဲ့ မှတ်သားဖွယ်ရာ စကားကောက်နှုတ်ချက်တွေမှာ ဖော်ပြထားခြင်း ခံရတာကို တွေ့ရပါတယ်။

ပူးတွဲဖတ်ရှုရန်။

(၁) “နှစ်သက်မိသော သူ့အမြင်”
(၂) ကျေးဇူးရှင် မှိုလိုပေါတဲ့ လောကကြီးအလယ်မှာ

“နှစ်သက်မိသော သူ့အမြင်”

ကျေးဇူးတရားအကြောင်း နောက်ထပ် ကိုယ်တိုင်ရေး ပို့စ်တပုဒ်မရေးခင်စပ်ကြား ရီတာကို ဘလော့ဂ်က သူမရဲ့ ကွန်မင့်တွေကို ပို့စ်အနေနဲ့ တင်ချင်ပါတယ်။

ဂါရဝေါစ.... ရိုသေထိုက်သောသူကို ရိုသေခြင်းဆိုတာမှာ အသက်ကြီးသူတွေကိုချည်း ရိုသေရမယ်လို့ ကျနော် မယူဆချင်ပါဘူး။ ကျနော့်တသက်တာမှာ တွေ့ကြုံဖူးသလောက် လူကြီးဖြစ်နေပြီး သုံးစားမရတဲ့လူတွေ တပုံကြီးရှိသလို ငယ်ရွယ်သူတွေဖြစ်ပေမယ့်လည်း လေးစားအပ်တဲ့လူတွေ ရှိနေတာ မကြာခဏ ကြုံဖူးပါတယ်။

ညီလင်းဆက်နဲ့ ရီတာကို တို့ရဲ့ အမြင်တွေနဲ့ပတ်သက်လို့ အကြိမ်တိုင်းမှာ ကျနော်နဲ့ အမြင်တူတာမျိုး မဟုတ်ပေမယ့်လည်း တချို့သော ကိစ္စတွေမှာ သူတို့ရဲ့ အမြင်တွေကို နှစ်သက်လေးစားမိပါတယ်။

အခု “ကျေးဇူးတရား”နဲ့ ပတ်သက်လို့ ရီတာရဲ့ ပို့စ် ကွန်မင့်ကဏ္ဍမှာ ကိုအင်ဒီမြင့်ရဲ့ ကွန်မင့်အပေါ် ရီတာ ပြန်ဖြေထားပုံက မှတ်သားစရာလည်းကောင်း၊ ကျွန်တော့်အနေနဲ့လည်း အင်မတန် နှစ်သက်မိတဲ့အလျောက် ရီတာ့ဆီမှာ ခွင့်တောင်းပြီး (ခွင့်ပြုချက်မရခင်မှာဘဲ) ကျနော့်ဘလော့ဂ်မှာ ပို့စ်တခုအနေနဲ့ သပ်သပ် တင်လိုက်ပါတယ်။ ကျနော်နှစ်ခြိုက်လက်ခံသော်လည်း စာဖတ်သူ မနှစ်ခြိုက်လိုက မနှစ်ခြိုက်ဘဲ နေနိုင်ခွင့် အပြည့်ရှိပါတယ်။

ကိုအင်ဒီရဲ့ ကွန်မင့်ကနေစလို့ ရီတာဖြေထားတဲ့ကွန်မင့်တွေကို အဆုံးထိ တောက်လျှောက် ပြန်လည် ဖော်ပြလိုက်ပါတယ်။

Andy Myint said...

စာတစ်ပုဒ်တည်းက အကြောင်းအရောတွေ အများကြီးထဲက ကျေးဇူးတင်တာနဲ့ ပက်သတ်ပြီး နည်းနည်း ၀င်ရှည်လိုက်ဦးမည်။ ဒီနေရာမှာ ဘိုတွေနဲ့ “ဗမာ”တွေ ကွာသွားတာက ဘိုတွေက သေးသေးကြီးကြီး လုပ်ပေး Thank You လိုက်တာပဲ။ ပြောပြီးလည်း ခဏပဲ ခံတယ်။ နောက်နေ့မှာ မင်းကိုငါ မနေ့က ကူညီထားတာလေ သွားပြောရင်တောင် မမှတ်မိဘဲ ဘာတွေ လာကြောင်နေတာလဲ ပြောထည့်လိုက်ဦးမည်။
တို့ဗမာများကတော့ ပါးစပ်က မသွက်ပေမယ့် စိတ်ထဲမှာ တစ်သက်လုံး စွဲစွဲမြဲမြဲ မှတ်နေရော။ ညီလင်းဆက်ပေးတဲ့ ဆရာဝန်တွေ ကျောင်းဆရာတွေ ဥပမာက ကောင်းတယ်။ ဆရာဝန်၊ ကျောင်းဆရာ အတန်းအစားထဲကဆို ကိုယ့်ကို ကုသပေး၊ သင်ကြားပေးတဲ့သူ မဟုတ်တာတောင် အဲဒီ အတန်းအစားဆို လေးစားပြီး ကျေးဇူးတွေ တင်နေလိုက်ကြတာထဲမှာ ကိုယ်ကိုယ်တိုင်တောင် ပါချင်တယ်။
စာဖတ်နာတဲ့သူကတော့ အတွေးအခေါ် (မှန်ချင်လည်း မှန်မည်။ မှားချင်လည်း မှားမယ်) တမူထူးပေမယ့် လောကမှာ လူသာမန်တွေက အများသားလား။ တကယ်ပြောချင်တာက “ကိုယ် လုပ်စရာရှိ လုပ်လိုက် လူတွေ ကျေးဇူးတင်အောင် အထင်ကြီးအောင် မလုပ်နဲ့”လို့ ပြောချင်တာကို “(ဥပမာ) လုပ်အားပေးတဲ့သူတွေ ဘလော့ရေးတဲ့သူတွေက အားယားနေလို့ လုပ်တာ စိတ်အပန်းဖြေလုပ်နေကြတာ နိုင်ငံရေးလုပ်နေသူတွေက သူ့ခံယူချက်နဲ့မို့ သူလုပ်နေတာ ကျေးဇူးတင်စရာ မလိုဘူး” လို့ ယူသွားမည့်လူတွေ ရှိနိုင်တာ ကိုယ်တွေ့ပဲလေ။
ကိုယ်ကိုယ်တိုင်က ကလေးအဖေမို့လားမသိ့ လူသာမန်တွေကို (ကိုယ်ကိုယ်တိုင်လည်း လူသာမန်ပါပဲ) ပြောတဲ့ အခါ ကလေးတွေကို ပြောပြသလို ရှင်းရှင်းရိုးရိုးနဲ့ တည့်မတ်မှန်ကန်တဲ့ လမ်းကြောင်းပေါ်ကိုပဲ လျှောက်စေချင်တယ်။ ခပ်မြင့်မြင့် အတွေးအခေါ်တွေနဲ့ လူသာမန်တွေကို ရှုပ်ထွေးလမ်းမှားစေတာနဲ့ စာရင် ဒီလိုပဲ ကောင်းတယ်လို့ Personally ထင်တယ်လေ။ ဒီ ကျေးဇူးခံ ကျေးဇူးစား အကြောင်းအရာ တစ်ခုထဲမှ မဟုတ်ပါဘူး တခြားဟာတွေကိုလည်း ဒီလိုပဲ ပြောလေ့ရှိတာတွေ့မိမှာပါ။
ဒါနဲ့ စာမပေါက်တဲ့ ဗမာတွေထဲမှာ ကျွန်တော်လည်း ပါမယ်။ ရီတာက ကျေးဇူးတင်သင့်တယ် ဆိုတာလား မဆိုတာလားကို အသေအချာ မရသေးဘူး။ (ဒါကိုကလည်း စာရေးနည်း တစ်ခုပဲကိုး…)

June 8, 2010 10:17 AM
Rita said...

တကယ်တော့ ဒီ post အတွက် comment တွေ လာရင် ဘာမှ မပြန်ဘဲနေမယ်လို့ စဉ်းစားထားခဲ့တာပါ။ ခါတိုင်းပြန်နေကျ comment မျိုး (ဇွန် မေးထားတာမျိုး) ကိုတောင် မပြန်ဘဲ နေလိုက်တယ်။ နောက် မွန် ဆိုတဲ့ တစ်ယောက် ပို့တဲ့ comment ကိုလည်း သူ့ကို သေချာပြောပြပြီး မတင်ဘဲ ထားလိုက်တယ်။ မွန်က အကောင်းတွေ ရေးထားလို့ပါ။

ဒါပေမဲ့ ကိုအင်ဒီ comment ကိုတော့ ပြန်ချင်စိတ်ပေါက်မိလို့ရော၊ ပြန်သင့်တဲ့ comment ဖြစ်လို့ရော ပြန်ပါမယ်။

(တကယ်ပြောချင်တာက “ကိုယ် လုပ်စရာရှိ လုပ်လိုက် လူတွေ ကျေးဇူးတင်အောင် အထင်ကြီးအောင် မလုပ်နဲ့”လို့ ပြောချင်တာ)

အဲလို ပြောချင်တာလည်း မဟုတ်ဘူး ကိုအင်ဒီ။ ပြောလည်း ဘာမှ ထူးမှာ မဟုတ်ဘူး။ ကျွန်မ ဆိုလိုရင်းက "လုပ်စရာရှိတာ လုပ်နေတာပဲဖြစ်ဖြစ်၊ လုပ်ချင်တာကို လုပ်နေတာပဲ ဖြစ်ဖြစ် ကျေးဇူးခံ ကျေးဇူးစား ကျေးဇူးတရား ဆိုတာတွေ၊ အနစ်နာခံတယ်ဆိုတာတွေ မဆိုင်တာတွေ ထည့်ပြောနေရင် ပြောနေတဲ့ သူတွေဟာ စိတ်ကုန်စရာကြီး၊ ကျွန်မကတော့ အဲလိုလူမျိုးကို ရိုးသားတယ် မထင်တော့ဘူး။ မယုံကြည်ဘူး" လို့ ဆိုလိုချင်တာပါပဲ။ ကျေးဇူးတင်အောင် အထင်ကြီးအောင် လုပ်ချင်လုပ်၊ မလုပ်ချင် မလုပ်နဲ့။ သူ့သဘောအတိုင်းပါ။ အထင်ကြီးတာ မကြီးတာ၊ ယုံကြည်တာ မကြည်တာလဲ ကိုယ့်သဘောပဲပေါ့။ ဒါ ရှင်းပါတယ်။

ညီလင်းဆက် ဆီမှာ အဲဒီ စကားလုံးက ဘယ်ကနေ အရင်းခံလာသလဲ ကျွန်မ ထင်တာ ပြောကြည့်မယ်။ မီဒီယာနဲ့ အနုပညာသမား အပြန်အလှန် ကျေးဇူးရှိကြတယ် ဘာညာ ဘာညာကနေ စလာတယ် လို့ ထင်ပါတယ်။ ဘာဆိုင်လဲ။ မီဒီယာဘက်က မအောင်မြင်ခင်ပဲ တင်ပေးပေး၊ အောင်မြင်မှ တင်ပေးပေး မဂ္ဂဇင်း ဂျာနယ် ရောင်းရဖို့၊ သတင်းရဖို့ သူ့အလုပ် သူလုပ်တာပဲ။ ဒီလိုပဲ အနုပညာသမား ဆိုတာတွေဘက်ကလည်း ပေါင်းကူးတံတားခေါ်ခေါ်၊ အငှားပါးစပ်နဲ့ ပရိသတ်ကို စကားဆိုတယ်ပြောပြော သူ့အလုပ်သူ လုပ်တာပဲ။ အပြန်အလှန် အကျိုးပြုနိုင်တယ်ဆိုရင် အပြန်အလှန် အလေးထားကြပေါ့။ ဒါပါပဲ။ ပြီးတော့ ဖြစ်သွားတဲ့ကိစ္စက နှစ်ယောက်တည်းရဲ့ အရေးကိစ္စပဲ။ ဘယ်သူက ဘယ်ဘက်ကမို့လို့ ဘယ်လိုလူမျိုးတွေက ဘယ်လိုရပ်တည်တယ် ဆိုတာတွေ ဖတ်ရ သိရတာ အတော် လေ စရာပါပဲ။ ထားပါတော့။

June 8, 2010 11:46 AM
Rita said...

(ရီတာက ကျေးဇူးတင်သင့်တယ် ဆိုတာလား မဆိုတာလားကို အသေအချာ မရသေးဘူး)

ကျွန်မအနေနဲ့ တင်သင့်၊ မတင်သင့် ဆိုတဲ့ဘက်က ဘယ်တော့မှ ဆွေးနွေးမှာ မဟုတ်ဘူး ဆိုတာပါပဲ။ အဲဒါက ခံယူတဲ့သူနဲ့ ဆိုင်တဲ့ ကိစ္စမို့လို့ပါ။ ဒီနေရာမှာ ကျွန်မ ခံယူတာကို post ထဲမှာ ထည့်ပြောပြီးပါပြီ။ ဒါပေမဲ့ တိကျအောင် ထပ်ဖြည့်ချင်သေးတယ်။ ထပ်ပြောရင်တော့ အဲဒါ ကိုယ့်ကိုယ်ကိုယ် 'တင်' တာနဲ့ တူသွားမှာကိုလည်း သေချာပေါက် သိတယ်။ ဒါပေမဲ့ တမင်ကို ထပ်ဖြည့်ပြောပါမယ်။ မနေ့က နေ့လည် ရုံးအောက်က fab လုပ်တဲ့နေရာကို ဆင်းတော့ ကျွန်မလျှောက်လာမယ့်လမ်းမှာ ရှိနေတဲ့ စတီးလ် ပိုက်လုံးတွေကို ကျွန်မ လာနေတာမြင်လို့ ဘေးကို သေချာကပ်ပြီး ရှင်းပေးတဲ့ ဘင်္ဂလားဒေ့ရှ် အလုပ်သမားတယောက်ကိုလည်း ကျေးဇူးတင်တယ်။

(သူရှင်းမပေးလည်း ကျွန်မ ကျော်သွားလို့ ရတယ်။ ဘေးက ကွေ့ပြီး လျှောက်လို့ရတယ်။ ဒါ့ပြင် ကိုယ်တိုင်ကလည်း ကျော်သွားရလို့ အိနြေ္ဒပျက်မှာတွေ ဘာတွေလည်း ပူနေမယ့် အစားကို မဟုတ်ဘူး) အဲဒီ အလုပ်သမားကလည်း ကျွန်မဆီက မျက်နှာသာရနိုင်လို့၊ အခွင့်အရေးတခုခု ရနိုင်လို့ လုပ်ပေးတာ မဟုတ်ဘူး။ သူ့ ပင်ကိုဗီဇအရ စိတ်စေတနာကောင်းနဲ့ လုပ်ပေးတာလဲ ဖြစ်နိုင်တယ်။ ရုံးမှာက S'porean MD က စလို့ မိန်းမတွေကို ဦးစားပေးတာ ရုံးပေါ်မှာပဲဖြစ်ဖြစ်၊ ရုံးအောက်က အလုပ်သမားတွေရှေ့မှာပဲ ဖြစ်ဖြစ် သိသိမှတ်မှတ်ကို လုပ်ပြထားလို့ သူတို့မှာပါ အဲဒီ အကျင့် ကူးနေတာလဲ ဖြစ်နိုင်တယ်။ ဘာပဲဖြစ်ဖြစ် မဆိုင်သလိုနေလည်း ဖြစ်တာကို မနေကြဘဲ လုပ်ပေးလိုက်တဲ့ အဲဒီ သေးသေးမွှားမွှားကိစ္စအတွက် ကျွန်မ ကျေးဇူးတင်တယ်။

ကိုအင်ဒီရဲ့ စကားလုံးကို ထပ်ပြန်ကောက်ပြီး ပြောရရင်၊ လုပ်ချင်လို့ပဲ လုပ်လုပ်၊ လုပ်သင့်လို့ပဲ လုပ်လုပ်၊ အနစ်နာခံတယ်ပဲ ပြောပြော၊ မခံဘူးပဲ ပြောပြော အဲဒီလို လုပ်နေတဲ့ (ပေးနေတဲ့) လူတွေကို ခံယူတဲ့ လူတွေဘက်က ကျေးဇူးတင်သင့် မတင်သင့် ကျွန်မ ဘယ်တော့မှ မဆွေးနွေးပါဘူး။ ဒါ ခံယူတဲ့ လူတွေရဲ့ စိတ်သဘောအတိုင်းပါပဲ။ လုပ်ပေးနေကြတဲ့ လူတွေနဲ့ ပတ်သတ်လို့ ကျွန်မ ဘယ်လိုခံယူလဲ ဆိုတာကိုပဲ ပြောတာပါ။

ခု လုပ်နေတဲ့ (ပေးနေတဲ့) လူဘက်က ပြောကြည့်ပါမယ်။ ဒါလဲ post မှာ ထည့်ရေးပြီးသားပါ။ ကိုယ်တိုင် ဘလော့ရေးနေတော့ ဘလော့ရေးတဲ့သူတွေ နေရာကပဲ ပြောထားပါတယ်။ ကျွန်မ ရေးချင်လို့ ရေးနေတဲ့ အချိန်မှာ ဘယ်သူ့အတွက်မှ မဟုတ်ဘူး။ ကိုယ့် စိတ်ကျေနပ်မှုအတွက်ပဲ ရေးတယ်။ အင်္ကျီတစ်ထည် ဝတ်တာနဲ့ ဘာမှ မထူးဘူး။ ကြိုက်တဲ့လူက ကြည့်ပြီး နှစ်သက်ကြည်နူးနေမှာပေါ့။ မကြိုက်တဲ့လူက မျက်စေ့စပါးမွှေးစူးနေမှာပေါ့။ ကျွန်မကတော့ ကျွန်မ စိတ်ကျေနပ်မှုကို ဦးစားပေးလို့ လုပ်တာပါပဲ။

June 8, 2010 11:47 AM
Rita said...

ကျွန်မ တကူးတက စာရိုက်တင်ဖြစ်နေတဲ့ မောင်သစ်ဆင်း စာတွေရော... ဘယ်သူ့အတွက်မှ အနစ်နာခံလို့ အချိန်ပေးလို့ လုပ်ပေးနေတဲ့ ဂုဏ်ကျေးဇူးကြီး မဟုတ်ဘူး။ ကျွန်မ လုပ်ချင်လို့ လုပ်တာပါ။ ကိုယ့်ဘလော့မှာ ဒီစာတွေ ရှိစေချင်လို့ပါပဲ။ အဲဒါ ကျွန်မရဲ့ သူတို့အပေါ် နှစ်ခြိုက်တာ၊ သူတို့ အလုပ်ကို ဂုဏ်ပြုချင်တာတွေပါတဲ့အပြင် ကျွန်မနဲ့ ကျွန်မရဲ့ blog ID ကို ထူထောင်ချင်တဲ့စိတ်လဲ ကျိန်းသေ ငြင်းမရအောင်ပါတယ်။ (ဒီနေရာမှာ post တခုဖြစ်မယ့် စာမျိုး ရိုက်တင်တာ မပြောနဲ့။ side bar မှာ ချိတ်ထားတဲ့ ကိုယ်ဖတ်တဲ့ blog roll စာရင်းကစလို့ blogger နဲ့ blog ရဲ့ ID ကို ပြဖို့ဆိုတဲ့ ရည်ရွယ်ချက် ကျွန်မအတွက် အတိအကျပါတယ်)

ဒါပေမဲ့ ဂျူး ဝင်းငြိမ်း အင်တာဗျူး တင်တုန်းက hit သိသိသာသာ တက်ပေမယ့် မောင်သစ်ဆင်းစာတွေ တင်တော့ လျော့တောင် လျော့ပါတယ်။ သို့သော် တစ်အုပ်လုံး ရိုက်တင်ဦးမှာ။ hit ဘာလုပ်ဖို့လဲ။ ထက်ဝက်လျော့ချင် လျော့ပစေ။ ရိုက်တင်မှာ။ ဘာလို့ဆို ကျွန်မက ကြိုက်တယ်လေ။ ကိုယ်လိုပဲ ကြိုက်တဲ့လူတွေ များရင်တော့ ဝမ်းမြောက်စရာပေါ့။ မကြိုက်လို့ အများစုက လှည့်မကြည့်ဘူးဆိုတော့ ဝမ်းမမြောက်ဘူးပေါ့။ ဒါ့ထက်ပိုလို့ ဘာလုပ်ရမလဲ။ ကြိုက်စေချင်တဲ့၊ ကိုယ့်လို စိတ်ဝင်စားမှုတူတဲ့ လူတွေရှိရင် ဖတ်မိစေချင်တဲ့ စိတ်ရှိပေမယ့် ကိုယ် လုပ်ချင်တာကို လုပ်နေတာပါပဲ။ အချိန်ကုန်ခံလို့ အနစ်နာခံ ဖြန့်ဝေနေတာ မဟုတ်ရပါ။ အန္တရာယ်ကြီးပေမဲ့ တခု ပြောရဦးမယ်။ ဂျာနယ်ကျော်မမလေးရဲ့ သူလိုလူ စာအုပ် ပြန်ရိုက်ပါလား ပြောလာရင် လုံးဝ စဉ်းစားမှာ မဟုတ်ဘူး။ ဘာလို့ဆို လုံးဝ မကြိုက်လို့။ (ဒီနေရာမှာ ဒီစာလေးပဲ ဖြတ်ဖတ်လိုက်ပြီး၊ ဒါ ဂျာနယ်ကျော်စုံတွဲကို စော်ကားမော်ကားပြောနေတာလို့ လာရင်လည်း လာနိုင်တယ်။ ဒါပေမဲ့ အဲဒါနဲ့ ပတ်သတ်တဲ့ သဘောထားကို post တစ်ခုမှာ အတိအလင်းရေးပြီးသားမို့ ဒါလေးပဲ ဖြတ်ဖတ်ပြီး ဘာပြောပြော ဂရုစိုက်နေမှာ မဟုတ်ဘူး)

လုပ်နေတဲ့သူအတွက်မှာ ကိုယ်လုပ်လိုက်တာက သက်ရောက်မှု တခုခု ရှိသွားပြီ၊ လူသိသွားပြီ ဆိုတာနဲ့ ကျေးဇူးတင်တာတွေရော၊ မတင်တာတွေရော၊ ဆဲတာတွေရော၊ ဆိုတာတွေရော လာမှာပဲ။ ကိုယ်လုပ်ချင်လို့ကို လုပ်တဲ့ အလုပ်နဲ့ ပတ်သတ်လို့ အသိအမှတ်ပြုလာတာ၊ ကျေးဇူးစကားဆိုလာတာနဲ့ ကြုံရင် ဝမ်းမြောက်မိတာသာ မကဘဲ အဲဒီလူကို ကျေးဇူးတောင် ပြန်တင်မိဦးမယ်။ ကျွန်မကြိုက်လို့ ရိုက်တင်တဲ့ မောင်သစ်ဆင်းစာတွေ ဖတ်ပြီး သဘောကျတယ် ပြောရင် လာဖတ်တဲ့လူကို ကျွန်မ ကျေးဇူးတင်တယ်။

မနေ့က မမကွမ် စီဘောက်မှာပဲ ဒီ post ကို ဖတ်ပြီး zyt ဆိုတဲ့ nick နဲ့ တယောက်က လာပြောတယ်။ သူပြောတဲ့ စကားလုံးအတိုင်း ပြန်ပြောရရင်... ကျွန်မပြောတာ မှန်ပါတယ်တဲ့။ post ထဲမှာပါတဲ့ ဂျာနယ်ကျော်မမလေးအကြောင်း ရိုက်တင်နေတဲ့ မရွှေမိက လာဖတ်တဲ့လူတွေကို သူကတောင် ပြန်ကျေးဇူးတင်နေသေးတာ တဲ့။ ဒီသဘောတရားက ဘာမှ အကျယ်ပြောစရာမလိုဘဲ နားလည်နိုင်ပါတယ်။

လုပ်တဲ့သူတွေဘက်က ကိုယ့်ဘာသာ လုပ်ချင်လို့ လုပ်ချင်တာကို ရွေးလုပ်နေပြီး၊ မလုပ်ချင်တော့တာနဲ့ ရပ်လိုက်လို့ရတာကို ဘယ်သူ့ ကျေးဇူးတင်ခံနေချင်ရမလဲ။ ဘယ်သူ့ခေါင်းထဲမှာမှ အဲဒါမရှိဘူးလို့ ယုံကြည်တယ်။ ကျေးဇူးတင်ခံချင်လို့ပဲ ဖြစ်ဖြစ်၊ ကျေးဇူးခံ ကျေးဇူးစားသဘောနဲ့ လုပ်နေတာပဲဖြစ်ဖြစ် အဲဒါ သူ့လမ်းကြောင်းပဲ။ သူ့ခံယူချက်နဲ့ အဆင့်အတန်းပါပဲ။

June 8, 2010 11:48 AM
Rita said...

ခံယူသူဘက်မှာ ကိုအင်ဒီပြောတဲ့...
( “(ဥပမာ) လုပ်အားပေးတဲ့သူတွေ ဘလော့ရေးတဲ့သူတွေက အားယားနေလို့ လုပ်တာ စိတ်အပန်းဖြေလုပ်နေကြတာ နိုင်ငံရေးလုပ်နေသူတွေက သူ့ခံယူချက်နဲ့မို့ သူလုပ်နေတာ ကျေးဇူးတင်စရာ မလိုဘူး” လို့ ယူသွားမည့်လူတွေ ရှိနိုင်တာ ကိုယ်တွေ့ပဲလေ)
အဲလို ခံယူသွားအောင်လို့ ရည်ရွယ်ချက်ရှိရှိ ပြောလိုက်ရင်တောင် ဘယ်သူက နားယောင်ပါလိမ့်မလဲ လို့ ဆက်တွေးနေမိတယ်။ ထားပါတော့။ ဘယ်သူမှတော့ နားမယောင်ပါဘူး ဆိုတာ ကိုအင်ဒီလည်း သိပါတယ်။ ဆိုလိုရင်းကို တလွဲကောက်တာမျိုး ဖြစ်နိုင်ပါတယ်။ အဲလို ကောက်ယူတဲ့လူတွေရှိတာကို ဘာမှ မတတ်နိုင်ပါဘူး။ သူတို့ အတွေးအမြင်အတွက် ဘာလုပ်ပေးလို့မှ မရဘူးလို့ပဲ ယူဆမိတယ်။ မင်းကိုနိုင် ကိုတောင် ယောအတွင်းဝန်လို ပြောလိမ့်မယ်လို့ ကြည်ညိုစိတ်နဲ့ ထင်နေကြတဲ့လူတွေ ရှိနေသေးတာပဲ။ (ယောအတွင်းဝန် မြင်းထိန်းငတာနဲ့ ပတ်သတ်လို့ လုပ်လိုက်တဲ့ အကွက်ဟာ ကလေးကလားပါလားဆိုတဲ့ အတွေးမရှိဘူး။ ကျောင်းပြဋ္ဌာန်းစာမှာတောင် ပါလာသေးတာ ဒါထည့်ပြောလိုက်ရင် ဟုတ်လှပြီလို့ပဲ တွေးတယ်)

နောက်တခုက ကျေးဇူးတရားနဲ့ ပတ်သတ်တဲ့ ကိစ္စမှာ ဘာလို့ အဲဒီလို တလွဲကောက်ကြသလဲ။ ကျွန်မစဉ်းစားမိသလောက်က ဆိုလိုရင်းကို သေချာမစဉ်းစားနိုင်တာထက်၊ မစဉ်းစားချင်တာ နဲ့ သူများကို နှိပ်ကွပ်ချင်စိတ် များနေလို့ ဖြစ်နိုင်တယ်။ ဥပမာ- ဗမာဝတ်စုံ ဝတ်ခြင်း၊ မဝတ်ခြင်း။ ဝတ်တဲ့လူတွေ၊ ဝတ်သင့်တယ်လို့ ထင်တဲ့လူတွေဟာ သူတို့ဘာသာ ဝတ်ချင်လို့၊ ယဉ်ကျေးမှုကို ချစ်လွန်းလို့ ဆိုတာထက် ဒါကို နင်းပြီး မဝတ်တဲ့လူတွေကို ဆော်ချင်တဲ့ စိတ်က ဦးဆောင်တယ်။ ဒီလိုပဲ ခုကိစ္စမှာ သူများကို ကျေးဇူးတင်တတ်တာထက် လိုရာဆွဲပြီး ဆော်ချင်တဲ့ စိတ်က ဦးဆောင်နေတယ်လို့ မြင်မိတယ်။

သေချာစဉ်းစားကြည့်ရင် ကျေးဇူးတင်တဲ့စိတ် ဖြစ်ပေါ်ဖို့ (ကျေးဇူးစကားဆိုဖို့ မဟုတ်) ဆိုတာ ဘာခက်သလဲ။ အထူးသဖြင့် ကိုအင်ဒီပြောသလို အရိုးစွဲနေတတ်တဲ့ ဗမာတွေမှာ ဘာခက်သလဲ။ ကြီးပြင်းလာတဲ့ ပတ်ဝန်းကျင်အနေအထားအရ၊ ဓလေ့ထုံးစံတွေအရ အလိုလို ကျင့်သားရနေကြတာပဲ။ နောက်တခု စေ့စေ့စပ်စပ် ထပ်ကြည့်လိုက်ပါ။ ကျေးဇူးတင်စိတ်ဟာ ဘယ်ကနေ ဖြစ်လာသလဲလို့။ ပုထုဇဉ်မှန်သမျှအတွက် ကိုယ်ကျိုးအတ္တကို ပြည့်စုံစေတဲ့အတွက် ကျေနပ်မိတဲ့စိတ်က ဖြစ်တယ်လို့ ထင်တယ်။ ပြီးတော့ ကိုယ့် စိတ်သဘောနဲ့ တွေ့တဲ့ အရေးကိစ္စတွေ လုပ်ဆောင်ပြတာ တွေ့ရတဲ့အခါ ဖြစ်မယ်ပေါ့။ ဆရာဝန်တွေ၊ ကျောင်းဆရာတွေကို ကျေးဇူးတင်ကြ လေးစားကြတာ အဲဒီသဘောတရားရဲ့ အပြင်ကို ထွက်သွားတာ ဘာရှိလို့လဲ။ ဆိုတော့ ကျေးဇူးတင်မိဖို့ တင်တတ်ဖို့ဆိုတာ အတ္တရှိတဲ့ လူတစ်ယောက်အတွက် ဘာများခက်လို့လဲ။ မတင်မိဖို့သာ ခက်တာပါ။

June 8, 2010 11:48 AM
Rita said...

ညီလင်းဆက်ပဲ ဖြစ်ဖြစ်၊ ညီလင်းဆက်လောက်မှ မဟုတ်တဲ့ဟာပဲ ဖြစ်ဖြစ်၊ ညီလင်းဆက်ထက် မကတဲ့ဟာပဲ ဖြစ်ဖြစ် (ဒီနေရာမှာ နာမည်အစား နောက်ပိုင်းမှာ နာမ်စားပြောင်းသုံးလို့ရတယ်။ တမင်ကို အဲဒီနာမည်ကို 3 ခါတိတိ ထည့်ချင်လို့ ထည့်ရေးတာ) သူတို့ ကျေးဇူးတင်စရာရှိတာ တင်ဖို့ ဘယ်သူကမှ ဝေဖန်စောကြော၊ တွန်းအားပေးထောက်ပြနေဖို့မလိုပါဘူး ထင်မိတယ်။

ကျေးဇူးတင်ရတာထက် ခက်ခဲတာ၊ လေးနက်တာ၊ လုပ်ဖြစ်အောင် လုပ်သင့်တာက ကျေးဇူးတင်စရာကောင်းတဲ့ ကောင်းမြတ်တဲ့ အမှုကိစ္စတစ်ခုကို ကိုယ့်အပေါ် ပြုဖူးသူအပေါ် သူလိုအပ်ရင် တတ်နိုင်တဲ့ဘက်က ပြန်ဆပ်နိုင်ဖို့ရယ်၊ ကိုယ့်ကို ကျေးဇူးပြုဖူးသူအပေါ်မှာ တိုက်ရိုက်တုန့်ပြန်ဖို့ မလိုရင်တောင် အဲဒီ အမှုကိစ္စကို ကိုယ့်ပတ်ဝန်းကျင်ကို ကိုယ်ကနေ လက်ဆင့်ပြန်ကမ်းနိုင်ဖို့ရယ်သာ ခက်တာပါ။

ညီလင်းဆက် စလိုက်တဲ့ ကိစ္စကနေ ကျေးဇူး ကျေးဇူး ကျေးဇူး တင်တတ်ရမယ်လို့ မိုးမွှန်အောင်ပြောနေတဲ့လူတွေ ကိုယ့်ဘာသာ လွယ်တာပဲ လုပ်နေသလား၊ မလွယ်တာပဲ လုပ်နေသလားဆိုတာ ပြောနေမယ့်အစား စဉ်းစားကြည့်တာ ပိုကောင်းမယ် ထင်မိတယ်။

ကိုအင်ဒီ comment ကို ပြန်ရင်းနဲ့ ကိုယ့်ဘာသာလဲ ပြန်စဉ်းစားမိသွားတဲ့ အတွက် ပတ်သတ်ရာ ပတ်သတ်ကြောင်းများကို ကျေးဇူးဥပကာရ အထူးတင်ပါကြောင်း ပြောလိုပါတယ်။ :)

comment ရေးခဲတဲ့ ကိုအင်ဒီဆီ တကူးတက ရေးသွားတဲ့ comment ရလို့လည်း တကယ်ဝမ်းမြောက်မိတာ ပြောချင်ပါတယ်။

(စာ ရေးပုံရေးနည်းနဲ့ ပတ်သတ်လို့ကတော့ ကလေးကို ပြောသလိုပဲ ရေးရေး၊ ဓမ္မာစရိယကို ပြောသလိုပဲ ရေးရေး နားမလည်တဲ့လူက လည်ကို မလည်ဘူး၊ အရိုးစွဲနေတဲ့လူက စွဲကိုစွဲနေမှာပဲ ဖြစ်လို့ သိပ်မထူးဘူး ထင်မိပါတယ်။ အတိုက်အခိုက်က ဘယ်လိုရေးရေး ဘယ်လိုလုပ်လုပ် လွတ်မှာမဟုတ်တဲ့ တူတူတော့ ကိုယ် အာရုံလာသလိုပဲ ဆက်ရေးမယ်။ အဲဒီ အတွက် စာဖတ်သူကို မလေးစားတာတွေ၊ ထည့်မတွက်တာတွေ ပြောလာခဲ့ရင်လည်း ခံပါတယ်။ ဟုတ်တယ်လေ။ ဘလော့ရေးတာ ဘယ်သူ့အတွက်မှ မဟုတ်ဘူး။ ကိုယ့်အတွက် ကိုယ်လုပ်ချင်လို့ လုပ်နေတဲ့ အလုပ်ပါပဲ။

ဒါဖြင့် ရေးပြီး ဘယ်သူ့မှ ပြမနေနဲ့။ ကိုယ့်ဘာသာ သိမ်းထားလို့ ပြောလို့လည်း မရဘူး။ ဘာဖြစ်လို့ဆိုတော့ ကိုယ်ရေးတာကို သူများ ဖတ်စေချင်တာ၊ ပြချင်တာကိုက ရေးသူရဲ့ အတ္တနဲ့ ယှဉ်တဲ့ ဆန္ဒပဲ။ သူရဲ့ စိတ်ကျေနပ်မှု အတွက်ပဲ။ ဒါကိုမှ မကျေနပ်လို့ လာမဖတ်ကြလည်း ဘာမှ မတတ်ပါ။ မရေးဘဲ မတင်ဘဲတော့ နေမှာမဟုတ်လို့ ပြောလိုပါတယ်)

ကိုအင်ဒီရဲ့ comment ကို ပြန်တာ ဖြစ်ပေမယ့် တချို့ အကြောင်းအရာနဲ့ စကားလုံးတွေက ကိုအင်ဒီကို မရည်ရွယ်ဘူးဆိုတာ နားလည်မယ်လို့ ယုံကြည်မိပါတယ်။

ကျေးဇူးရှင် မှိုလိုပေါတဲ့ လောကကြီးအလယ်မှာ

အခုတလော “ကျေးဇူးရှင်၊ ကျေးဇူးခံ၊ ကျေးဇူးစား၊ ကျေးဇူးစကား” ဆိုတာတွေ ကြားနေ တွေ့နေ ဖတ်နေရတယ်။ “ကျေးဇူး”ဆိုတာနဲ့ ပတ်သက်လာရင် ဝင်းဖေ ရေးသားတဲ့ “မျက်မှန်” ဆိုတဲ့ ဝတ္ထုတိုလေးတပုဒ်ကို အရင်ဆုံး ပြေးသတိရမိပါတယ်။ ကိစ္စရပ်ကလေးတခုအတွက် ကျေးဇူးရှိခဲ့ဖူးတာအပေါ် မပြီးနိုင်မစီးနိုင် အသားယူရင်း လိုတာထက်ပိုပြီး အခွင့်အရေးတွေယူနေတဲ့ လူတယောက်အကြောင်းနဲ့ အဲဒီဒဏ်ကို သည်းမခံနိုင်တော့လို့ ပေါက်ကွဲထွက်ရသူတယောက်အကြောင်း ကလောင်သွက်သွက်နဲ့ ကွက်ကွက်ကွင်းကွင်း ပေါ်လွင်အောင် ရေးဖွဲ့ထားတဲ့ ဝတ္ထုတိုတပုဒ်ပေါ့။

မှန်ပါတယ်။ တချို့လူတွေဟာ သူ့ကျေးဇူးလေး နည်းနည်းလောက် ရှိခဲ့ဖူးရင်ပဲ တဖက်လူက တသက်လုံး အသက်ပေးပြီး ဆပ်ရတော့မယ့် အပေါက်မျိုး ချိုးတတ်တာ တွေ့ရဖူးတယ်။

တချို့လူတွေကျပြန်တော့ သူ့သဘောနဲ့သူ ဇွတ်အတင်းအဓမ္မ ဝင်ကူညီပြီး တဖက်လူရဲ့ ကျေးဇူးတင်တာကို အချောင် ခံချင်ကြတာမျိုးလည်း ရှိသေးတယ်။

ကြားဖူးကြမယ်ထင်ပါတယ်။။ “တိုင်းပြည်ကြီး ချောက်ထဲကျတော့ဖို့ လက်တလုံးအလိုမှာ အချိန်မီ ဝင်ပြီး ကယ်တင်လိုက်ရတယ်”….ဆိုတာမျိုးလေ။ အသားလွတ်ကြီး ကယ်တင်ရှင်အပေါက်မျိုး ဝင်ချိုးနေတာ။ ဒါမျိုးက နအဖ သာလျှင် မဟုတ်။ တော်လှန်ရေးသမားဆိုသူတွေထဲမှာလည်း ဒီအချိုးမျိုးနဲ့ လူတွေ တပုံကြီးရှိနေပြန်တယ်။ “မင်းတို့ ထောင်ကျခံခဲ့ဘူးလို့လား။ ငါတို့လောက် ပေးဆပ်ခဲ့ရဘူးလို့လား”…စသဖြင့်ပေါ့လေ။

ဒီလိုလူမျိုးတွေ ဘာကြောင့် ပေါ်ပေါက်လာရသလဲလို့ အကြောင်းရင်းကို စဉ်းစားကြည့်မိတယ်။

ကျနော့်အထင်မမှားဘူးဆိုရင်တော့ “ကျေးဇူးသိတတ်တာဟာ ကောင်းတယ်” ဆိုတဲ့ အယူအဆကနေ အစပြုတယ်လို့ တွေးမိပါတယ်။ ဒီအယူအဆကို လူမျိုးဘာသာမရွေး လက်ခံကျင့်သုံးကြတာပါ။ ဗုဒ္ဓဘာသာမှာဆိုရင် ကျနော်တို့တွေဟာ မိဘနဲ့ ဆရာသမားကို အနန္တောအနန္တငါးပါး ဂိုဏ်းဝင် ကျေးဇူးရှင်တွေဆိုပြီးတော့ ပူဇော်ကန်တော့ကြတယ်။ ပူဇော်ထိုက်သောသူကို ပူဇော်ခြင်း၊ သူ့ကျေးဇူးကို သိတတ်ခြင်း ဆိုတဲ့အတိုင်းဆိုတော့ အဲဒီအထိကတော့ ဟုတ်နေပါသေးတယ်။

ဒါပေမယ့် ကျနော်တို့မှာ ဘယ်အချိန်ကစပြီး ရလာခဲ့တဲ့ အလေ့အထ မှန်းတော့ မသိဘူး။ ကိုယ့်ကို ပညာသင်ပေးတဲ့ ဆရာတွေကိုသာမက တခြားအသက်မွေးဝမ်းကြောင်းနဲ့ လူတွေကိုပါ တွေ့ကရာ“ဆရာ” တပ်ပြီး ခေါ်နေကြတာကို တွေ့ရတယ်။ ဥပမာ ဆရာဝန်ကိုလည်း ဆရာလို့ပဲ ခေါ်တယ်။ စာရေးဆရာကိုလည်း ဆရာပဲ။ သတင်းသမားတွေကိုလည်း သတင်းစာဆရာပဲ။ ကားမောင်းတဲ့လူကိုလည်း ကားဆရာ၊ အသံချဲ့စက်ဖွင့်တဲ့လူကိုလည်း စက်ဆရာ၊ ပန်းပဲထုတဲ့လူကို ပန်းပဲဆရာ၊ ကုန်ကုန်ပြောရရင် ဆိုက်ကားနင်းတဲ့ လူကိုတောင် ဆိုက်ကားဆရာလို့ ခေါ်တတ်ကြပါတယ်။ (ဒီအကြောင်းနဲ့ ပတ်သက်လို့ လူထုစိန်ဝင်းက ဆောင်းပါးတပုဒ်ရေးဖူးပါတယ်။)

အဲဒီမှာတင် ဇာတ်လမ်းက နည်းနည်းရှုပ်လာပြီး ရောထွေးမှုတွေ စဖြစ်လာတယ်လို့ ယူဆရပါတယ်။ ဆရာဝန်က ဆေးကုပေးရင် ကုသခကို “ဉာဏ်ပူဇော်ခ” လို့ ခေါ်လာကြတယ်။ အစိုးရဆေးရုံက ဆရာဝန်မို့ ဆေးကုသခ ပေးစရာမလိုရင်တောင် ကျေးဇူးတင်လို့ဆိုပြီး လက်ဆောင် ပေးချင်ကြတယ်။ အဲဒီလက်ဆောင်ကိုလည်း “ကန်တော့လက်ဆောင်” လို့ ခေါ်ကြပြန်တယ်။ (နောက်ပိုင်း ကန်တော့လက်ဆောင် တွေ အဖြစ်ကနေ မူလသဘာဝ ပျောက်ပျက်ပြီး အဆုံးသတ်မတော့ အစိုးရဌာနဆိုင်ရာတွေအတွင်းမှာ အဓိက လာဘ်ပေးလာဘ်ယူ နည်းလမ်းကြီးတခုအဖြစ် ဆက်လက် အသုံးတော်ခံနေပါတော့တယ်။)

အလားတူပဲ…. “စာရေးဆရာ” တွေကိုလည်း စာမူခပေးတယ်ဆိုရမယ့်နေရာမှာ ဉာဏ်ပူဇော်ခဆိုတဲ့ အသုံးအနှုန်းကိုပဲ သုံးစွဲကြတယ်။ သတင်းစာဆရာတွေနဲ့ ပတ်သက်လို့လည်း ထို့အတူပဲ။ ဒါတွေဟာ ဝေါဟာရ သက်သက်ပဲ။ သိပ်အရေးမကြီးပါဘူးလို့ ထင်မယ်ဆိုရင်လည်း ထင်လို့ရပါတယ်။

ဒါပေမယ့် အဲဒီအလေ့အထကြီးဟာ ကျနော်တို့ လူမှုအသိုင်းအဝိုင်းကြားထဲမှာ ကြာရှည်မြင့်စွာ အမြစ်တွယ်လာတဲ့အခါ ကျောင်းဆရာ၊ ဆရာဝန်၊ စာရေးဆရာ၊ သတင်းစာဆရာ စတဲ့ လူတွေကို ကျေးဇူးရှင်ကြီးတွေလို့ ကျနော်တို့တွေက အမြင်မှာပါ မသိလိုက်မသိဘာသာ စွဲထင်မှတ်ယူလာတယ်။ တကယ်တော့ အဲဒီလူတန်းစားအသီးသီးမှာ လူကောင်းသူကောင်းတွေပါသလို အကျင့်မကောင်းတဲ့လူတွေလည်း တပုံကြီးရှိနေတယ်။ အကျင့်မကောင်းပေမယ့် အကြောင်းကြောင်းကြောင့် အဲဒီနယ်ပယ်ထဲမှာ ရောက်နေတဲ့လူတွေကို သူ့အသက်မွေးဝမ်းကြောင်းကို ထောက်ပြီး ကျေးဇူးရှင်ကြီးတွေသဖွယ် ဆက်ဆံနေရမှာတော့ သဘာဝ မကျဘူးပေါ့နော်။

နအဖ အစိုးရ တက်မလာမီခေတ်ကလည်း မြန်မာ့ဆိုရှယ်လစ်လမ်းစဉ်ပါတီရဲ့ ဝါဒဖြန့်ချီရေး ကောင်းမှုကြောင့် တောင်သူလယ်သမားတွေဟာ နေရင်းထိုင်ရင်း ကျနော်တို့ရဲ့ အသက်သခင် ကျေးဇူးရှင်တောင်သူဦးကြီးတွေ ဖြစ်လာကြတယ်။ ကုန်ကုန်ပြောရရင် လယ်သမားတွေနဲ့အတူ ရွှံ့ထဲမှာ ဒိုးတူပေါင်ဖက် ရုန်းနေကြတဲ့ နွားသတ္တဝါတွေကိုတောင် ကိုယ့်ရဲ့ အသက်သခင် ကျေးဇူးရှင်လိုလို ပြောလာကြတော့ လမ်းမှာ နွားတွေ့ရင်ပဲ ထိုင်ကန်တော့ရမလို ဘာလိုလို ဖြစ်လာတယ်။

ထားပါတော့။ ကျေးဇူးခံ၊ ကျေးဇူးစားလူတွေဖက်က မင်္ဂလာတရားနဲ့အညီ ကျေးဇူးတင်တယ်ပဲ ထား။ အဲ….. ကျေးဇူးရှင်တွေဖက်ကလည်း ကြာလာတာနဲ့အမျှ အကျင့်ပျက်ပြီး နည်းနည်းပါးပါး စိတ်ကြီးတော့ ဝင်လာကြတယ်လို့ ထင်မိတယ်။ ကိုယ့်ဆန္ဒအလျောက် ရွေးချယ်ခဲ့တဲ့ အသက်မွေးဝမ်းကြောင်းကို ဝတ္တရားအရ လုပ်ကိုင်တဲ့နေရာမှာတောင် နေရင်းထိုင်ရင်း ကျေးဇူးတင်ခံချင်တာမျိုးတွေ ရှိလာကြတယ်။ ပြည်သူ့အတွက်တို့၊ စာဖတ်ပရိသတ်အတွက်တို့၊ လူအများအတွက်တို့ စတဲ့ စကားတွေနဲ့ အသံကောင်းဟစ်လာကြတယ်။

သူ့ဘာသာသူ သေနတ်ကိုင်ချင်လို့ လက်ယားပြီးတော့ တပ်ထဲဝင်သွားတဲ့သူတွေကလည်း “အသက်သွေးချွေး စဉ်မနှေး၊ ပေးဆက်သည်မှာ တပ်မတော်ပါ” ဆိုတာမျိုး အော်လာကြတယ်။

တကယ်ကတော့ လူတယောက်ဟာ သူ့အလုပ်ကိုသူ မှန်မှန်ကန်ကန် လုပ်ဆောင်နေသရွေ့ သူ့အကျိုးအတွက်ရော၊ အများအကျိုးတွက်ရော သယ်ပိုးပြီးသား ဖြစ်ပါတယ်။ စစ်သားကလည်း စစ်သားအလျောက်၊ ဈေးသည်ကလည်း ဈေးသည်အလျောက်၊ အင်ဂျင်နီယာကလည်း အင်ဂျင်နီယာအလျောက်၊ အိမ်ရှင်မကလည်း အိမ်ရှင်မအလျောက်၊ လှေသမားကလည်း လှေသမားအလျောက်၊ ဆရာဝန်ကလည်း ဆရာဝန်အလျောက်၊ ကျောင်းဆရာကလည်း ကျောင်းဆရာအလျောက် သူ့နည်းနဲ့သူ လူ့အဖွဲ့အစည်းကို ညီတူညီမျှ ကျေးဇူးပြုနေကြသူတွေချည်းပါ။ မယုံလို့ရှိရင် ဈေးသည်တွေ၊ အိမ်ရှင်မတွေ မပါဘဲ စစ်သားတွေ၊ ဆရာဝန်တွေ၊ ကျောင်းဆရာတွေနဲ့ချည်း လူ့အဖွဲ့အစည်းကို တည်ဆောက်ကြည့်ပါ။ (ချွင်းချက်အနေနဲ့ လက်နက်ကိုင်တွေ မပါဘဲ လူ့အဖွဲ့အစည်း တည်ဆောက်မယ်ဆိုရင်တော့ ပိုပြီး အေးချမ်းသာယာမှုတဲ့ လူ့အဖွဲ့အစည်းကို ရမယ်လို့ ယုံကြည်မိပါတယ်။)

ဒီတော့ တခုခုကို လုပ်တယ်ဆိုရင် ကျေးဇူးတင်ခံချင်လို့ လုပ်တာထက် ကိုယ့်ရွေးချယ်မှုအလျောက်၊ ကိုယ့်ဝါသနာအလျောက်၊ ကိုယ့်ယုံကြည်မှုအလျောက်၊ လုပ်သင့်လုပ်ထိုက်တယ်လို့ ယူဆတဲ့အလျောက်၊ လုပ်တာမျိုးပဲ ဖြစ်သင့်တယ်လို့ မြင်ပါတယ်။ ဒီအကြောင်းနဲ့ ပတ်သက်ပြီး ညီလင်းဆက်တို့ ရီတာတို့ရဲ့ အယူအဆကို သဘောကျ နှစ်ခြိုက်မိပါတယ်။

ကျေးဇူးခံ၊ ကျေးဇူးစားတွေဖက်က ကြည့်ရင် ကျေးဇူးတင်တာဟာ မကောင်းဘူးလားဆိုတော့ ကောင်းပါတယ်။ ကျေးဇူးမသိတတ်သူ၊ ကျေးဇူးကန်းသူအဖြစ်ထက်စာရင် ကျေးဇူးသိတတ်တာက ပိုကောင်းပါတယ်။ ဒါပေမယ့် ကျေးဇူးကို ဘယ်လို ပြန်ဆပ်မလဲ။ ဆပ်ပုံဆပ်နည်း နည်းလမ်းကျဖို့တော့ လိုမယ်ထင်ပါတယ်။ နောက်တပို့စ်မှာကျမှ ကျေးဇူးဆပ်ပုံဆပ်နည်းတွေအကြောင်း ကျနော်တွေးမိသမျှ ထပ်ရေးပါဦးမယ်။

ပူးတွဲဖတ်ရှုရန်.....
(၁) မျက်မှန် (ဝင်းဖေ)
(၂) ထက်ထက်မိုးဦး တကယ်ပဲ မလွန်ဘူးလား (ညီလင်းဆက်)
(၃) One Minute Interview (Ritako)
(၄) ကျေးဇူးတင်လိုက်ပါ (ဝီရှီမီ)
(၅) ကျေးဇူးတရား self-ownership and all that (ဝတုတ် -zizawa)

ကိုပေါ နဲ့ မဒမ်ပေါ (အသွင်တူ၏ မတူ၏)

လူတော်တယောက် ဆုံးရှုံးခြင်း

တိတ်ဆိတ်ခြင်းကြောင့် ခရုကြေ

ပဲပုံအသာဟစ်သံ

ရင်ကို လာမှန်သော ဗလောင်းဗလဲ ခြောက်ခု

ပုစဉ်းရင်ကွဲ

“မျိုးစေ့ ပါလာသော”

ဖောင်ချိုး တိုက်ပွဲ

မောင်ကြီးတို့ ဘယ်ရွာသား ...

ကော်ပီကက်

“စကားလိမ်”

အမေမွေးကတည်းက ဂဏန်း

မြန်မာပြည်လို့ ခေါ်တဲ့နေရာ

Symphony No. 5

ခို

ဘွန်ဆိုင်း သဘာဝ

ဒေါ်အောင်ဆန်းစုကြည်ရဲ့ မှတ်သားဖွယ် စကား

“နှစ်သက်မိသော သူ့အမြင်”

ကျေးဇူးရှင် မှိုလိုပေါတဲ့ လောကကြီးအလယ်မှာ

ဘလော့ဂ်ရေးသူအကြောင်း

ကြော်ငြာကဏ္ဍ (ကလစ်ခေါက်ပါ)

ဝီကီပိဒိယ

စာအုပ်အညွှန်း

ရေးခဲ့သမျှ ပို့စ်များ

သူတို့ရေးသမျှ