“လူပိမသေဘူးတဲ့လား”

Share |

“လူ့အောက်ကျို့လို့ လူပိမသေပါဘူး”….. တဲ့။

သည်စကားကို ကျနော်တို့ မြန်မာတွေ ကြားမှာ မကြာခဏ ကြားဖူးသည်။

နိဝါတောစ… မိမိကိုယ်ကို နှိမ့်ချခြင်းသည် မင်္ဂလာတပါးဟု သုံးဆယ့်ရှစ်ဖြာမင်္ဂလာတွင် မှတ်သားရဖူးသည်။ သို့သော် နှိမ့်ချခြင်း (Humility) နှင့် အောက်ကျို့ခြင်း (bowing down)တို့သည် မတူကွဲပြားသည်ဟု ထင်မြင်မိပါသည်။

နှိမ့်ချခြင်းသည် “မာန်မာန ထောင်လွှားခြင်း၊ ၀ံ့ကြွားခြင်း၊ ခက်ထန်ခြင်းနှင့် အနိုင်ယူလိုခြင်း” စည့် ဘဘောသဘာဝအားလုံးတို့မှ လုံးဝကင်းစင်သည့် အဓိပ္ပါယ်ဟု ယူဆပါသည်။ ပညာနှင့်ယှဉ်သော၊ မြင့်မြတ်သော သဘော၊ ရိုးသားသော သဘောတို့ကို ဆောင်ပါသည်။

အောက်ကျို့ခြင်းသည်ကား အကြောက်တရားလွှမ်းမိုး၍ဖြစ်စေ၊ တစုံတရာအကျိုးကို မျှော်ကိုး၍ဖြစ်စေ တောင်းပန်တိုးလျှိုးခြင်း၊ ခယခြင်း ဖြစ်သည်။ နိမ့်ကျသော သဘော၊ မရိုးသားသော သဘော၊ ပညာနှင့်မယှဉ်သော သဘောကို ဆောင်ပါသည်။

အောက်ကျို့လိုက်သည့်အတွက် လက်ငင်းအကျိုးအမြတ်တခုခုကို ခံစားလိုက်ရဖွယ်ရှိသော်လည်း ရေရှည်တွင် အောက်ကျို့ခြင်း၏ ဆိုးကျိုးကို ကျောကော့အောင် ခံစားရတတ်ပေသည်။ အောက်ကျို့သူများအဖို့ လူပိ၍မသေသော်လည်း လူဖိခံရတော့မည်မှာကား ဧကန်မုချပင် ဖြစ်တော့သည်။ အောက်ကျို့လိုက်သည့်အချိန်မှစ၍ သိက္ခာရှိသောလူတယောက်အဖြစ်သည် နိဂုံးချုပ်သွားခဲ့လေပြီ။

အောက်မကျို့သူများကို အလွယ်ဖိနှိပ်၍ မရပါ။ အောက်ကျို့သူများကိုသာ ဖိနှိပ်လိုသူများက အလွယ်တကူ စိတ်တိုင်းကျ ဖိနှိပ်၍ ရသည်။
အောက်ကျို့လိုသူများသော လူ့အဖွဲ့အစည်းတွင် ဖိနှိပ်လိုသော လူတန်းစားတရပ်သည်လည်း အလိုအလျောက် ပေါ်ထွန်းလာတတ်သည်။

မြန်မာပြည်ကိုလိုနီဘ၀တွင် ရောက်နေစဉ်က အမြော်အမြင်ရှိသော လူငယ်အချို့ဦးဆောင်ကာ မြန်မာတို့၏ စိတ်ဓါတ်ကို ပြန်လည်မြှင့်တင်ပေးရန် ဒို့ဗမာ အစည်းအရုံးကို ဖွဲ့စည်း၍ မြန်မာတို့၏ သဏ္ဍာန်တွင် သခင်စိတ် ပြန်လည် ၀င်ရောက်လာစေရန် လှုံ့ဆော်ပေးခဲ့ရသည်။ နယ်ချဲ့၏ ဖိနှိပ်မှုအောက်တွင် ဦးမကျိုးရန် စိတ်ဓါတ်ကို မြှင့်တင်ပေးခဲ့သည်။

ယနေ့ ကျွန်ုပ်တို့ တိုင်းပြည်သည် ဖိနှိပ်သော စစ်အာဏာရှင် အစိုးရတရပ်၏ လက်အောက်တွင် ကျရောက်နေသည်။ ဤအခြေအနေမှ ရုန်းထွက်လွတ်မြောက်နိုင်ရန် ကျွန်ုပ်တို့၏ နှလုံးအိမ်ဝယ် အမြစ်တွယ်နေသည့် အကြောက်တရားနှင့် ဦးကျိုးစိတ်ကို အရင်ဖယ်ထုတ်ကြမည်။ လွတ်လပ်သောစိတ်ကို မွေးမြူကြရမည်။ ကျွန်ုပ်တို့ လူ့အဖွဲ့အစည်းတွင် လက်ခံသုံးစွဲနေသော “လူ့အောက်ကျို့၍ လူပိမသေဘူး” တည်းဟူသော အယူအဆမှားကို အစွမ်းကုန် တိုက်ဖျက်သွားကြရပေမည်။

ပူးတွဲဖတ်ရှုရန်။..............။ ကျွန်စိတ်၊ ပညာရေး နှင့် လွတ်လပ်မှု