“ရထားပေါ်မှာ… ကျူတန်းထဲမှာ…. လောကကြီးမှာ”

Share |

ဘူတာတခုတွင် MRT ပေါ်သို့ အဘိုးကြီးအိုတယောက် တုန်ချိချိ တက်လာကာ လူကြားထဲတွင် တိုးဝှေ့ပြီး သက်ကြီးရွယ်အိုများအတွက် ရည်ရွယ်ထားသော သတ်မှတ်ထိုင်ခုံရှေ့တွင် သွားရပ်သည်။ ထိုထိုင်ခုံတွင်ကား နားကြပ်ကို နားထဲထည့်လျက် အမ်ပီသရီးနားထောင်နေသည့် အသက်၂၀ ခန့်ရှိလူသည် သူ့ရှေ့တွင် အဘိုးကြီးလာရပ်သည်ကို မသိဟန်ဆောင်ကာ အိတ်ထဲမှ လက်ကိုင်ဖုန်းကို ထုတ်ပြီး ဟိုနှိပ်သည်နှိပ်လုပ်နေလေသည်။ အမှန်တွင်ကား လူရွယ်အနေဖြင့် ထိုင်ခုံနေရာကို မိမိထက် ပို၍လိုအပ်နေသော သက်ကြီးရွယ်အိုအတွက် ဖယ်ပေးရမည့် ၀တ္တရားရှိလေသည်။

ဤမြင်ကွင်းကို အနားရှိလူအတော်များများက သတိပြုမိသည့်တိုင် မည်သူကမျှ လူရွယ်အား အမုန်းခံ၍ နေရာဖယ်ပေးရန် မပြောချေ။ အတန်ကြာသောအခါ အနားမှ လူတဦးသည် မနေသာတော့ပဲ လူရွယ်အား ဖယ်ပေးရန် ပြောဆိုလေသည်။ ထိုအခါ လူငယ်သည် ထိုသို့ ဖယ်ပေးရန်ပြောသူအား မကြည်လင်သော အကြည့်ဖြင့် တချက်ကြည့်ကာ ထိုင်ခုံမှ မထချင် ထချင်နှင့် ဖယ်ပေးလေတော့သည်။

ဤအဖြစ်အပျက်ကို ကြည့်လျှင် လူရွယ်သည် မိမိသက်တောင့်သက်သာ ရှိရေးအတွက် မိမိတွင် ပြုဖွယ်ရှိသော ၀တ္တရားတခုကို မသိကျိုးကျင်ပြုကာ နေခဲ့သည်မှာ ထင်ရှားသည်။ တဖန် ပတ်ဝန်းကျင်ရှိ လူများတွင် လူငယ်၏ အပြုအမူကို မကြိုက်သော်ငြား မှားယွင်းသော ထိုအပြုအမူကို ထောက်ပြရန် ၀န်လေးကြသည်ကို တွေ့ရသည်။ ထောက်ပြသောသူသည် ဖြစ်သင့်ဖြစ်ထိုက်သော ကိစ္စရပ်တခု ဖြစ်လာစေရန် အမုန်းခံ၍ ပြောသင့်ပြောထိုက်သည်ကို ပြောသည့်အတွက် ချီးကျူးထိုက်ပေသည်။ လူငယ်အနေဖြင့်ကား သူမသိကျိုးကျင်ပြုနေသော ၀တ္တရားကို တစုံတယောက်မှ သိသာထင်ရှားအောင် ထောက်ပြသည့်အတွက် အရှက်ရသည်။ ထို့အပြင် သူ၏ နေရာကို ဖယ်ပေးရသဖြင့် သက်တောင့်သက်သာ စီးနင်းလိုက်ပါခွင့် ဆုံးရှုံးသွားသည်။ ဤအကြောင်းရင်းခံများကြောင့် ဖယ်ပေးရန်ပြောသူအား အမုန်းထားသည်။

သို့သော် ဤဖြစ်ရပ်မျိုးတွင် များသောအားဖြင့် မိမိအသိစိတ်ဖြင့် အလိုအလျောက် ဖယ်ပေးသူများလည်း ရှိ၏။ သူတပါးမှ ဖယ်ပေးရန်ပြောသောအခါတွင်မှ အသာတကြည်ဖယ်ပေးတတ်သည်လည်းရှိ၏။ ဖယ်ပေးသော်လည်း စောစောက လူငယ်ကဲ့သို့ပင် မကြည်မသာဖြင့် ဖယ်ပေးတတ်သည်လည်း ရှိ၏။ အဆိုးဆုံးမှာကား မည်သို့ပင် ဖယ်ခိုင်းပါစေ၊ မျက်နှာပုပ်နှင့် ဆက်လက်ထိုင်နေတတ်သူများလည်း ရှိသည်။ အကယ်၍ ဖယ်မပေးရုံမျှမက ပြောလာသူအား “ငါက အစကတော့ လူကြီးကို ဖယ်ပေးမလို့ပါ။ ဒါပေမယ့် အခုလို မင်း ၀င်ပြောတာကို သောက်မြင်ကပ်တဲ့အတွက် ဖယ်မပေးချင်တော့တာ”ဟု မခိုင်လုံသော အကြောင်းပြချက်ကို ပေးလျက် နေရာတွင် ဆက်လက်၍ ပေကပ်ထိုင်နေတတ်ကြသူများမှာ “ဒေါ်အောင်ဆန်းစုကြည်ကို အစကတော့ လွှတ်ပေးမလို့ စဉ်းစားနေပါတယ်၊ အခုတော့ ယက်တောကိစ္စဖြစ်လာတဲ့အတွက် လွှတ်မပေးတော့ပါဘူး” ဟု ပြောထွက်သော နအဖ၏ မိန်းမရွှင်ပါးစပ်နှင့် တူလေသည်။

သို့သော်ဤကိစ္စမျိုးမှာ ဥပဒေဖြင့် ပြဋ္ဌာန်းထားခြင်းမဟုတ်၍ တရားဥပဒေအရ အရေးမယူနိုင်ချေ။ ကိုယ့်အသိစိတ်နှင့်ကိုယ် ၀တ္တရားကို သိကြရန်သာရှိသည်။

ဤသို့ သက်ကြီးရွယ်အိုများကို နေရာဖယ်ပေးရသည့်ကိစ္စမှာ လူ့အဖွဲ့အစည်းတွင် အများစုမှ ကောင်းသောစံအဖြစ် လက်ခံထားကြသည့် ဖြစ်ရပ်မျိုးဖြစ်၍ ဖယ်ပေးရန် ၀ံ့ဝံ့စားစား ၀င်ပြောသူအား အများစုမှ အပြစ်မမြင်တတ်ကြပေ။ ဖယ်ပေးရသူအနေဖြင့်လည်း ၀င်ပြောသူကို ပြန်လည်၍ နှုတ်တုန့်မပြန်ရဲပေ။ အလွန်ဆုံး မျက်နှာပုပ်ထားရုံမျှသာ တတ်နိုင်ပေသည်။

သို့သော် လူအများ ကျူတန်းစီနေသည့် နေရာတွင် လူတယောက် ကြားက ဖြတ်၍ တန်းစီသည့် ကိစ္စကို ကြည့်ကြပါစို့။ ဤဖြစ်ရပ်တွင် ကြားဖြတ်တန်းစီခြင်းကို နောက်တွင် တန်းစီနေသူ မည်သူမျှ နှစ်သက်နိုင်ကြသည် မဟုတ်ချေ။ သို့သော် ထုံးစံအတိုင်း ထိုသူ၏ မတရားလုပ်ခြင်းကို ကန့်ကွက်ပြောကြားရန် အများစုသည် ၀န်လေးကြသည်ကို တွေ့ကြရသည်။ အကယ်၍ စောစောကလိုပင် တရားသဖြင့် ဖြစ်စေချင်သူ တစုံတယောက်က ကြားဖြတ်တန်းမစီရန် ၀င်ပြောမည်ဆိုပါက အခန့်မသင့်လျှင် ကြားဖြတ်သူက ရှက်ရမ်းရမ်းကာ နှုတ်ကြမ်းလျှာကြမ်းဖြင့် ပြန်လည်ရန်တွေ့တတ်သည်ကိုလည်း ကြုံတွေ့ကြဖူးပေမည်။

ထိုအခါမျိုးတွင်…. ကျူတန်းထဲမှ လူ ၂၀ ရာခိုင်နှုန်းခန့်သည် ကြားဖြတ်တန်းမစီရန် ၀င်ပြောသူဖက်က (အသံတိတ်) ထောက်ခံတတ်ကြသည်။ လူ ၇၀ ရာခိုင်နှုန်းခန့်သည်ကား မိမိပတ်ဝန်းကျင်တွင် ဤကိစ္စဖြစ်ပျက်သွားသည်ကို (oblivious) မသိလိုက်ကြသည်မှာ များသည်။

စိတ်ဝင်စားစရာကောင်းသည်မှာ ကျန်သော ၁၀ ရာခိုင်နှုန်း၏ စိတ်နေသဘောထားဖြစ်သည်။ ထိုသူတို့သည် ကျူကြားဖြတ်တန်းစီခံလိုက်ရခြင်းကို လုံးဝမနှစ်သက်။ သို့သော်လည်း ထုတ်ဖော်ကန့်ကွက်ရန်လည်း မ၀ံ့ရဲကြ။ တဖန် တစုံတယောက်မှ ထုတ်ဖော်ကန့်ကွက်ခဲ့လျှင် ထိုသူကို ထောက်ခံရမည့်အစား ၄င်းတို့ မပြုမူဝံ့သည့် အမှုတရပ်ကို ထိုသူက ပြုမူခဲ့ခြင်းဖြစ်၍ ထိုသူအပေါ်တွင် မနာလို ၀န်တိုလိုလျက် အကြောင်းမဲ့ အမုန်းပွားကာ ထိုသူ၏ လုပ်ရပ်ကို မထောက်ခံတော့ချေ။ ကျူတန်းဖြတ်သူက ရန်တွေ့ခဲ့လျှင် ထို ၁၀ ရာခိုင်နှုန်းစိတ်ထဲတွင် ကျိတ်ပြီးပင် ၀မ်းသာတတ်သေးသည်။ “ကောင်းတယ်၊ လူတွင်ကျယ် လုပ်ချင်တဲ့ကောင် မှတ်ပေရော့” ဟုလည်း သူတို့၏ မျက်မုန်းကျိုးစိတ်ကို တိုးတိုးတဖုံ၊ သိသာအောင်တမျိုး ဖော်ပြတတ်ကြသည်။ ထိုသူမျိုးမှာ အသိခေါက်ခက် အ၀င်နက်ကြသူများဖြစ်ကြလေသည်။ ဘာမှ မသိလိုက်သူ ၇၀ ရာခိုင်နှုန်းကို အမြင်မှန်ရအောင် ပြုလုပ်ရန်လွယ်ကူသော်လည်း ထိုဆယ်ရာခိုင်နှုန်းမှာကား ပြုပြင်ရန် ခဲယဉ်းလှသည်။ ထိုသူများသည် ဓမ္မဖက်မှ ရပ်တည်သူများကို အမနာပ ဝေဖန်အပြစ်ပြောကာ မျက်မုန်းကျိုးကြသူများလည်း ဖြစ်သည်။ ထိုသူတို့၏ စိတ်နေသဘောထားသည် ယုတ်ညံ့လှချေသည်။

အထက်တွင် ဖော်ပြခဲ့သော ဖြစ်ရပ်နှစ်ခုသည် သိပ်ပြီး ကြီးကျယ်အရေးပါလှသည့် ကိစ္စများ မဟုတ်လှသော်လည်း အရေးပါလှသော ကိစ္စရပ်များတွင်လည်း လူတို့၏ တုန့်ပြန်ပုံများမှာ ထိုနည်းနှင်နှင်ပင်ဖြစ်လေသည်။

အဓမ္မကို ကိုယ်တိုင်ကိုယ်ကျကျူးလွန်သူများ၊ မိမိပတ်ဝန်းကျင်တွင် အဓမ္မကြီးထွားနေသည်ကို မသိလိုက်မသိဘာသာ ရေငုံနှုတ်ပိတ်နေသူများ၊ အဓမ္မဖက်ကို တိုက်ဖျက်ရန် ကြိုးစားကြသူများ၊ ထိုသို့ အဓမ္မကို တိုက်ဖျက်ရန်ကြိုးစားသူများကို အလိုလို မျက်မုန်းကျိုးနေသူများ စသဖြင့် လူအမျိုးမျိုး အထွေထွေကို ဤလောက ဇာတ်ခုံကြီးပေါ်တွင် အထင်းသားတွေ့နိုင်ပေသည်။